Kaulauxais 1:28-29
Nqe cim:
“…xav kom txhua tus uas ntseeg Yexus Khetos ua tau lawv lub neej zoo thiab coj tau lawv mus cuag Vajtswv.” (Kaulauxais 1:28b).
Lus nug rau sawvdaws xav:
– Vim li cas Timthawj Paulus sau ntawv mus rau cov neeg Kaulauxais?
– Paulus qhia paub nws lub homphiaj qhia kev ntseeg yog dabtsi thiab nws qhia li cas?
– Qhov no txhawb zog thiab qhia rau peb li cas hauv tes haujlwm qhia kev ntseeg?
Timthawj Paulus tau tus Tswv hu mus ua timthawj rau lwm haivneeg, coj Txojmoo Zoo mus qhia rau ntau haivneeg nyob rau txhua qhov. Txawm yog nws tsis tau mus qhia Txojmoo Zoo hauv lub nroog Kaulauxais, nyob cheebtsam Axias Yau, los dhau ntawm Paulus txojkev ua haujlwm cov neeg Kaulauxais hnov txojkev ntseeg thiab tsa muaj Pawg Ntseeg. Thaum hnov xov hais tias Pawg Ntseeg muaj kev ntseeg cuav tuaj ntxias, Timthawj Paulus thiaj sau tsab ntawv no xa mus qhia kom cov ntseeg paub txojkev ntseeg tseeb, tshwjxeeb yog kev paub txog Tswv Yexus. Paulus qhia hais tias, “Peb ntuas thiab qhia txhua tus raws li peb muaj tswvyim qhia, rau qhov peb xav kom txhua tus uas ntseeg Yexus Khetos ua tau lawv lub neej zoo thiab coj tau lawv mus cuag Vajtswv.” (nqe 28b). Lo lus “lub neej zoo” hauv nqe no (lossis “khov kho” hauv phau txhais tshiab) raws li hauvpaus lus yog hais txog kev “ua kom tiav, loj hlob, paub”. Ua lwm seem lus hais, Timthawj Paulus lub homphiaj qhia kev ntseeg yog pab kom lwm tus loj hlob sab ntsujplig, kom lawv yim hnub yim zoo li tus Tswv thiab tsimnyog sawv ntawm Nws lub xubntiag.
Hais txog qhov uas qhia kev ntseeg, Timthawj Paulus qhia paub, “kuv thiaj muab siab rau siv zog ua tiag tiag, uas yog siv Khetos lub zog uas Nws pub rau kuv; lub zog ntawd tseem tabtom ua haujlwm hnyav nyob rau hauv kuv.” (nqe 29 phau txhais tshiab). Tes haujlwm qhia kev ntseeg tsis yoojyim li, yuav tsum muaj tswvyim, paub kev ntseeg tseeb, paub tus Tswv zoo, tsis yog li xwb yuav tau siv tas zog, tas siab, tas peevxwm qhia rau lwm tus. Qhov kev zoo siab yog Paulus tsis ua qhov ntawd los ntawm nws lub zog tiamsis yog ua los ntawm tus Tswv lub zog.
Ib tug neeg uas tom qab los ntseeg tus Tswv tsis yog “cim civ” loj hlob taus, kev ntseeg yuav loj tsis taus yog hais tias tsis kawm kev ntseeg. Hais txog kawm kev ntseeg, tus kawm yuav tsum tau siv zog tiamsis kuj yuav tsum muaj tus qhia thiab. Yog ib tug coj Pawg Ntseeg lossis yog ib tug ntseeg tus Tswv ntau xyoo, peb txhua tus puavleej muaj feem xyuam qhia kev ntseeg rau lwm tus. Tsis muaj ib yam zoo npaum li thaum peb pom peb cov kwvtij tau Vajtswv Txojlus hloov, muaj kev ntseeg zuj zus.
Yog li peb txhua tus yuav tau siv zog qhia Vajtswv Txojlus tsis tseg tsis tu rau cov neeg uas tus Tswv cia nrog peb nyob. Cov ntawd yog peb cov menyuam hauv tsevneeg, hauv chav kawm hnubkaj, cov ntseeg tshiab uas peb tabtom saib xyuas. Cia li thov tus Tswv pub tswvyim thiab Nws lub zog ua tes haujlwm qhia kev ntseeg pab lwm tus kom loj hlob hauv tus Tswv.
Thov Vajtswv,
Tus Tswv, nyuam yaus ua Koj tsaug uas Koj pub muaj sijhawm qhia Koj Txojlus rau lwm tus. Thov Koj pab kom nyuam yaus ncaj ncees, paub vamkhom Koj lub zog thiab lub tswvyim qhia kev ntseeg, pab kom ntau leej lub neej sab ntsujplig loj hlob. Amees.
Peb tes haujlwm qhia kev ntseeg tabtom pab tau lwm tus loj hlob sab ntsujplig li cas?
Nyeem Vajluskub hauv peb lub xyoo: Tes Haujlwm 20
Kênh Youtube BHKTHN:
