Klei Aê Diê Blŭ: I Bruă Mtao 20:35‑36
Êlan kliăng: “Snăn ñu lač kơ gơ̆, “Kyuadah ih amâo gưt ôh asăp Yêhôwa, nĕ anei tơdah ih đuĕ leh mơ̆ng kâo, sa drei êmông gu srăng bi mdjiê ih.” Leh anăn tơdah gơ̆ đuĕ leh mơ̆ng ñu, sa drei êmông gu bi tuôm hŏng gơ̆ leh anăn bi mdjiê hĕ gơ̆” (I Bruă Mtao 20:36).
Klei êmuh ksiêm mĭn: Hlăk hmư̆ mtao Y‑Ahap phưi mtao Y‑Ben-Hadat, ya klei sa čô khua pô hưn êlâo akâo brei găp ñu ngă? Si klei găp ñu wĭt ngă leh anăn ya klei bi kmhal ñu tŭ? Ya ngă? Ya klei Aê Diê čoh čuăn kơ phung kkuh mpŭ leh anăn mă bruă kơ Ñu? Si klei drei čuăn ngă tơdah dôk hlăm klei truh msĕ snăn?
Leh Aê Diê brei mtao Y‑Ahap klei dưi hĭn bi blah hŏng kahan Siri tal dua, mtao ngă sa mta klei soh prŏng snăk, amâo gưt asăp Aê Diê ôh ƀiădah phưi amâo bi mdjiê ôh mtao Y‑Ben-Hadat leh anăn ngă klei bi mguôp hdơ̆ng diñu (I Bruă Mtao 20:34, 42). Aê Diê tiŏ nao sa čô khua pô hưn êlâo kơ mtao Y‑Ahap hưn klei Aê Diê srăng bi kmhal. Čiăng ngă bruă tiŏ nao anei, khua pô hưn êlâo nao kơ găp ñu hlăm êpul phung khua pô hưn êlâo leh anăn akâo kơ pô anăn čăm ñu, ƀiădah găp ñu hngah amâo čăm ôh. Kyuanăn găp ñu tŭ klei bi kmhal kjham snăk, sa drei êmông gu hiêk ƀơ̆ng gơ̆ tơdah leh đuĕ mơ̆ng khua pô hưn êlâo.
Ya ngă găp khua pô hưn êlâo tŭ klei djiê kyua amâo čăm ôh găp ñu? Djŏ mơ̆ kyuadah ñu amâo thâo săng boh klei snăn amâo čiăng bi ruă găp ñu? Ƀiădah klei khua pô hưn êlâo wĭt lač brei ƀuh amâo djŏ msăn ôh: “Kyuadah ih amâo gưt ôh asăp Yêhôwa, nĕ anei tơdah ih đuĕ leh mơ̆ng kâo, sa drei êmông gu srăng hiêk ƀơ̆ng ih. Leh anăn tơdah gơ̆ đuĕ leh mơ̆ng ñu, sa drei êmông gu bi tuôm hŏng gơ̆ leh anăn bi mdjiê hĕ gơ̆” (êlan 36) Pô găp anei thâo “Klei Yêhôwa mtă” ƀiădah hngah amâo gưt ngă hlue snăn tŭ klei bi kmhal kjham snăk.
Mtao Y‑Ahap tŭ klei bi kmhal kyuadah mgao, mĭndah ñu yơh jing thâo mĭn snăn čuăn ngă tui si hdră êlan mtao ƀiădah bi kdơ̆ng hŏng klei Aê Diê mtă. Găp khua pô hưn êlâo tŭ klei êmông gu hiêk ƀơ̆ng kyuadah hngah ngă tui si klei Aê Diê mtă kyuadah bi mĭn tui si klei thâo săng ñu pô leh anăn dlăng kơ klei Aê Diê mtă amâo djŏ guôp ôh. Jih dua klei yăl dliê brei leh kơ drei thâo kral sa hnơ̆ng čuăn yuôm hlăm mngăt myang: Brei khut khat gưt ngă klei Aê Diê mtă thâodah thâo săng amâodah amâo thâo săng, anăn jing klei Aê Diê čoh čuăn kơ phung tui hlue Khua Yang leh anăn mă bruă kơ Ñu. Hruê anei, drei ăt khăng bi êdah lu mta phŭn knhal čiăng hngah amâo gưt klei Aê Diê mtă leh anăn Klei Aê Diê Blŭ, ƀiădah brei răng kơ klei anei. Brei hdơr snei: “Yêhôwa ƀuh mơ̆ klei mơak hlăm mnơ̆ng myơr čuh leh anăn mnơ̆ng ngă yang msĕ si hlăm klei gưt asăp kơ Yêhôwa? Nĕ anei, klei gưt asăp jing jăk hĭn kơ klei ngă yang, leh anăn klei dôk hmư̆ jing jăk hĭn kơ prăi biăp knô” (I Y‑Samuel 15:22).
Si ngă drei khăng bi mĭn tui si klei mĭn drei pô čiăng đăm gưt ngă tui si Klei Aê Diê Blŭ mơ̆?
Wah lač: Ơ Khua Yang, brei kơ kâo mâo ƀăng knga sa čô hđeh hriăm čiăng mđing hmư̆ asăp Khua Yang, leh anăn brei kơ kâo ai tiê leh anăn klei mĭn sa čô dĭng buăl čiăng gưt ngă kluôm dhuôm klei Ih bi êdah kơ kâo.
Dlăng Klei Aê Diê Blŭ hlăm tlâo thŭn: Y‑Êsai 30:8‑33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
