Klei Aê Diê Blŭ: Y‑Mathiơ 12:43-45
Êlan kliăng: “Kyuadah leh arăng tlaih mơ̆ng klei čhŏ mrŏ lăn ala hŏng klei thâo kral Khua Yang leh anăn Pô Bi Mtlaih drei Yêsu Krist, tơdah klei čhŏ mrŏ anăn lŏ kă leh anăn dưi hŏng diñu, klei diñu jing tal êdei jing jhat kjham hĭn kơ tal êlâo” (II Y‑Pêtrôs 2:20)
Klei êmuh ksiêm mĭn: Tơdah yang jhat čhŏ kbiă đuĕ leh mơ̆ng sa cô mnuih snăn phă ñu nao? Ya ngă ñu dưi lŏ kplăk wĭt kơ anôk ñu dôk hđăp? Si ngă klei jing kơ mnuih tơdah yang jhat čhŏ lŏ wĭt mŭt dôk hlăm ñu? Ya klei hriăm drei mâo mơ̆ng trăn Klei Aê Diê Blŭ anei?
Khua Yang Yêsu yua sa klei bi hriêng čiăng bi êdah klei huĭ hyưt kơ phung Israel tơdah diñu ăt hngah nanao kơ Khua Yang Yêsu Pô Bi Mtlaih leh anăn kơ klei Gơ̆ mtô. Boh phŭn kơ klei bi hriêng anăn snei: Tơdah yang jhat čhŏ kbiă đuĕ leh mơ̆ng sa čô mnuih leh anăn duah sa anôk dôk mkăn ƀiădah amâo ƀuh ôh, ñu lŏ wĭt mtam kơ anôk ñu mrâo kbiă đuĕ leh anăn ƀuh anôk anei kih doh leh, prăp leh bi jăk ƀiădah amâo mâo pô dôk ôh snăn ñu jak ba kjuh čô yang jhat mkăn jhat hĭn hriê dôk mbĭt hŏng ñu.
Khua Yang Yêsu čiăng lač kơ rup phung Israel tơdah diñu thâo kral leh Aê Diê leh anăn mâo klei bhiăn Ñu, klei bhiăn Aê Diê yơh đru bi mlih bruă diñu ngă leh anăn mâo knhuah dôk dơ̆ng ƀơ̆ng huă bi kah mdê hŏng phung găp djuê tue. Ƀiădah lĕ, găn lu wưng ênuk, diñu jing mgao kơ klei diñu jing, diñu hdĭp ai ngăm leh anăn amâo lŏ huĭ mpŭ kơ Aê Diê ôh. Kyuanăn yơh diñu jing leh mnơ̆ng yua kơ Satan, čhal Khua Yang Yêsu yua klei myang khua kơ phung yang jhat suôt yang jhat, diñu amâo mă tŭ ôh klei Khua Yang mtô kơ klei bi mtlaih. Phung Israel dôk hlăm klei jhat kjham kjhuĕ ƀiădah diñu amâo thâo ôh. Khua Yang Yêsu yua boh blŭ “dôk” (êlan 45) čiăng yăl dliê bi êdah kơ anôk yang jhat čhŏ hŏng kjuh čô yang jhat jhat hĭn dôk, brei ƀuh phung khua čih hră leh anăn phung Pharisi dôk jing dŏ yang jhat msĕ si klei Khua Yang blŭ leh hlăm Y‑Yôhan 8:44a, “Diih kbiă hriê mơ̆ng ama diih yang jhat, leh anăn diih čiăng ngă tui si klei ama diih čiăng…”
Sa klei êmuh pioh kơ drei, anăn jing: “drei dôk tui hlue Khua Yang hĕ amâodah tui hlue sa mta klei đăo?” Tơdah tui hlue Khua Yang knŏng msĕ si tui hlue sa mta klei đăo snăn dưi bi mlih mă knŏng klei ngă ti êngao ƀiădah bi klei jing hlăm lam amâo mâo klei bi mlih ôh. Brei drei đăo sĭt kơ Khua Yang leh anăn brei Yang Mngăt Jăk jing khua kơ klei hdĭp drei. Tơdah mâo Ñu jing khua, yang jhat amâo dưi plah mă leh anăn gai klei hdĭp drei ôh. Đăm mjing kơ drei pô klei êđăp ênang mgưt ôh tơdah knŏng guêč ao klei đăo ti êngao ƀiădah hlăm lam ăt jing anôk dôk kơ Satan, leh anăn tơdah drei ăt jing dŏ Satan snăn klei knhal tuč kơ drei jing jhat kjham hĭn kơ hlăk êlâo. Knap mñai êdi tơdah sa čô mnuih dôk hlăm Aê Diê sui thŭn, ngă bi leh jih jang klei bhiăn kkuh mpŭ hlăm klei đăo ƀiădah ka đăo sĭt kơ Khua Yang leh anăn amâo brei Ñu jing khua kơ klei hdĭp ôh. Mnuih snăn ăt dôk ti gŭ klei Aê Diê ngêñ leh anăn srăng mplĕ hlăm war pui hlŏng lar tơdah Khua Yang hriê phat kđi lăn ala.
Khua Yang Yêsu dôk jing khua kơ klei hdĭp drei mơ̆?
Wah lač: Ơ Khua Yang Yêsu, brei kâo lŏ ksiêm wĭt kơ klei đăo kâo pô si ngă kâo đăo sĭt kơ Ih leh mơ̆. Akâo kơ Khua Yang pap brei klei soh kâo, jing khua kơ klei hdĭp kâo leh anăn bi mlih kâo ƀrư̆ hruê jing msĕ si Khua Yang hĭn.
Dlăng Klei Aê Diê Blŭ hlăm tlâo thŭn: Y‑Sakari 6:1-7:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
