Klei Aê Diê Blŭ: Klei Bi Hriêng 1:20-22
Êlan kliăng: “Ơ phung mluk, dŭm boh sui diih srăng khăp jing mluk? Dŭm boh sui phung mưč srăng mơak hŏng klei diñu mưč, leh anăn phung mluk bi êmut kơ klei thâo mĭn?” (Klei Bi Hriêng 1:22)
Klei êmuh ksiêm mĭn: Ti anôk Klei Knhâo hưn leh anăn hŏng hlei pô? Si knuih Klei Knhâo leh anăn si hnơ̆ng yuôm ñu? Leh hriăm leh anăn thâo săng dŭm klei anei, ya mta klei brei drei duh kơ drei pô?
Thâo kral hnơ̆ng yuôm klei knhâo thâo mĭn, snăn “Klei Knhâo” ur kraih hưn klei knhâo hlăm djăp anôk, mơ̆ng “hlăm êlan dơ̆ng, krah sang mnia, ti anôk êlan bi kkuh mâo lu mnuih” hŏng klei ngă bruă, mnia blei leh anăn wăt mâo mbĭt hŏng lu klei mplư, tơl truh kơ “ƀăng jang ƀuôn prŏng” jing anôk mă bruă phung knŭk kna.
Mơ̆ng klei anei, drei thâo kral mâo tlâo knuih klei thâo mĭn. Tal sa, knuih bi lar. Klei Aê Diê Blŭ amâodah Klei Mrâo Mrang Jăk čiăng kơ jih jang mnuih leh anăn jih jang mnuih čiăng mâo Klei Mrâo Mrang Jăk, kyuanăn Klei Mrâo Mrang Jăk brei hưn bi lar čiăng đru jih jang mnuih mkăn thâo kral Khua Yang. Amâo mâo ôh pô hriăm Klei Aê Diê Blŭ knŏng pioh kơ hjăn pô. Tal dua, knuih jêč ruăt, “ur kraih”, “ur” (êlan 20-21). Klei knhâo thâo mĭn amâo djŏ knŏng mtô mblang hlăm sang ƀiădah wăt hlăm “êlan dơ̆ng” (êlan 20), amâo dôk guôn arăng êran hriê kơ pô ôh ƀiădah nao kơ arăng (Y‑Êsai 6:8-10). Tal tlâo, knuih klei khăp. Pô hiu hưn Klei Mrâo Mrang Jăk brei tuh êyuh hŏng klei khăp leh anăn klei mđing uêñ kơ mngăt mnuih soh dôk rai luč, “Ơ phung mluk, dŭm boh sui diih srăng khăp jing mluk? Dŭm boh sui phung mưč srăng mơak hŏng klei ñu mưč, leh anăn phung mluk bi êmut kơ klei thâo mĭn?” (êlan 22). Klei Mrâo Mrang Jăk amâo dưi mtô mblang hŏng klei êdu čhut tŭ kơ leh ôh, leh anăn amâo djŏ knŏng hiu hưn êjai dôk hơăi mang, guôn hmao amâodah mmông găl ôh (Y‑Luk 24:32; II Y‑Timôthê 4:2).
Mâo tlâo phung mnuih “Klei Knhâo” čiăng hiu hưn. Tal sa, “phung mluk” jing phung “adôk mda ka thâo săng” kơ klei hdĭp mngăt myang, ƀiă klei ƀuăn rơ̆ng, amâo thâo ôh ya klei kñăm kơ klei hdĭp diñu, leh anăn diñu khăng tui hlue phung lu. Mnuih “mluk” jing phung kriăng nao bi kƀĭn mơh ƀiădah amâo mđing mĭn kơ klei Aê Diê čiăng ôh. Tal dua, “phung mưč”, jing phung hur har, knang kơ asei diñu pô, mĭndah diñu pô thâo djăp mta klei, kdrăp ti êngao diñu guôp dlăng, mâo klei tŭ jing, ƀiădah khăp tĭng yap, leh anăn khăp bi kdơ̆ng hŏng arăng. Mnuih “mưč” jing phung dlăng kơ Klei Aê Diê Blŭ hđăp đưm leh, amâo lŏ djŏ hŏng ênuk diñu hdĭp ôh, amâo guôp hŏng klei hdĭp ôh, amâodah mưč mač kơ phung dôk kjăp hdĭp gưt ngă tui si Klei Aê Diê Blŭ. Tal tlâo, “phung mluk mgu” jing phung amâo mâo klei thâo săng mtam, khăng kŏ, amâo čiăng mđing hmư̆, lač kơ ñu pô nanao yơh jing pô thâo săng klă mngač hĭn, blŭ klei mgang mgăl kơ ñu pô nanao, kyuanăn lač kơ ñu pô jing djŏ hĭn nanao. Mnuih “mluk mgu” knŏng kñăm kơ klei hlăm lăn ala leh anăn kơ mnuih, bi êmut kơ ya mta klei kơ ênuk hlŏng lar.
Thâo kral kơ hnơ̆ng yuôm Klei Aê Diê Blŭ leh anăn kơ knhuah hdĭp soh čhuai phung mluk, phung mưč, drei ƀuh bruă klam brei duh kơ klei ksiêm hriăm Klei Aê Diê Blŭ čiăng dưi jing sa čô knhâo thâo mĭn tui si klei Aê Diê čiăng leh anăn dôk hdĭp tŭ dưn kơ lu mnuih.
Si ngă drei mơak mơ̆ kơ klei thâo mĭn leh anăn klei thâo săng drei pô?
Wal lač: Ơ Khua Yang, akâo Ih bi mtlaih kâo mơ̆ng klei mgao mluk mgu kơ klei hdĭp mngăt myang. Brei kơ kâo ai tiê luă gŭ, tui duah nanao klei Ih čiăng mơ̆ng klei ksiêm hriăm Klei Ih Blŭ čiăng kơ kâo dưi dôk hdĭp bi mơak kơ Ih.
Dlăng Klei Aê Diê Blŭ hlăm tlâo thŭn: Klei Čŏk Hia 3:10-57
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
