Klei Aê Diê Blŭ: Y-Yakơ 5:10
Êlan kliăng: “Ơ phung ayŏng amai adei, ksiêm bĕ phung khua pô hưn êlâo blŭ leh hlăm anăn Khua Yang, si diñu tŭ klei knap mñai leh anăn diñu gĭr jing klei bi hmô kơ diih” (Y-Yakơ 5:10)
Klei êmuh ksiêm mĭn: Ya ngă phung khua pô hưn êlâo gĭr leh anăn si ngă diñu gĭr? Ya klei hriăm drei mâo mơ̆ng klei diñu bi hmô hlăm klei gĭr?
Hră Y-Yakơ bi hriăm drei lu klei hriăm yuôm kơ klei hdĭp klei đăo ti krah klei lông dlăng hlăm klei hdĭp aguah tlam. Hlăm Y-Yakơ 5:10, drei mâo klei hriăm kơ knuih phung khua pô hưn êlâo hlăm klei tŭ klei knap mñai leh anăn gĭr.
Tinei, Y-Yakơ amâo lač klă anăn sa čô khua pô hưn êlâo ôh, năng ai ñu čiăng lač kơ phung khua pô hưn êlâo hlăm Klei Bi Mguôp Hđăp, hlăm anăn mâo wăt Y-Yôhan pô ngă ƀaptem mơh. Diñu jing phung “blŭ leh hlăm anăn Khua Yang”. Tơdah hmư̆ boh blŭ “hưn êlâo”, mâo lu mnuih bi mĭn ƀuh kơ klei hưn êlâo kơ klei srăng truh êdei anăp. Boh klă gơ̆, mâo đa đa phung khua pô hưn êlâo blŭ klei hưn êlâo kơ klei srăng truh ti anăp mơ̆ng klei Aê Diê bi êdah, ƀiădah bruă phŭn kơ jih jang phung khua pô hưn êlâo jing ngă pô kăp blŭ brei kơ Aê Diê, hưn klei Ñu blŭ. Păt čiăng jih jang klei diñu hưn jing klei iêô kwưh kơ phung ƀuôn sang brei kmhal kơ klei soh, bi mlih klei dôk dơ̆ng ƀơ̆ng huă. Anăn jing klei mtô, bi hriăm, mtă brei răng, leh anăn tăp năng klei hưn êlâo anăn jing klei “hmư̆ amâo jăk ôh”. Kyuanăn mâo lu phung khua pô hưn êlâo tŭ klei arăng bi kdơ̆ng msĕ si roh, tŭ klei arăng hngah, bi êmut leh anăn ngă jhat. Mâo đa đa phung khua pô hưn êlâo tŭ klei arăng čăm, mâo pô arăng krư̆, tăp năng tŭ klei arăng bi mdjiê mơh (dlăng Y-Mathiơ 5:12; 23:31, 37). Wăt snăn dưn mơh, digơ̆ ăt srăng tŭ jih klei knap mñai, gĭr ngă bi leh bruă Aê Diê jao leh, kyuadah digơ̆ dôk sĭt suôr hŏng Pô iêô leh digơ̆.
Jing msĕ si phung khua pô hưn êlâo mơh, Aê Diê ruah leh anăn iêô leh grăp čô drei brei drei “blŭ hlăm anăn Khua Yang” hưn klei sĭt nik Ñu. Khua Yang jao bruă klam prŏng kơ grăp čô drei brei hưn Klei Mrâo Mrang Jăk, iêô kwưh jih jang mnuih kmhal kơ klei soh leh anăn đăo kơ Yêsu Krist. Leh anăn amâo mdê ôh hŏng phung khua pô hưn êlâo mphŭn dô, năng ai arăng srăng hngah kơ klei drei hưn. Tơl phung hmư̆ srăng bi êmut leh anăn ngă jhat kơ drei. Ƀiădah Aê Diê, Pô dôk mbĭt leh anăn brei leh klei ktang kơ phung khua pô hưn êlâo mă bruă kơ Ñu, ăt dôk mbĭt hŏng drei msĕ mơh. Kyuanăn yơh, brei grăp čô drei tui klei phung khua pô hưn êlâo bi hmô leh, knang kjăp kơ Aê Diê, mă bruă kơ Ñu sĭt suôr, hur har hưn Klei Mrâo Mrang Jăk kơ phung riêng gah êjai mmông găl amâodah dleh dlan. Klei mưn kơ phung khua pô hưn êlâo ênuk đưm leh anăn kơ drei hruê anei amâo djŏ knŏng ti lăn ala anei ôh, ƀiădah jing prŏng amâo dưi mkă ôh hlăm Ƀuôn ala mtao guh kơang Aê Diê.
Drei srăng tui klei bi hmô mơ̆ng phung khua pô hưn êlâo, wăt tŭ klei arăng ngă jhat ăt sĭt suôr leh anăn hŏng jih ai tiê hưn Klei Aê Diê Blŭ kơ pô mkăn mơ̆?
Wah lač: Ơ Khua Yang, kâo bi mni kơ Ih kyua klei phung khua pô hưn êlâo bi hmô leh hlăm tŭ klei knap mñai leh anăn klei gĭr. Đru kâo tui klei diñu bi hmô, đăo kluôm ênŭm kơ klei Ih kiă kriê leh anăn hưn Klei Mrâo Mrang Jăk Ih. Êjai tuôm hŏng klei dleh dlan, klei knap mñai, đru kâo thâo knang kơ klei sĭt suôr leh anăn klei jăk Ih čiăng kơ kâo amâo êdu ai ôh, kyuadah kâo thâo hruê Ih lŏ hriê giăm leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yakơ 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
