Klei Aê Diê Blŭ: Klei Mphŭn Dơ̆ng 3:1-5
Êlan kliăng: “Brei diih dôk djŏ hnơ̆ng leh anăn dôk răng. Pô roh diih yang jhat dar jŭm diih msĕ si êmông gu gruh, duah hlei pô ñu dưi hiêk ƀơ̆ng.” (I Y-Pêtrôs 5:8)
Klei êmuh ksiêm mĭn: Si klei mplư truh kơ anak mnuih? Si hdră mnêč Satan yua leh čiăng mplư anak mnuih? Si drei ngă čiăng bi kdơ̆ng hŏng klei yang jhat mplư?
Hlăm wăl anôk siam sĭn war djam Êđen, ala nao blŭ hrăm hŏng mniê. Năng ai H’Êwơ knŏng dlăng kơ ñu ăt msĕ si hlô mnơ̆ng mkăn mơh, ƀiădah Klei Aê Diê Blŭ brei thâo hlăm Klei Bi Êdah 12:9 snei, “…ala hđăp anăn, arăng pia Yang Jhat leh anăn Satan, pô mplư jih lăn ala”. Amâo knŏng jing ala mang ôh, ƀiădah Satan yơh pô nao kơ H’Êwơ. Drei amâo thâo ôh Satan bi mlih asei mlei jing sa drei ala, amâodah dôk ti tluôn kăp gai ala, ƀiădah klă sĭt Satan yơh jing khua mnêč, ñu mkra kđông kăp mplư anak mnuih. Anăn yơh jing hdră mnêč Satan khăng yua, hin snăk ñu hriê bi êdah hŏng rup bi huĭ jhat yang jhat, ƀiădah ñu khăng truă rup “dĭng buăl jăk mngač guh”, bi mơak anak mnuih, leh anăn ƀrư̆ ƀrư̆ lĕ hlăm klei ñu mplư luar!
Hdră mnêč yang jhat mplư tal êlâo hĭn jing klei blŭ hrăm hŏng anak mnuih kơ Klei Aê Diê Blŭ. “Sĭt nik hĕ Aê Diê lač, ‘Đăm diih ƀơ̆ng ôh boh jih jang ana kyâo hlăm war djam’?” (êlan 1b). Ñu mdưm klei êmuh čiăng duah êlan rah hlăm anak mnuih klei đing kơ Klei Aê Diê Blŭ.
“Ƀiădah ala lač kơ mniê, “Hơăi, diih amâo srăng djiê sĭt ôh; kyuadah Aê Diê thâo hruê diih ƀơ̆ng boh anăn ală diih srăng pŏk mblang, leh anăn diih srăng jing msĕ si Aê Diê, thâo kral klei jăk leh anăn klei jhat.” (êlan 4-5). Satan lŏ dơ̆ng mčeh luar klei čiăng jăk Khua Yang. Ñu mplư anak mnuih hŏng klei lač dah Khua Yang amâo brei ƀơ̆ng “boh kăm” kyuadah huĭ jing hĕ msĕ hŏng Khua Yang, mđơr hŏng Ñu; dơ̆ng mơ̆ng anăn kčŭt ai tiê mgao hlăm anak mnuih. Satan ngă ngơi kơ boh jhat klei soh, tơdah ñu rơ̆ng hŏng anak mnuih “Hơăi, diih amâo srăng djiê sĭt ôh”, ngă kơ anak mnuih mĭndah ngă soh dưn, bi kdơ̆ng hŏng klei Khua Yang čiăng ăt kăn mâo klei mơh.
Satan ăt dôk mplư luar anak mnuih hruê anei hŏng hdră mnêč msĕ snăn mơh. Ñu dôk kăp lua leh anăn duah êlan atăt drei kơ klei ngă soh (dlăng I Y-Pêtrôs 5:8). Kyuanăn, brei grăp čô drei kăp dôk răng nanao leh anăn djăl pral thâo kral mnêč yang jhat mtam. Knang kơ Khua Yang leh anăn akâo kơ Ñu đru drei, “Đăm atăt ba hmei hlăm klei mplư ôh, ƀiădah bi mtlaih hmei mơ̆ng Pô Jhat.” (Y-Mathiơ 6:13). Tơdah drei dôk giăm Khua Yang, jing dŏ Khua Yang, drei srăng thâo kral drei msĕ hĭn hŏng Khua Yang grăp hruê. Anăn jing boh tŭ dưn mâo mơ̆ng klei bi mguôp sĭt suôr hŏng Khua Yang, amâo djŏ mơ̆ng klei gĭr ktưn hjăn drei pô ôh. Dơ̆ng mơ̆ng anăn drei srăng thâo kral jih jang klei blŭ mơ̆ng Satan jing klei luar klei mplư, čiăng weh đuê̆ kbưi.
Hŏng si hdră êlan drei thâo kral mnêč yang jhat yua čiăng mplư drei?
Wah lač: Ơ Khua Yang, yang jhat dôk kăp lua leh anăn duah êlan čiăng ktŭng kâo đuê̆ kbưi mơ̆ng Ih leh anăn mơ̆ng hdră jăk Ih. Akâo Khua Yang đru kâo thâo kral djăl pral mtam mnêč pô jhat ƀai, čiăng kơ kâo djă păn kjăp kơ Khua Yang leh anăn đăo knang khut khat kơ Khua Yang. Đăm lui kâo lĕ hlăm klei mplư ôh, ƀiădah bi mtlaih kâo mơ̆ng klei jhat ƀai, kyua klei guh kơang Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 69
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
