Klei Aê Diê Blŭ: Y‑Luk 17:7-10
Êlan kliăng: “Snăn diih msĕ mơh, tơdah diih ngă leh jih klei arăng mtă kơ diih, lač bĕ, ‘Hmei jing phung dĭng buăl amâo năng ôh, hmei ngă knŏng tui si bruă jao kơ hmei.’” (Y‑Luk 17:10)
Klei êmuh ksiêm mĭn: Phung mnuih hlăm klei yăl dliê bi hriêng jing rup čiăng lač kơ hlei pô? Klei bi hriêng anei brei thâo si klei bi mguôp Aê Diê hŏng phung đăo mâo? Thâo săng kơ mta klei anei, si klei mtrŭt drei hlăm knhuah hdĭp kkuh mpŭ leh anăn mă bruă kơ Khua Yang drei?
Klei bi hriêng lač kơ sa čô dĭng buăl mă bruă jih hruê hlăm hma, ƀiădah wĭt kơ sang ăt lŏ mkra mnơ̆ng ƀơ̆ng huă kơ khua ñu mơh. Čiăng blŭ kñăm, Khua Yang Yêsu lač: “Snăn diih msĕ mơh…” (êlan 10). Snăn, dĭng buăl hlăm klei bi hriêng jing rup phung ƀĭng kna, amâodah blŭ lar hĭn jing rup lač kơ phung tui hlue Khua Yang Yêsu, kyuanăn Khua jing Aê Diê. Klei bi mguôp ti krah Aê Diê leh anăn phung đăo jing klei bi mguôp Khua – dĭng buăl. Lu mnuih amâo jăk ai tiê ôh tơdah bi mĭn kơ klei bi mguôp anei, ƀiădah jăk ai tiê hĭn tơdah bi mĭn klei bi mguôp Ama – anak amâodah mah jiăng hŏng Khua Yang. Kyua klei khăp leh anăn klei pap, Aê Diê brei phung mâo klei bi mtlaih iêu kơ Ñu jing Ama, leh anăn Khua Yang Yêsu ăt lač mơh: “Kâo amâo lŏ pia kơ diih dĭng buăl ôh, … ƀiădah kâo pia kơ diih mah jiăng” (Y‑Yôhan 15:15). Hlăm klei pap, Khua Yang “amâo lŏ pia” kơ drei dĭng buăl ôh, ƀiădah klei boh sĭt jih jang drei ăt jing dĭng buăl Ñu.
Jing dĭng buăl, brei drei đup gưt kơ Aê Diê. Sa čô dĭng buăl mă bruă jih hruê hlăm hma jing klei khua mtă, leh anăn ară anei ñu lŏ mkra mnơ̆ng ƀơ̆ng huă kơ wăt tơdah êgah êmăn snăk ăt jing klei khua mtă mơh (êlan 7-8). Mta klei brei sa čô dĭng buăl ngă jing gưt asăp khua ñu hlăm jih jang mmông leh anăn jih jang klei jing. Jing sa čô dĭng buăl, jih jang ai ktang drei brei yua jih pih mă bruă kơ Aê Diê. Dĭng buăl anei amâo mâo krao amâodah blŭ hngah kyua klei suăi êmăn ôh, ñu kăn mâo klei dưi mdei rei, ƀiădah knŏng uêñ mĭn ngă bi leh bruă khua jao. Jing sa čô dĭng buăl, drei amâo mâo klei dưi akâo êmuh klei bi mni amâodah lŏ tla wĭt kyua klei drei gưt asăp ôh. “Ñu srăng bi mni mơ̆ kơ dĭng buăl anăn kyuadah gơ̆ ngă klei ñu mtă leh?” (êlan 9). “Bi mni” tui si klei mblang klă jing “klei pap” (charis), kyuanăn êlan anei dưi thâo săng msĕ snei: “Sa čô dĭng buăl dưi mơ̆ mâo klei pap (charis) mơ̆ng khua kyua ñu ngă ya klei khua ñu yua?” Klei wĭt lač jing: Hơăi! Kyuadah “hmei jing phung dĭng buăl amâo năng ôh”. Boh blŭ “hơăi mang” mblang jing “amâo năng”, “Khua amâo đuôm nư kâo ya mta klei ôh kyuadah kâo knŏng jing sa čô dĭng buăl amâo năng ôh” – Ya mta klei Khua Yang mưn kluôm dhuôm jing klei pap.
Kyuadah drei khăng wơr bĭt drei knŏng jing dĭng buăl amâo năng ôh, kyuanăn yơh knuih drei mă bruă ka djŏ sĭt ôh, leh anăn amâo thâo hdơr knga bi mni kơ Khua Yang êjai mâo mmông găl dưi mă bruă kơ Ñu leh anăn kơ ayŏng amai adei. Brei mñă nanao drei pô snei: “Aê Diê amâo đuôm nư kâo ya mta klei ôh; djŏ hĭn, kâo yơh đuôm nư Ñu djăp mta klei”.
Si ngă drei thâo hdơr knga kơ Khua Yang kyuadah dưi jing dĭng buăl Ñu mơ̆?
Wah lač: Bi mni kơ Khua Yang bi mtlaih leh kâo leh anăn brei kơ kâo mâo mmông găl dưi mă bruă kơ Ih. Akâo Ih brei kâo thâo săng leh anăn mâo knuih djŏ êjai mă bruă kơ Khua Yang hŏng ai tiê đup gưt leh anăn thâo hdơr knga.
Dlăng Klei Aê Diê Blŭ hlăm tlâo thŭn: Y‑Êsai 63
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
