Klei Aê Diê Blŭ: Rôm 4:13-25
Êlan kliăng: “Kyuanăn klei ƀuăn knang kơ klei đăo, čiăng kơ klei ƀuăn dưi truh hŏng klei pap leh anăn rơ̆ng pioh sĭt kơ jih jang phung anak čô Y-Abraham, amâo djŏ ôh knŏng kơ phung gưt klei bhiăn, ƀiădah wăt kơ phung mâo klei đăo msĕ si Y-Abraham, kyuadah ñu jing ama kơ jih jang drei” (Rôm 4:16)
Klei êmuh ksiêm mĭn: Khua ƀĭng kna Y-Pôl bi mklă klei Aê Diê ƀuăn rơ̆ng kyua ya klei? Ya ngă Aê Y-Abraham dưi kjăp ai tiê dôk guôn klei Aê Diê ƀuăn jing sĭt? Ya klei drei mâo mơ̆ng klei Khua Yang Yêsu djiê leh anăn kbiă lŏ hdĭp?
Khua ƀĭng kna Y-Pôl lač: Klei Aê Diê ƀuăn kơ Y-Abraham leh anăn kơ phung anak čô ñu dưi rơ̆ng mơ̆ng klei đăo. Ñu mblang snei kčưm mphŭn klei ƀuăn Aê Diê kbiă mơ̆ng klei đăo Y-Abraham amâo djŏ kyua bruă djă pioh klei bhiăn ôh (êlan 13). Klei bhiăn knŏng ktrâo lač kơ klei soh leh anăn klei ngêñ Aê Diê doh jăk srăng phat kđi phung soh.
Klei Aê Diê ƀuăn dưi rơ̆ng kơ jih djuê ana Y-Abraham leh anăn anak čô klei đăo ñu (êlan 16). Aê Y-Abraham đăo leh hlăk Aê Diê ƀuăn brei kơ ñu jing ama kơ lu djuê ana. Wăt tơdah ñu ƀuh asei mlei ƀrư̆ hriê kơ awăt leh anăn mô̆ pô jing H’Sara amâo dưi lŏ kkiêng anak ôh, ñu ăt kăn đing rei, lŏ ktang hĭn hlăm klei đăo leh anăn mpŭ mni kơ Aê Diê (êlan 18-21). Klei hdĭp Y-Abraham ăt tuôm soh leh anăn amâo tŭ jing ƀiădah Aê Diê mơak kyua klei đăo ñu leh anăn yap ñu jing kpă ênô (êlan 22). Diñu tŭ mă klei mơak dưi pŭ anak điêt leh anăn lŏ dơ̆ng ngă bruă bi êdah klei đăo kơ Aê Diê.
Klei yuôm bhăn čiăng kơ aê Y-Abraham mâo klei đăo sĭt prŏng prĭn jing ñu thâo klă kơ Pô ñu đăo. Aê Diê prŏng snăk, Pô brei klei hdĭp kơ phung djiê, leh anăn mtă brei jing mnơ̆ng mơ̆ng mnơ̆ng ka jing ôh (êlan 17), Aê Diê dưi bi sĭt ya klei Aê Diê ƀuăn leh (êlan 21). Aê Y-Abraham amâo djŏ jing mnuih mkrah dưh, đăo knang amâo thâo klă. Aê Diê hưn leh Ñu pô leh anăn Y-Abraham lŏ wĭt lač leh asăp Aê Diê iêô čiăng jing aê klei đăo, ama kơ jih jang djuê ana, hlăm anăn mâo drei.
Phung đăo hruê anei ƀuh Klei Aê Diê Blŭ ƀuăn leh hŏng Y-Abraham truh sĭt klă mngač hĭn tơdah Khua Yang Yêsu hriê mơ̆ng djuê ana Y-Abraham, hdră klei bi tui anak mnuih hlue si hdră msir Aê Diê. Drei dưm klei đăo hlăm Khua Yang Yêsu kyua Ñu bi sĭt leh djăp klei hưn êlâo. Khua Yang Yêsu jing Aê Diê ti krah lăn ala. Ñu djiê leh ti kyâo bi kal čiăng kơ drei mâo klei pap brei klei soh, leh anăn lŏ hdĭp leh čiăng kơ drei jing kpă ênô, hdĭp jăk mơak hlŏng lar hŏng Khua Yang. Drei thâo klă klei anei kyua Klei Aê Diê Blŭ, klei bi êdah mơ̆ng Yang Mngăt Jăk, hƀuê ênuk leh anăn phung hưn bi sĭt hlăm dŭm gưl ênŭk. Anei jing Klei Mrâo Mrang Jăk Mơak prŏng Aê Diê brei čiăng kơ drei đăo.
Drei mâo leh klei pap brei leh anăn klei kpă ênô mơ̆ng klei đăo hlăm Khua Yang Yêsu leh mơ̆ ?
Wah lač: Ơ Khua Yang, bi mni kơ Ih pap brei klei soh kâo leh anăn yap kpă ênô kơ kâo mơ̆ng klei đăo hlăm Khua Yang Yêsu Pô Bi Mtlaih. Akâo kơ Ih đru kâo ăt đăo kơ Ih nanao tơl truh hruê kâo dưi ƀuh Ih leh anăn dưi dôk hlŏng lar hlăm Sang Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
