Klei Aê Diê Blŭ: II Y-Pêtrôs 1:16-18
Êlan kliăng: “Kyuadah hmei amâo tui hlue ôh klei yăl dliê đưm amâo sĭt arăng mkra hŏng klei mčeh mă tơdah hmei bi êdah kơ diih klei myang Khua Yang drei Yêsu Krist leh anăn klei Ñu srăng lŏ hriê, ƀiădah hmei ƀuh leh klei guh kơang Ñu hŏng ală hmei pô” (II Y-Pêtrôs 1:16)
Klei êmuh ksiêm mĭn: Dŭm klei sĭt nik kơ Khua Yang Yêsu mâo hiu hưn mơ̆ng ya klei mâo? Si ngă ñu mñă klei ñu hiu hưn jing klei ñu pô tuôm găn leh? Si drei yua klei hriăm anei hlăm bruă hiu hưn Klei Mrâo Mrang Jăk?
Ai tiê Khua ƀĭng kna Y-Pêtrôs kơ pô mtô klei đăo kơ Krist jing “hưn čiăng lŏ bi êrâo diih hŏng klei kâo lŏ mñă kơ diih” (II Y-Pêtrôs 1:13). Čiăng bi mklă kơ klei anăn, Khua ƀĭng kna Y-Pêtrôs bi mklă ktang snăk klei sĭt nik kơ Khua Yang Yêsu mâo phung Khua ƀĭng kna hiu hưn amâo djŏ jing sa klei ksiêm duah kơ klei yăl dliê đưm amâo sĭt amâodah dŭm klei mĭn anak mnuih msĕ si “mkra hŏng klei mčeh mă” (êlan 16), ƀiădah anăn jing dŭm klei mâo sĭt. Ya klei ñu blŭ jing klei mâo Yang Mngăt Jăk mgei ai tiê.
Khua Yang Yêsu mâo Khua ƀĭng kna Y-Pêtrôs hiu hưn jing Pô “Ñu mă tŭ leh klei mpŭ leh anăn klei guh kơang mơ̆ng Aê Diê Ama” (êlan 17). Ñu mñă dŭm klei ñu hiu hưn jing klei thâo mơ̆ng sa čô ƀuh ti ală mta klei guh kơang Aê Diê ti čư̆ bi mlih (êlan 16). Ñu ăt tuôm hmư̆ leh asăp Aê Diê bi mklă kơ Khua Yang Yêsu: “Pô anei jing Anak kâo khăp êdimi; hlăm Ñu kâo mâo klei mơak snăk” (êlan 17b).
Anăn jing hlăk knuih myang Khua Yang Yêsu bi êdah leh kơ ñu leh anăn dua čô Khua ƀĭng kna mkăn jing Y-Yakơ leh anăn Y-Yôhan (Y-Mathiơ 17:1-8). Bruă phung khua ƀĭng kna hiu hưn klei ală ƀuh, knga hmư̆ kơ klei Aê Diê bi êdah đru kơ phung đăo kơ Krist djăp ênuk mâo sa klei đăo kjăp leh anăn sa klei čang hmăng hdĭp hlăm Khua Yang Yêsu. Kyua Ñu jing anak mnuih, jing Aê Diê mâo klei myang, kdrưh kơang. Pô srăng lŏ hriê msĕ si klei Ñu bi êdah leh êlâo kơ Khua ƀĭng kna Y-Pêtrôs hlăm Khua Yang bi êdah.
Brei dôk kjăp hlăm klei đăo kyua drei dôk đăo kơ Khua Yang Yêsu Krist, Pô mâo phung Khua ƀĭng kna ală ƀuh leh anăn knga hmư̆ leh. Ñu tŭ klei djiê leh, kbiă lŏ hdĭp leh anăn đĭ wĭt kơ adiê. Ñu ăt srăng lŏ hriê čiăng drông drei wĭt dôk hŏng Ñu. Bruă hiu hưn ya klei drei ƀuh ăt brei ƀuh sa čô đăo kơ Krist amâo thâo kral Khua Yang snăn amâo dưi hiu hưn Anăn Aê Diê kơ pô mkăn mâo klei tŭ dưn ôh. Đăm lač ôh ya klei mkăn hĭn kơ hiu hưn Klei Mrâo Mrang Jăk bi mtlaih ƀiădah boh phŭn jing Khua Yang Yêsu Krist, Pô ngă leh leh anăn dôk bi mlih klei hdĭp drei mơ̆ng klei thâo ƀuh mdê mdê, amâo djŏ knŏng hiu hưn kơ sa klei đăo hlăm hră mơar amâodah klei mblang amâodah dŭm klei yăl dliê amâo mâo sĭt ôh. Brei bi mguôp hŏng Khua Yang leh anăn Klei Aê Diê Blŭ čiăng hiu hưn Klei Mrâo Mrang Jăk hŏng klei ƀuh klă sĭt.
Drei dôk hiu hưn Klei Mrâo Mrang Jăk bi mtlaih mơ̆ng ya tur knơ̆ng?
Wah lač: Ơ Khua Yang, bi mni lač jăk kơ Ih kyua kâo thâo kâo dôk đăo kơ sa Aê Diê mâo sĭt. Akâo kơ Ih đru kâo lŏ dơ̆ng dôk kjăp hlăm klei đăo, leh anăn grăp hruê thâo Khua Yang lu hĭn, čiăng kơ kâo jhŏng hiu hưn Klei Mrâo Mrang Jăk bi mtlaih jing klei ală kâo ƀuh, knga kâo hmư̆ leh kơ phung riêng gah, čiăng kơ diñu đăo leh anăn mâo klei bi mtlaih. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
