Gĭr Tŭ Hlăm Êlan Myang Tui Hlue Khua Yang ​- 1/5/2021​​

1654

Klei Aê Diê Blŭ: Hêbrơ 12:1-3

Êlan kliăng: brei drei êran hŏng klei gĭr hlăm klei êran arăng pŏk leh kơ drei, 2 êjai dlăng kơ Yêsu, Pô khua leh anăn Pô bi klă klei đăo drei(Hêbrơ 12:1c-2a)

Klei êmuh ksiêm mĭn: Ya mta klei pô čih hră Hêbrơ mtă brei drei ngă hĕ hlăm klei êran? Ya mta klei bi hmô brei drei bi mĭn čiăng tui hlue hlăm êlan klei đăo drei? Hdĭp gĭr tŭ hlăm jih êlan myang tui hluê Khua Yang, ya mta klei srăng đru drei?

Hlăm Klei Aê Diê Blŭ Klei Bi Mguôp Mrâo, lu bliư̆ khua ƀĭng kna Y-Pôl bi msĕ klei hdĭp phung đăo hŏng klei êran klei hdĭp myang (I Kôrantô 9:24; II Y-Timôthê 4:7; Philip 3:13-14; Galati 5:7). Tinei, pô čih hră Hêbrơ mtă mtăn kơ phung anak Aê Diê dŭm mta klei brei ngă hĕ tơdah mŭt hlăm kdrăn êran klei hdĭp myang anei (êlan 1). Sa hlăm dŭm mta klei anăn jing brei “êran hŏng klei gĭr hlăm klei êran…” Hlăm jih êlan êran, sĭt nik grăp čô drei srăng tlă anăp hŏng lu mta klei dleh dlan, klei lông dlăng leh anăn amâo kƀah ôh klei ƀuah ăl, bi kdơ̆ng…, knhuah bi êdah brei drei bi mâo hĕ čiăng dưi gĭr tơl truh kơanôk bi kčah, anăn yơh jing klei gĭr tŭ.

Boh blŭ “gĭr tŭ” hlăm klei blŭ hluôm klei Grek jing makrothymiamblang msĕ si gĭr ai tiê tŭ klei dleh knap hŏng klei luă gŭ amâo blŭ dŭñ dŭñ ôh. “Ư̆ ăn” ăt jing klei bi êdah knuih knhiêng thâo gĭr leh anăn luă gŭ mơh. Mnuih dưi ư̆ jing mnuih amâo ruăt kuăt bi kdơ̆ng wĭt hŏng ai tiê hlơr krêñ hŏng pô mkăn ôh ƀiădah thâo krơ̆ng klei bluh ai pô čiăng dưi mâo klei lŏ kdơ̆ng wĭt djŏ găl, djŏ mmông, djŏ anôk. Anak mnuih khăng khăp blŭ hĭn kơ khăp hmư̆, leh anăn kreh ruăt kuăt bi kdơ̆ng wĭt hlăm djăp mta klei, kyuanăn yơh khăng mâo klei bi mneh msao tơdah drei amâo dưi “gĭr tŭ”. Aê Diê hrih mjing drei mâo dua ƀăng knga ƀiădah mâo knŏng sa ƀăng êgei čiăng kơ drei hmư̆ lu hĭn kơ blŭ. Y-Yakơ mtă msĕ mơh: brei jih jang mnuih djăl hmư̆, amâo ruăt blŭ, amâo djăl ăl” (Y-Yakơ 1:19). Mnuih mâo knuih “gĭr tŭ” jing mnuih mđing hmư̆ pô mkăn hŏng klei thâo răng êlâo kơ lŏ kdơ̆ng wĭt tui si klei bluh ai.

Pô čih hră Hêbrơ ăt ktrâo mơh kơ drei rup bi hmô, Khua Yang Yêsu Pô Bi Mtlaih gĭr tŭ klei knap mñai čiăng kơ drei nanao yơh dlăng kơ Yêsu, Pô khua leh anăn Pô bi klă klei đăo drei (êlan 2). Khua Yang pô yơh Kyua klei mơak pioh leh ti anăp Ñu, Ñu tŭ klei knap mñai ti kyâo bi kal, tŭ klei hêñ čiăng dưi bi leh bruă jao ti lăn ala anei leh anăn ară anei dôk gŭ leh tĭng hnuă kơ jhưng mtao Aê Diê.Brei drei bi mĭn yơh kơ Khua Yang jing phŭn klei mtrŭt leh anăn klei bi mđĭ ai čiăng kơ drei đăm êgah êmăn êdu ai hlăm klei êran klei hdĭp myang drei (êlan 3).

Klei gĭr tŭ hlăm jih êlan myang tui hluê Khua Yang srăng đru drei kjăp ai tiê tơl truh kơ anôk bi kčah. Wăt tơdah ya klei truh dưn, brei drei ăt hdơr klei pô čih hră Y-Yakơ mtă mtăn: Ơ phung ayŏng amai adei, tơdah diih tuôm hŏng klei lông dlăng lu mta, brei diih yap klei anăn jing klei hơ̆k mơak sơăi. Kyuadah diih thâo leh klei lông dlăng kơ klei diih đăo mjing klei gĭr. Brei klei gĭr bi leh sĭt nik bruă ñu, čiăng kơ diih jing prŏng khue, klă ênŭm, amâo kƀah sa klei ôh.(Y-Yakơ 1:2-4).

Hlăm êlan myang tui hluê Khua Yang, diih dôk tui dlăng kơ Khua Yang amâo dah kơ ya mta klei?

Ơ Khua Yang, akâo kơ Ih đru kâo nanao dlăng kơ Ih, Pô khua leh anăn Pô bi klă klei đăo hlăm jih êlan klei hdĭp myang čiăng kơ kâo dưi gĭr tŭ leh anăn kjăp ai tiê tui tiŏ klei êran myang tơl knhal tuč.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Bài trướcNhịn Nhục Trong Linh Trình Theo Chúa – 1/5/2021
Bài tiếp theoBồi Linh – Thông Công Thanh Thiếu Niên Tin Lành Tỉnh Đồng Tháp