Klei Aê Diê Blŭ: Y‑Mathiơ 11:12‑15
Êlan kliăng: “Gơ̆ srăng nao ti anăp Khua Yang hŏng ai mĭn leh anăn klei myang Y‑Êli, čiăng bi grăng ai tiê phung ama hŏng phung anak diñu, leh anăn bi wir phung amâo thâo gưt asăp kơ klei thâo mĭn phung kpă, čiăng mkra sa phung găp djuê bi jăk kơ Khua Yang.” (Y‑Luk 1:17).
Klei êmuh ksiêm mĭn: Khua Yang Yêsu lač mơ̆ng hlăk Y‑Yôhan Pô ngă ƀaptem ngă bruă klam snăn ya klei mâo hlăm ƀuôn ala mtao? Ya ngă Ñu lač snăn? Si Khua Yang lač kơ hnơ̆ng hmaĭ mơ̆ng Y‑Yôhan pô ngă ƀaptem? Mơ̆ng leh đăo kơ Khua Yang, si hnơ̆ng hmaĭ diih hŏng phung riêng gah?
Khua Yang Yêsu hưn hnơ̆ng hmaĭ mơ̆ng bruă klam Y‑Yôhan pô ngă ƀaptem hŏng boh blŭ “ƀuôn ala mtao adiê tŭ leh klei jŭ jhat”. Klei mblang tal êlâo mơ̆ng “tŭ klei jŭ jhat” jing tŭ klei bi kdơ̆ng ktang phĭt. Klei hâo hưn kơ ƀuôn ala mtao mơ̆ng Y‑Yôhan tuôm hŏng phung Pharisi leh anăn phung Sadusi bi kdơ̆ng hlăk ñu lač kơ klei diñu ngă mgưt. Lač diñu jing phung “djuê ala kpơ̆ng” (Y‑Mathiơ 3:7). Klei ktang hĭn mơ̆ng klei bi kdơ̆ng jing bruă Y‑Yôhan mâo Mtao Hêrôt Antiƀa mă krư̆ kyua ñu lač kơ klei soh mtao ngă knhông. Klei mblang tal dua mơ̆ng “klei jŭ jhat” dưi thâo săng hŏng klei jăk. Wăt tơdah “jŭ jhat”, wăt tơdah mâo klei bi kdơ̆ng ktang ƀiădah ƀuôn ala mtao ăt ƀrư̆ đĭ kyar hĭn. Mơ̆ng leh Y‑Yôhan Pô ngă ƀaptem mphŭn ngă bruă êla truh Khua Yang Yêsu lač klei anei snăn mâo leh lu mnuih thâo kral klei soh leh anăn kmhal čiăng dưi mŭt hlăm ƀuôn ala mtao.
Y‑Yôhan pô ngă ƀaptem truh leh hlăm ênuk Khua Yang bi kčah, leh anăn ñu bi leh bruă klam Aê Diê jao ngă mnuih mprăp êlan kơ Khua Yang Yêsu. Bruă ñu ngă dưi msĕ hŏng Khua pô hưn êlâo Y‑Êli, wăt tơdah tlă anăp hŏng lu klei bi kdơ̆ng leh anăn arăng mă kơ̆ng ƀiădah Khua pô hưn êlâo Y‑Êli ba leh phung ƀuôn sang lŏ wĭt hlăm klei thâo kral Aê Diê. Y‑Yôhan pô ngă ƀaptem lač ñu pô amâo djŏ jing Khua pô hưn êlâo Y‑Êli ôh (Y‑Yôhan 1:21), ƀiădah hnơ̆ng hmaĭ hlăm bruă klam ñu mâo Khua Yang Yêsu msĕ bi knar hŏng Khua pô hưn êlâo Y‑Êli (êlan 14).
Hlăm bruă jing anak Khua Yang, phung đăo kơ Krist hruê anei ăt jing phung dĭng ktang mơ̆ng Lăn Adiê kơ Khua Yang Yêsu. Sa klei êmuh kčah jing drei hmăi ktang mơh ti anôk Khua Yang mdưm pô leh anăn hlăk dôk bi leh jăk bruă klam mơ̆ng sa čô dĭng ktang Lăn Adiê dưi jao leh mơ̆ ka? Brei thâo kral anei jing wưng Khua Yang brei kơ drei mâo ƀô̆ mta leh anăn brei kơ drei bruă klam ngă dĭng ktang mơ̆ng Lăn Adiê. Brei drei thâo ya klei dleh dlan leh anăn arăng ngă jhat srăng mâo sĭt drei hiu hưn kơ Lăn Adiê, ƀiădah ăt brei thâo amâo mâo ôh pô amâodah klei myang dưi hĭn kơ Lăn Adiê, čiăng drei jhŏng bi leh bruă klam Aê Diê jao. Khua Yang Yêsu lač leh “Hlei mâo knga dưi hmư̆, hmư̆ ƀĕ.” Jing mnuih mâo knga yuôm bhăn, akâo Khua Yang brei kơ drei mđing hmư̆ asăp Khua Yang, jing dĭng ktang kơ Ñu hlăm anôk Khua Yang mdưm pô mtam.
Si diih dôk hdĭp hmăi kơ phung Khua Yang mdưm riêng gah pô?
Wah lač: Ơ Khua Yang, akâo kơ Ih yua klei hdĭp kâo jing dĭng ktang kơ Ih. Wăt tơdah tlă anăp hŏng klei bi kdơ̆ng, dleh dlan ƀiădah akâo kơ Ih brei kâo ăt sĭt suôr hiu hưn kơ Lăn Adiê srăng truh kơ lu mnuih dưi thâo.
Dlăng Klei Aê Diê Blŭ hlăm tlâo thŭn: Y‑ Êsai 41:17‑42:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
