Mathais 12:43-45
Nqe cim:
“Cov neeg uas los ntseeg Yexus Khetos tus uas yog peb tus Cawmseej, lawv twb dim tej kev phem hauv ntiajteb no lawm. Yog lawv cia tej kev phem ntawd rov qab khi lawv, thaum kawg lawv lub siab hajyam yuav phem dua thaum chivthawj” (II Petus 2:20).
Lus nug rau sawvdaws xav:
– Thaum dab tawm hauv ib tug neeg lub cev mus, ces nws mus qhov twg?
– Vim licas nws rov los nyob tau hauv nws lub qub tsev?
– Tus neeg uas dab rov los nyob yuav zoo licas?
– Peb kawm tau zaj kawm dabtsi dhau ntu Vajluskub no?
Tswv Yexus siv ib zaj lus pivtxwv los hais txog qhov teebmeem uas cov Yixalayees yuav raug yog hais tias lawv pheej tsis txais yuav Cawmseej Yexus nrog Nws tej lus qhia. Lub ntsiab ntawm zaj lus pivtxwv ntawd yog: thaum dab tawm hauv ib tug neeg mus lawm thiab nrhiav tsis tau chaw nyob, nws rov qab los hauv lub qub tsev thiab pom hais tias qhov chaw ntawd twb tu du lug cia lawm thiab tsis muaj leejtwg nyob, nws txawm mus coj xya tus dab uas tsiv dua nws los nrog nws nyob hauv lub tsev ntawd.
Tswv Yexus xav hais txog cov Yixalayees, lawv paub Vajtswv thiab muaj Nws Txoj Kevcai, los ntawm tus Tswv Txoj Kevcai ua rau lawv paub ua zoo, muaj lub neej cais tawm thiab txawv lwm haivneeg. Tiamsis dhau ntau tiam tomqab, lawv dhau los ua haivneeg khavtheeb txog lawv lub meejmom, lawv ua ntsej muag ncaj siab nkhaus thiab tsis hwm Vajtswv lawm. Twb yog vim li ntawd lawv thiaj raug ua dab Ntxwsnyoog tej cuabyeej, lawv nkaug hais tias Tswv Yexus siv dab tus thawj lub hwjchim los ntiab dab, lawv tsis txais yuav tus Tswv tej lus cawmdim. Cov Yixalayees tabtom ua lub neej phem heev tiamsis lawv tsis paub. Tswv Yexus siv lo lus “nyob” (nqe 45) los hais txog qhov chaw nyob ntawm tus dab thiab xya tus dab uas tsiv dua nws, qhov ntawd qhia pom hais tias cov xibhwb qhia Vajtswv tej kevcai thiab cov Falixais tabtom yog dab tug raws li Vajtswv Txojlus hais hauv Yauhas 8:44a, “Dab Ntxwgnyoog yog nej txiv, thiab nej yeej nyiam ua raws li nej txiv lub siab…”
Muaj ib lo lus nug rau peb, ntawd yog “peb tabtom raws tus Tswv qab lossis raws ib txojkev ntseeg xwb?” Yog tsuas raws tus Tswv qab zoo li raws ib txojkev ntseeg xwb ces tsuas hloov tau lub neej sab nraud xwb, hloov tsis tau tus cwjpwm sab hauv. Yuav tsum ntseeg Tswv Yexus tiag tiag thiab cia Vaj Ntsujplig ua tus tswv kav peb lub neej. Thaum muaj tus Tswv kav lawm, dab yuav tsis muaj cuabkav los txeeb lossis coj peb lub neej. Tsis txhob ua txuj nplig tus kheej kom muaj kev qab siab cuav thaum sab nraud yog tus ntseeg tiamsis sab hauv tseem yog dab Ntxwsnyoog qhov chaw nkaum, thiab yog peb yog dab Ntxwsnyoog tug ces peb lub neej thaum kawg yuav phem dua thaum chivthawj. Yuav tu siab heev thaum ib tug mus pehawm ntau, koom txhua rooj kevcai, tiamsis tseem pheej tsis tau ntseeg tus Tswv tseeb thiab tsis cia tus Tswv tswjkav lub neej. Tus neeg zoo li ntawd tseem nyob hauv Vajtswv txojkev chim npau taws thiab yuav raug pov mus hauv ntuj tawg mus ibtxhis thaum tus Tswv los txiav txim rau lub ntiajteb.
Thov Vajtswv,
Tus Tswv Yexus, thov pab nyuam yaus tig rov saib tus kheej txojkev ntseeg puas tau yog ntseeg Koj tseeb. Thov Koj zam nyuam yaus tej kev txhaum, los ua tus Tswv kav nyuam yaus lub neej thiab hloov nyuam yaus lub neej yim hnub yim zoo thooj Koj. Amees.
Tswv Yexus puas tabtom ua tus Tswv kav peb lubneej?
Nyeem Vajluskub hauv peb lub xyoo: Xakhaliyas 6:1-7:14
Kênh Youtube BHKTHN:
