Lukas 1:46-56
46Malis hais tias, “Kuv lub siab cia li qhuas tus Tswv;
47Vajtswv uas yog kuv tus Cawmseej,
nws ua rau kuv zoo siab kawg li.
48Rau qhov kuv yog nws ib tug ntxhais qhev uas tsis tseemceeb
los nws tseem nco txog kuv thiab!
Txij no mus txhua haivneeg yuav hu kuv hais tias,
tus uas tau koob hmoov,
49vim tej uas Vajtswv tus uas muaj
hwjchim loj kawg nkaus tau ua rau kuv lawm.
Nws lub npe dawbhuv kawg nkaus;
50Vajtswv hlub txhua tus uas hwm nws
ib tiam dhau ib tiam.
51Nws tsa nws txhais tes uas muaj hwjchim ua kom cov neeg
uas khavtheeb tsis sib haum thiab tawg pab tawg pawg.
52Vajtswv muab cov vajntxwv uas muaj hwjchim txo
ntawm lawv lub zwmtxwv,
thiab Vajtswv muab cov neeg uas tsis muaj hwjchim
tsa rau qhov chaw siab.
53Vajtswv pub tej zaub mov zoo rau
cov neeg uas tshaib nqhis tau noj tsau npo.
Nws ntiab cov neeg npluanuj khiav mus tes dawb tes npliag.
54Nws ua raws li nws tau coglus tseg
rau peb cov yawgkoob lawm,
thiab nws tau los pab cov neeg Yixalayees
uas yog nws cov tubtxib.
55Nws nco ntsoov hlub Anplahas thiab
Anplahas cov xeebntxwv mus ibtxhis li!”
56Malis nrog Elixanpes nyob yuav luag tau peb lub hlis, nws mam li rov mus tsev.
Nqi cim:
“Vajtswv uas yog kuv tus Cawmseej, nws ua rau kuv zoo siab kawg li” (Lukas 1:47).
Lus nug rau sawvdaws xav:
- Malis muab Vajtswv hu licas nyob hauv nws lub neej?
- Malis paub tus Tswv ua yam dabtsi rau nws?
- Peb tabtom muaj kev xyiv fab li cas hauv peb lub neej?
Malis pib hu nws zaj nkauj xyiv fab los ntawm qhov uas nws qhuas tus Tswv (nqi 46). Malis hu nkauj los ntawm txojkev zoo siab xyiv fab, vim nws paub tej uas tus Tswv ua pub rau nws.
Tim ib, tus Tswv yog nws tus “Cawmseej” (nqi 47). Malis paub hais tias nws yog neeg txhaum thiab tus Tswv yog nws tus Cawmseej. Tim ob, tus Tswv yog tus uas pub koob hmoov rau nws (nqi 48). Lo lus “nco txog” qhia paub hais tias nws tsis tsimnyog (rau qhov Malis yog neeg Naxalej uas nyob hauv lub xeev Kalilais, cheebtsam uas cov neeg Yudais saib tsis muaj nqis) tiamsis tus Tswv tseem hlub nws. Tus neeg uas tus Tswv nco txog yog tus uas tau koob hmoov. Tim peb, tus
Tswv qhia nws lub fwjchim rau Malis (nqi 49) los ntawm tej haujlwm uas nws ua rau Malis xeeb thiab. Tim plaub, tus Tswv qhia tshwm nws “hlub” Malis (nqi 50), thiab nws txojkev hlub tsis muaj hnub xaus. Tim tsib, tus Tswv yog tus uas tiv thaiv, pub zaub mov noj thiab tuaj nws haivneeg tog (nqi 51-53), tus Tswv yuav txo cov neeg khavtheeb kom lawv nyob tes dawb tes npliag, nws tsa cov neeg txo fwjchim thiab pab kom lawv muaj noj muaj haus tsau npo. Tim rau, tus Tswv yog tus uas“ua raws li nws hais”, nws ua raws li nws coglus tseg rau nws haivneeg (nqi 54-55), tus Mexiyas yuav los yug raws nraim li Vajtswv coglus tseg rau cov Yudais tej yawg koob, “Tiamsis thaum txog lub sijhawm uas Vajtswv teem cia lawm, Vajtswv txib Vajtswv tus Tub los yug ua neeg, muaj ib tug pojniam yug nws. Thiab nws kuj coj raws li cov Yudais txoj kevcai ib yam li sawvdaws” (Kalatias 4:4).
Nyob hauv lub ntiajteb uas puv npo tej kev tsovrog, kab mob kis txhua qhov, ntau tus tibneeg poob haujlwm v.v… ua rau peb tsis muaj kev xyiv fab li. Tiamsis thaum xav txog Malis lubneej zoo siab xyiv fab, ua rau peb paub hais tias nws kuj nyob rau lub tsamthawj ntxhov siab thiab nyuaj siab heev. Txawm hais tias Malis yog Daviv xeebntxwv los nws nyob hauv nroog Naxales pem lub xeev Kalilais, yog lub nroog uas cov neeg Yudais saib tsis muaj nqis thiab nyuam qhuav qhaib nrog Yauxej xwb los Malis txaus siab cia lub cev xeeb tub li Vajtswv siv. Raws li cov Yudais txoj kevcai yog ib tug ntxhais xeeb tub ua ntej yuav txiv, nws yuav raug hnyos, raug tsawm foom txob thuam thiab raug muab pobzeb txawb kom tuag (Levis Kevcai 20:10). Txawm li ntawd los Malis tseem zoo siab xyiv fab qhuas Vajtswv, rau qhov nws paub hais tias tus Tswv tabtom nrog nws nyob thiab nws yog tus tau Vajtswv koob hmoov (Lukas 1:28). Peb cia li ua kevcai koobtsheej nco txog Tswv Yexus los yug ntawm lub siab xyiv fab vim tus Tswv twb los yug lawm, txawm yog muaj tej kev txomnyem, tej teebmeem tuaj raug los nco ntsoov hais tias tus Tswv yog tus uas cawm peb, nws yeej yuav qhia tawm nws lub fwjchim thiab txojkev hlub rau peb, nws yuav tiv thaiv, tuaj peb tog, pab peb thiab ua ncaj ncees rau peb.
Muaj yam dabtsi tabtom ua rau peb tsis zoo siab hu nkauj qhuas tus Tswv?
Thov Vajtswv:
Tus Tswv, thov koj tshem tej kev txhawj xeeb, nyob puag ncig ntawm nyuam yaus mus, thov koj pab kom nyuam yaus paub hais tias Tswv Yexus twb los yug lawm thiab nws coj kev xyiv fab los pub rau nyuam yaus. Ameeg.
Email: kawmvajluskubtxhuahnub@gmail.com
Kênh Youtube BHKTHN:
