Yakơ 3:7-12
“… Lăm jơhngơ̆m đon bơ̆n thoi yơ, bơ̆n kư̆m gô pơma thoi ei.” (Luka 6:45b)
Nơ̆r jet tơchĕng pơwao:
– Yakơ bơtho tơ’bôh ‘bơ̆r kon bơngai gơh gơ̆t thoi yơ?
– Dôm lu nơ̆r thoi rup đei pơma pơtih gia trong 11-12 roi tơbăt lĕch nơ̆r pơma thoi yơ?
– Pơm thoi yơ bơ̆n gơh gơ̆t nơ̆r pơma?
‘Bơ̆r dah nơ̆r pơma kon bơngai bơ̆n gơh pơjing tơiung dah pơrăm bơngai nai, tơgŭm dah pơjăm pơjuă đe, pơma pơhiôk dah pơm kơ đe sơ’ngon, pơrih đe dah pơlôch. Kơlih kơ thoi noh tơdrong gĭt kăl ‘noh bơ̆n athei gơh gơ̆t ‘bơ̆r bơ̆n lăm âu, Yakơ tơblang gơh gơ̆t ‘bơ̆r bơ̆n noh ưh kơ ‘bônh ôh. Đĭ đăng sem dơrong, đơ̆ng kơpal plĕnh dah tơ lăm đak dơsĭ dah tơ ala teh âu. Mă tơ bri brah tơ yơ yơ hĭ kon bơngai oei gơh pơgơ̆r, mălei kon bơngai ưh kơ gơh gơ̆t ‘bơ̆r bơ̆n kơdih (trong 7-8). Đei lơ hla bơar đe chih roi, tơdrong hŏk pơhrăm, mălei kon bơngai ưh kơ gơh gơ̆t kĕ ĕnh nơ̆r pơma. Yua kơ tơdrong hmă sư ưh kơ pơma kơ ‘bơ̆r dah hơpiĕt đĕch ôh, mălei pơma kơ lăm jơhngơ̆m bơ̆n.
Lăm ‘bar trong 11-12, ‘bok Yakơ yua rup pơtih gia kơ tu đak păng plei hơmu wă pơdah mă rơđah kơ tơdrong noh. Lăm teh đak âu minh tu đak ưh kơ gơh lĕch đak hlăng ‘lơ̆ng, dah đak tăng dah ‘băt ‘ngam, ‘long hơra ưh kơ đei pơjing plei hơmu. ‘Bôh rơđah hơđăl tơpă đơ̆ng gah lăm thoi yơ na ‘bôh gah ‘nguaih thoi noh tơpă. Wă khan nơ̆r pơma noh tơ’bôh đơ̆ng lăm jơhngơ̆m. Kră Yang Yêsu đei bơtho bu đei jơhngơ̆m đon kơnê̆, sư kư̆m pơma kơnê̆ mơ̆n (Luka 6:45).
Kơlih kơ thoi noh, na tơdrong âu ưh kơ trŏ khan pơm thoi yơ lu bơ̆n gơh gơ̆t ‘bơ̆r pơma bơ̆n mălei bơ̆n athei bơwei jơhngơ̆m lu bơ̆n mă ‘lơ̆ng tơpăt, na Kră Yang lăp đon! Pơtih gia thoi Djrang hăm gơh tơplih sŏk brông lu sư, ưh kơ đei lăm lu bơ̆n gơh tơplih jơhngơ̆m kơdih (Jêrêmi 13:23). Dôm tơdrong adrin kon bơngai bơ̆n đei ‘bơm gah ‘nguaih đĕch păng ưh kơ đei yua đunh ôh. Bơnê kơ Kră Yang yua kơ mưh kon bơngai tơ’bơ̆p tơdrong pơmat lei na ưh kơ đei tơdrong kiơ mă Kră Yang ưh kơ gơh pơm. Kră Yang pơkă hăm kon pơlei Sư: “Inh gô ăn kơ iĕm jơhngơ̆m ‘nao păng ăn Yang Bơhngol ‘Lơ̆ng ‘nao tơ lăm lu iĕm.” (Êsêkiên 36:26). Yua kơ tơdrong ‘mêm ăn đĕch păng tơdrong mơsêh Kră Yang, kơplah lui sơng iŏk Kră Yang lu bơ̆n jing bơngai ‘nao. Mă khan lei ră, ưh kơ trŏ đơ̆ng rŏng kơ bơ̆n lui bơih na lu bơ̆n ưh pă yoch pơma kơnê̆ bơih. Yua kơ lu bơ̆n oei arih gah sĕch akar rơdu tơpă, lu bơ̆n oei pơm tơdrong kơnê̆ đĕch. Mălei dah lu bơ̆n pơjao kơ Yang Bơhngol pơgơ̆r, lei lu bơ̆n gô ‘bôh mơ̆n tơdrong mơsêh Kră Yang gô tơplih bơ̆n rim năr. Dah ưh, lei lu bơ̆n gô “lăp pôm ‘bơ̆r đĕch băt kơ ưang kơ ‘Bok Kei-Dei, băt kơ blei hiap bôl buăl” (trong 10 BTTHĐ). Apinh Kră Yang tơgŭm ăn kơ bơ̆n ling lang chu Kră Yang wă kơ nơ̆r pơma bơ̆n đei yua păng gơh tơiung bơngai nai dơ̆ng.
Ơ Kră Yang, inh băt inh oei rơdu tơpă lăm ‘bơ̆r pơma tam mă kĕ ĕnh gơ̆t. Oei lơ wơ̆t inh pơma pơm kơ bôl buăl glăi. Apinh Yang Bơhngol ‘Lơ̆ng Ih oei pơgơ̆r lăm inh, tơplih inh rim năr, wă kơ nơ̆r pơma inh tơ’bôh đei Ih oei hơdai. Krao khan yua anăn Kră Yang Yêsu Krist, Amen.
Dôm nơ̆r bơ̆n pơma tơ’bôh jơhngơ̆m bơ̆n thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Các Vua 18
Kênh Youtube BHKTHN:
