Yakơ 3:2-6
“Đơ̆ng hơpiĕt gơh pơm kơ bơ̆n arih dah lôch; Bu ‘mêm kơ sư gô yua sa đơ̆ng plei noh.” (Tơdrong Pơđơ̆k 18:21)
Nơ̆r jet tơchĕng pơwao:
– ‘Bok Yakơ yua lu tơdrong pơtih gia ayơ wă pơtih gia kơ Hơpiĕt gơh pơm?
– Yua kơ liơ nơ̆r pơma kăl dêh thoi noh?
– Tơ’blŏk kơ bơ̆n thoi yơ gah tơdrong bơ̆n yua nơ̆r pơma?
Pơma gah tơdrong arih minh ‘nu bơngai lui kơ Kră Yang, ‘bok Yakơ pơma kơ minh tơdrong juăt noh bơih ‘bơ̆r nơ̆r pơma. Sư drơ̆ng khan, “Đĭ đăng kơ kon bơngai bơ̆n tă kơ bơngai yoch ngăl.” (trong 2), ‘nâu bơih tơdrong mă bu bu kư̆m băt, pơm yoch lăm nơ̆r bơ̆n pơma noh ‘bônh dêh. Nơ̆r bơ̆n pơma ‘bơm truh kơ bơngai nai pran dêh. Dah ưh kơ bơwei nơ̆r bơ̆n pơma, sư gô jing đei tơdrong răm truh ưh kơ tam kơ băt.
Pơma gah tơdrong ‘bơm truh đơ̆ng nơ̆r pơma, Yakơ yua iŏk lu tơdrong pơtih gia lăp hơiă dêh. Sư pơma gah đe tah pơlei tơ lăm ‘bơ̆r aseh; păng duk đe wơ̆r tơ đak dơsĭ kư̆m lei lăi. Akâu sư tih tơpă phŏ đei kial hơbŭt, bơ̆n lăng rŏ kơ kiơ̆ hloi kial, mălei ưh ôh, sư kư̆m kiơ̆ kơ tơ’ngla wơ̆r sư mơ̆n, mă khan ‘long wơ̆r sư iĕ (trong 3-4). Đơ̆ng noh, Yakơ pơma hơđăl thoi âu dah kĕ wei hơpiĕt bơ̆n. Pơ’lơ̆ng yua nơ̆r pơma lei na gơh wơ̆r chăl arih năm tơpăt trong. Đơ̆ng ‘bar tơdrong pơtih gia pơma gah tơdrong pơgơ̆r nơ̆r pơma. Yakơ pơma dơ̆ng kơ tơdrong pơrăm nơ̆r pơma đơ̆ng tơdrong pơtih gia thoi ŭnh iĕ đĕch sư gơh sa jơ̆p kơ groi kông bri brah, pơ răm krưp dêh, sa jơ̆p kơ groi kông să. Păng hơpiĕt dah nơ̆r pơma kư̆m gơh “pơm kơ akâu bơ̆n kơdih kư̆m jing răm kơnê̆ ‘mê̆ ‘mach” thoi tơpă (trong 5-6).
Pơm thoi yơ na nơ̆r pơma đei tơdrong pran ‘bơm truh krưp dêh thoi noh? Lăm tơdrong tơpă đei tơbăt tơdrong ‘nâu trŏ. Minh ‘nu bơngai đe rôp pham pơma hơlĕnh ‘bơ̆t anăp ‘bok sek tơlang wă tơpă kơ bơngai ưh kơ đei yoch, khan sư đei tơdrong yoch trăp hloh. Dôm lu nơ̆r kơtơ̆ng ang đơ̆ng đe roi mă ưh kơ tơpă gơh pơm pơrăm kơ minh ‘nu bơngai, tôch kơ đon păng chă tơdrong lôch. Bơ̆n kư̆m đei ‘bôh lơ bơngai ưh kơ hiôk yua kơ đơ̆ng nơ̆r pơma. Blŭng a, bơ̆n tơchĕng khan “nơ̆r pơma ngôi đĕch” mălei jĭ rơka noh phŏ ding đĭ chăl arih. Tơpă thoi Tơdrong Pơđơ̆k 18:21 chih khan, “Đơ̆ng hơpiĕt gơh pơm kơ bơ̆n arih dah lôch” dôm lu nơ̆r bơ̆n pơma kư̆m pơm kơ bơ̆n arih dah lôch.
Lu nơ̆r ‘Bok Kei-Dei ‘nâu jơ̆ nơ̆r tơ’blŏk pran dêh ‘nĕ kơ lăng hơi nơ̆r bơ̆n pơma. Jing bơngai gah Kră Yang, bơ̆n athei wei pơgơ̆r hơpiĕt bơ̆n wă pơma ba tơdrong arih tơplih kơ nơ̆r pơrăm. Jum dăr kơ bơ̆n oei đei lơ bơngai tam mă gơh klaih, athei ră roi Tơdrong ‘Nao ‘Lơ̆ng yua kơ noh bơih nơ̆r ba tơdrong arih. Athei ră roi nơ̆r Kră Yang wă tơgŭm kơ bơngai nai wơ̆ ‘lŏ lăm đon lui. Athei pơma nơ̆r “athei pơma mă ‘lơ̆ng tơgŭm pơyua lu bơngai mă mơ̆ng iĕm” (Êphêsô 4:29).
Ơ Kră Yang, inh băt inh rơdu tơrăn păng pơm yoch lơ tơdrong, măloi lăm nơ̆r inh pơma. Apinh Kră Yang mơnat kơ dôm tơdrong yoch glăi inh păng tơplih inh rim năr hăm tơdrong mơsêh Yang Bơhngol ‘Lơ̆ng. Hơpơi kơ dôm nơ̆r inh pơma ‘bĕnh tơdrong ‘mêm păng tơpăt tơpă, wă ư-ang Anăn Kră Yang păng tơgŭm tơiung ‘nhŏng oh, yua anăn Kră Yang Yêsu Krist, Amen! I
Nơ̆r bơ̆n pơma ‘bơm thoi yơ kơ bơngai jum dăr? Nơ̆r pơma noh hăm ba ăn tơdrong arih dah pơrăm bơngai nai ding truh lôch ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 44-45
Kênh Youtube BHKTHN:
