Klei Aê Diê Blŭ: I Y-Timôthê 4:1-5
Êlan kliăng: “Kyuadah jih jang mnơ̆ng Aê Diê hrih leh jing jăk sơăi” (I Y-Timôthê 4:4a)
Klei êmuh ksiêm mĭn: Si klei phung khua pô mtô soh mtrŭn? Si Khua ƀĭng kna Y-Pôl lŏ mkra klei mtô soh anăn? Si drei ngă čiăng krơ̆ng kjăp klei đăo hlăm Khua Yang?
Tuôm hŏng klei đăo soh mtrŭt kơ klei mĭn hngah kơ klei čiăng mơ̆ng kđeh asăr čiăng dưi nao giăm Khua Yang leh anăn jing yuôm bhăn hĭn, hdră êlan amâo bi dôk ung mô̆ leh anăn kăm đa đa mnơ̆ng ƀơ̆ng (êlan 3). Khua ƀĭng kna Y-Pôl mâo klei bi mklă yuôm bhăn kơ knuih mơ̆ng ya klei Aê Diê hrih leh: “Kyuadah jih jang mnơ̆ng Aê Diê hrih leh jing jăk sơăi” (êlan 4). Brei hdĭp amâo dôk ung, mô̆ jing “klei bhiăn mơ̆ng yang jhat”, kyua klei bi dôk ung mô̆ kyua Aê Diê mkŏ mjing. Hlăk hrih mjing êngĭt adiê leh anăn jih jang mnơ̆ng, hdruôm hră Klei Mphŭn Dơ̆ng mjưh ruĕ hŏng êlan: “Aê Diê ƀuh klei anăn jing jăk” (Klei Mphŭn Dơ̆ng 1:10, 12, 18, 25). Khădah snăn, leh hrih mjing Y-Adam, H’Êwơ leh anăn mkŏ mjing klei bi dôk ung, mô̆ kơ digơ̆, Klei Mphŭn Dơ̆ng 1:31 čih: “Aê Diê ƀuh jih jang mnơ̆ng ñu mjing leh, leh anăn nĕ anei, diñu jing jăk snăk”. Klei myang tal êlâo Khua Yang Yêsu ngă klei myang hlăm sa klei ƀi kuôl ung mô̆ ti Kana (Y-Yôhan 2:1-12). Kyua anăn, klei bi dôk ung mô̆ hlăm Khua Yang jing jăk siam snăk, kyua anăn pô “ghă arăng dôk ung mô̆”, dlăng klei bi dôk ung mô̆ Aê Diê mkŏ mjing leh jing klei bi kgăn kơ klei hdĭp myang jing “phung khua pô mtô soh mplư” (êlan 2).
Tơdah klei “ghă arăng dôk ung mô̆” knŏng mâo Khua ƀĭng kna Y-Pôl lač đuč amâo mblang ôh, snăn klei kăm đa đa mnơ̆ng ƀơ̆ng huă mâo ñu mblang klă mngač leh anăn nik hĭn, “leh anăn mtă kăm ƀơ̆ng đa đa mnơ̆ng ƀơ̆ng huă, mnơ̆ng anăn Aê Diê hrih leh” leh anăn klei bi mklă “jih jang mnơ̆ng Aê Diê hrih leh jing jăk sơăi, leh anăn amâo mâo ôh mnơ̆ng brei arăng hngah tơdah ƀơ̆ng hŏng klei hdơr knga” (êlan 3-4). Klei mtô brei kăm, ghă mjuăt asei mlei čiăng jing yuôm bhăn jing “klei yang jhat mtô”, brei drei “hdơr knga” leh anăn ƀơ̆ng. Boh blŭ “hdơr knga” mâo mñă dua blư̆ hlăm êlan 3 leh anăn 4. Hrô kơ dlăng kơ mnơ̆ng ƀơ̆ng huă, klei bi dông ung mô̆ jing klei bi kgăn kơ klei hdĭp myang, brei drei “mâo klei đăo” leh anăn “thâo klei sĭt nik” jing djăp klei Aê Diê hrih mjing jing jăk sơăi (êlan 3-4). Lŏ mblang jing, mnơ̆ng ƀơ̆ng huă, leh anăn dŭm bruă mkăn Aê Diê hrih mjing leh hlăm klei hdĭp, srăng dưi mjing doh jăk kyua drei mâo klei thâo săng djŏ hlue si Klei Aê Diê Blŭ, kyua klei wah lač leh anăn klei hdĭp hŏng ai tiê hdơr knga (êlan 3-5).
Yang Mngăt Jăk lač leh klă, hlăm ênuk knhal tuč, mâo lu phung bi kdơ̆ng hlue klei đăo soh hiu mtô klei soh. Lu blư̆ hlăm Phung Sang Aê Diê, drei mđing đei kơ bruă kăm klei anei, ghă klei adih čiăng kriê pioh klei doh jăk, ƀiădah lŏ ngă ngơi mang kơ Klei Aê Diê Blŭ leh anăn ƀiă snăk hlăm klei bi mguôp hŏng Khua Yang. Anăn jing klei găl kơ phung mtô soh mŭt mtô “klei yang jhat mtô”. Brei phung ƀuôn sang Aê Diê răng jih ai tiê čiăng krơ̆ng kjăp klei đăo hlăm Khua Yang.
Si knuih drei hŏng ya klei Aê Diê brei?
Wah lač: Ơ Khua Yang, kâo bi mni lač jăk kơ Ih kyua djăp mta klei Ih hrih mjing leh jing jăk sơăi. Akâo kơ Ih đru kâo giăm Ih hĭn hlăm klei hriăm Klei Aê Diê Blŭ wah lač leh anăn hdĭp hŏng klei hdơr knga. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Kôrantô 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
