Klei Aê Diê Blŭ: Y‑Mathiơ 8:5-13
Êlan kliăng: “Ƀiădah khua kahan anăn lŏ wĭt lač kơ Yêsu, ‘Ơ Khua Yang, kâo amâo năng ôh jum ih mŭt hlăm sang kâo; ƀiădah knŏng brei ih mtă, leh anăn dĭng buăl kâo srăng hlao.’ ” (Y‑Mathiơ 8:8).
Klei êmuh ksiêm mĭn: Khua kahan akâo Khua Yang bi hlao kơ hlei pô? Ya bruă ñu ngă leh bi êdah klei ñu đăo prŏng kơ Khua Yang Yêsu? Ya klei Khua Yang ngă ti anăp klei đăo prŏng anăn? Ya drei ngă čiăng kơ klei đăo drei đĭ hriê kơ prŏng hĭn grăp hruê?
Bhiăn ƀuh hĭn, rup phung amĭ ama dleh dlan tui duah nai êa drao mdrao kơ anak pô, hŏng rup sa čô khua hiu duah nai êa drao mdrao brei kơ dĭng buăl ñu. Trăn Klei Aê Diê Blŭ hruê anei čih yăl dliê kơ sa čô khua kahan čar tue hriê akâo kơ Khua Yang Yêsu bi hlao brei kơ dĭng buăl ñu. Klei anei brei drei ƀuh, khua kahan anei jing sa čô mnuih mâo ai tiê jăk thâo pap, thâo săng klei ruă duam kơ pô ti gŭ ñu dôk tŭ. Dôk ti anăp klei akâo mơ̆ng sa čô khua kahan čar tue, Khua Yang Yêsu amâo dôk ngă kĭ kơ̆ ôh. Mklăk wĭt, Ñu hmiêt mprăp nao mbĭt mtam hŏng khua kahan anăn kơ sang gơ̆, čiăng bi hlao dĭng buăl gơ̆, wăt tơdah sang gơ̆ jing phung tue, arăng yap jing čhŏ mrŏ.
Ƀiădah bi kngăr êdi, hlăk khua kahan anăn lač hŏng Khua Yang snei, leh anăn pruê̆ blŭ anei hlŏng yap jing sa klei blŭ mâo klei hing ang: “Ơ Khua Yang, kâo amâo năng ôh jum ih mŭt hlăm sang kâo; ƀiădah knŏng brei ih mtă, leh anăn dĭng buăl kâo srăng hlao” (êlan 8). Khua kahan anăn thâo săng klei amâo mâo năng ñu pô, kơ anôk ñu dôk. Ñu đăo khut khat kơ klei myang mơ̆ng Klei Khua Yang Blŭ. Ñu thâo kơ ñu mâo klei dưi mơh, leh anăn klei dưi ñu mâo hlăm klei ñu blŭ mtrŭn kơ phung ti gŭ ñu. Kyuanăn, ñu đăo klei Khua Yang Blŭ ăt mâo klei dưi msĕ snăn mơh, knŏng akâo kơ Khua Yang blŭ sa boh, klei myang ăt dưi suôt đuê̆ djăp mta klei ruă duam mơ̆ng kbưi. Klei đăo ñu ngă kơ Khua Yang Yêsu bi kngăr, leh anăn Khua Yang lač, Ñu ka tuôm ôh ƀuh mnuih mâo klei đăo prŏng msĕ snăn hlăm phung ƀuôn sang Israel. Kyua hŏng klei khua kahan đăo kơ Khua Yang Yêsu prŏng êdimi anăn yơh, dĭng buăl ñu dưi bi hlao. Dưi lač, klei jăk jĭn mơ̆ng Khua Yang ăt dưi truh kơ drei hŏng klei đăo mơ̆ng pô mkăn.
Klei đăo jing sa mta klei hgăm hlăm lam grăp čô mnuih, leh anăn dưi bi êdah hŏng grăp mta bruă ngă điêt prŏng hlăm klei hdĭp. Klei sĭt, lu mnuih hlăm phung drei ngă bruă klei đăo jăk yơh, ƀiădah knŏng hlăm wăl Sang Aê Diê, hlăm êpul djă bruă, hrô kơ klei ngă bruă klei đăo hlăm djăp anôk, djăp mmông. Lu bliư̆ drei mĭndah drei ăt mâo klei đăo prŏng kơ Aê Diê, ƀiădah knŏng hlăk tuôm hŏng klei lông dlăng truh kơ drei pô amâodah kơ gŏ sang drei, snăn kơh drei thâo kral si klei awăt êdu klei đăo drei jing. Boh nik nak hlăk tlă anăp hŏng đa mta boh klei truh kơ klei hdĭp, drei amâo djăp ôh klei đăo čiăng dưi dôk guôn klei čiăng jăk mơ̆ng Khua Yang, ƀiădah ruăt nao duah djăp mta ênhă êlan mgaih mkra tui si mnuih lăn ala. Brei hdơr, klei đăo đĭ hriê kơ prŏng grăp hruê, kyua mơ̆ng bruă ruah đăo knang khut khat kơ Khua Yang, khă tuôm hŏng ya klei truh dưn mơh. Čiêm rông bĕ klei đăo drei hŏng klei bi mguôp sĭt suôr hŏng Khua Yang leh anăn hŏng klei Ñu Blŭ nanao.
Si ngă klei đăo drei đĭ hriê kơ prŏng nanao grăp hruê mơ̆?
Wah lač: Ơ Khua Yang, Ih jing Pô kâo đăo knang, akâo kơ Ih pap brei klei kâo đăo awăt êdu. Akâo Ih brei kơ kâo klei đăo đĭ hriê kơ prŏng hĭn nanao grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 7
Kênh Youtube BHKTHN:
