Klei Aê Diê Blŭ: I Bruă Mtao 13:1-6
Êlan kliăng: “Yêhôwa jing pô thâo pap leh anăn pô jăk; amâo djăl ăl ôh, leh anăn bŏ hŏng klei khăp.” (Klei Mmuñ Hđăp 145:8).
Klei êmuh ksiêm mĭn: Ya klei phat kđi khua pô hưn êlâo hưn kơ mtao Y-Jêrôbôam? Si klei mtao bi kdơ̆ng leh anăn ya boh ñu mă tŭ? Ya klei mtao akâo kwưh? Ya klei drei hriăm mơ̆ng klei jăk Khua Yang leh anăn khua pô hưn êlâo?
Kyua klei jhat ƀai mtao Y-Rôbôam ngă, Khua Yang mă leh pluh găp djuê čar Dưr brei kơ mtao Y-Jêrôbôam hŏng klei ƀuăn srăng mdơ̆ng sa boh sang mtao kiă kriê kjăp tơdah mtao thâo gưt asăp kơ Khua Yang (I Bruă Mtao 11:37-39). Ƀiădah lĕ mtao lhiăr mbliư̆ wĭt, ngă rup dua drei êđai êmô mah dưm ti ƀuôn Dan leh anăn ƀuôn Ƀêthel čiăng brei phung ƀuôn sang nao kkuh mpŭ (I Bruă Mtao 12:28-30). Kyuanăn yơh, Khua Yang yua sa čô khua pô hưn êlâo mơ̆ng čar Dhŭng nao kơ ƀuôn Ƀêthel brei hưn klei phat kđi kơ “knưl” (êlan 2) čiăng hưn mthâo klei kkuh mpŭ msĕ snăn jing klei čhŏ mrŏ, jing êlan soh. Tơdah mtao hmư̆ klei phat kđi mơ̆ng Khua Yang, hrô kơ klei thâo kmhal kơ klei soh, bi mtao lĕ ăl ngêñ leh anăn čiăng brei mă krư̆ khua pô hưn êlâo. Kyua klei amâo mâo đăo, ai tiê djăl čôñ leh anăn mgao yơh mtao Y-Jêrôbôam amâo dưi “djăl hmư̆, amâo ruăt blŭ, amâo djăl ăl” (Y-Yakơ 1:19b). Klei mtao bi kdơ̆ng wĭt amâo mdê hĭn hŏng lu phung đăo ênuk anei ôh! Brei hdơr tui si knhuah hdĭp drei hŏng Klei Aê Diê Blŭ yơh srăng ba boh mă tŭ mdê mdê.
Tơdah mtao Y-Jêrôbôam krêñ ngêñ, yơr kngan mơ̆ng knưl lač brei mă khua pô hưn êlâo snăn kngan mtao jing krô hĕ mtam (êlan 4). Mđrăm mmông anăn mơh “Knưl klưh msĕ mơh, leh anăn hbâo hŏk kơ tač mơ̆ng knưl” (êlan 5) msĕ si čiăng hưn bi sĭt kơ bruă khua pô hưn êlâo. Khua Yang ngă leh bruă myang Ñu čiăng ba mtao Y-Jêrôbôam truh kơ klei kmhal kơ klei soh, ƀiădah mtao ăt khăng ai tiê leh anăn knŏng sa mta klei ñu kwưh akâo anăn jing bi hlao brei kngan ñu, hrô kơ klei bi hlao ai tiê khăng leh anăn jhat ƀai ñu (êlan 6a). Amâo bi êmut kơ mnuih čiăng mă pô ôh, khua pô hưn êlâo “kwưh kơ Yêhôwa” leh anăn boh mă tŭ “kngan mtao hlao, lŏ jing msĕ si êlâo.” (êlan 6b). Klei jăk Khua Yang leh anăn khua pô hưn êlâo ti anăp ai tiê khăng mtao Y-Jêrôbôam jing prŏng êdimima. Hơưi đei kơ mtao dlăng hơăi mang klei jăk Khua Yang snăn yơh ñu ăt kkuh kơ rup yang (êlan 33-34) atăt truh kơ klei phung Asiri mă ƀuôn ala mtao čar Dưr jing mnă hlăm thŭn 722 Êlâo kơ Krist.
Lu bliư̆ drei ăl čôñ kơ phung ngă jhat kơ drei leh anăn hơ̆k mơak tơdah ƀuh diñu mă tŭ boh ruă jhat. Pătdah drei kƀah hĕ ai tiê jăk hŏng “phung roh”, hŏng phung bi kdơ̆ng, leh anăn hŏng phung bi êmut kơ drei. Ƀiădah Khua Yang Yêsu mtô drei brei, “Khăp bĕ kơ phung roh diih, ngă jăk bĕ kơ phung bi êmut kơ diih. Hơêč hmưi klei jăk jĭn bĕ kơ phung tăm pah kơ diih; wah lač brei bĕ kơ phung ngă jhat kơ diih.” (Y-Luk 6:27-28). Anei jing klei amâo dưi ngă ôh tơdah Yang Mngăt Jăk amâo mâo bi doh ôh klei hdĭp drei leh anăn mjing knuih jăk hlăm drei.
Si ngă drei thâo kral mơ̆ klei jăk Khua Yang amâo mâo knhal ôh hŏng drei? Si knhuah drei dôk hdĭp čiăng hdơr knga kơ klei pap Khua Yang brei kơ drei?
Ơ Khua Yang, bi mni kơ Ih kyua Ih ăt ngă jăk nanao kơ kâo êjai lu bliư̆ kâo mluk mgu bi kdơ̆ng hŏng Klei Ih Blŭ. Akâo Khua Yang brei kơ kâo ai tiê êdu êun čiăng gưt ngă jih klei Ih čiăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 22:1-21
Kênh Youtube BHKTHN:
