Pajlug 1:20-22
Nqe cim
“Nej cov uas tsis thoob tsib ‘e, nej yuav nyiam txojkev tsis thoob tsib mus ntev licas? Thiab cov uas thuam luag yuav zoo siab thuam mus ntev licas?Thiab cov uas ruam yuav ntxub kev txawj ntse ntev licas?” (Pajlug 1:22-HMOWSV).
Lus nug rau sawvdaws xav:
- Tswvyim lub suab hu qhov twg thiab hu leejtwg?
- Tswvyim muaj tej yam tshwjxeeb twg thiab tseemceeb npaum licas?
- Peb muaj feemxyuam nqis peev rau tus kheej licas thaum paub txog tej no?
Zeem paub qhov tseemceeb ntawm kev muaj tswvyim, “Lub Tswvyim” thiaj qw txhua qhov chaw, txij li “tom tej kev thiab tom tej kiab tej khw, thiab txhua qhov chaw uas muaj neeg tuaj txoos ua ke” yog chaw muaj coob neeg, ua lag ua luam, mus txog rau “tej roojvag nroog” yog chaw tej nomtswv tuaj ua haujlwm.
Dhau tej no, peb pom txog peb yam tshwjxeeb ntawm lub tswvyim. Tim ib, pub rau txhua tus. Vajtswv Txojlus lossis Txojmoo Zoo cheemtsum pub rau txhua tus thiab txhua tus cheemtsum Txojmoo Zoo ntawd, yog li ntawd Txojmoo Zoo yuav tsum tau tshajtawm kom lwm tus paub txog tus Tswv. Tsis muaj ib tug twg kawm Vajtswv Txojlus tsuas khaws cia rau tus kheej. Tim ob, ceev nrooj, “lub suab hu”, “nrov ntxhe” (nqe 20-21). Lub Tswvyim tsis yog tsuas hu hauv tsev xwb, tseem hu “tom tej kev” (nqe 20), tsis tos luag tuaj cuag nws, tiamsis nws tuaj nrhiav lawv (Yaxayas 6:8-10). Tim peb, hlub tshua. Tus tshajtawm Txojmoo Zoo yuav tsum ua los ntawm kev hlub thiab hmov tshua txog tibneeg txhaum tus ntsujplig tabtom yuav raug kev puastsuaj, “Cov neeg ruam! Nej tseem yuav zoo siab ua neeg ruam li nej mus txog hnub twg? Nej yuav thuam kev txawj ntse mus txog thaum twg thiab?” (nqe 22). Qhia Txojmoo Zoo tsis yog ua dog ua dig thiab kuj tsis yog tsuas qhia thaum muaj sijhawm lossis zoo sijhawm xwb (Lukas 24:32; II Timautes 4:2).
Muaj peb hom neeg uas “Lub Tswvyim” nqua hu. Tim ib, “cov neeg tsis thoob tsib” yog cov neeg uas “tsis paub qabhau, tsis ntse” txog tej yam nyob sab ntsujplig, lawv tsis muaj kev coglus ruaj khov, tsis paub hais tias lawv ua neej vim dabtsi, thiab lawv ua neej raws lwm tus qab xwb. Tus neeg “tsis thoob tsib” yog tus uas pheej mus pehawm tiamsis tsis quavntsej txog Vajtswv lub siab nyiam. Tim ob, “cov neeg thuam luag”, yog cov uas qhuas hais tias lawv paub txhua yam, sab nraud ua rau luag qhuas, lawv ua tiav ntau yam, qia dub, thiab xav thuam lwm tus. Tus neeg “thuam luag” yog tus uas saib Vajluskub tsis muaj nqis, tsis phim rau kev ua neej, lossis thuam cov neeg uas ua lub neej raws Vajtswv Txojlus qhia. Tim peb, “cov uas ruam” yog cov neeg ruam qauj, tawv ncauj, tsis mloog lwm tus hais, qhuas hais tias tus kheej thiaj yog tus paub, pheej xev lus daws nws zaj, nws khav hais tias nws thiaj yog xwb. Tus neeg “ruam” tsuas too hau ntsoov rau tej yam uas yog ntiajteb thiab tibneeg li xwb, nws ntxub tej uas nyob mus ibtxhis li.
Thaum xam pom qhov tseemceeb ntawm Vajtswv Txojlus thiab lub neej yuamkev ntawm cov neeg tsis thoob tsib, cov neeg thuam luag, thiab cov neeg ruam, ua rau peb pom txog feemyxuam nqis peev rau kev kawm Vajtswv Txojlus thiaj yuav ua tau neeg ntse li Vajtswv siab nyiam thiab ua neej muaj nqis pub rau lwm leej lwm tus.
Thov Vajtswv,
Tus Tswv, thov cawm nyuam yaus dim ntawm kev khav theeb thiab ruam sab ntsujplig. Thov pub rau nyuam yaus muaj lub siab txo hwjchim, niaj hnub nrhiav ua raws Koj lub siab nyiam dhau ntawm kev kawm Koj Txojlus, nyuam yaus thiaj ua tau lub neej haum Koj siab. Amees.
Peb puas qhuas txog tus kheej lub tswvyim kev txawjntse?
Nyeem Vajluskub hauv peb lub xyoos: Nkauj Quaj Ntsuag 3:10-57
Kênh Youtube BHKTHN:
