Klei Aê Diê Blŭ: I Têsalônik 5:14-15
Êlan kliăng: “Ơ phung ayŏng adei, hmei mtrŭt diih brei diih ƀuah mkra phung bi rŭng, bi mđĭ ai phung êdu ai, đru phung awăt, leh anăn gĭr hŏng jih jang diñu. Răng bĕ, đăm brei sa čô hlăm phung diih bi wĭt klei jhat kơ klei jhat arăng, ƀiădah tui duah nanao čiăng ngă klei jăk hdơ̆ng diih leh anăn kơ jih jang mnuih” (I Têsalônik 5:14-15)
Klei êmuh ksiêm mĭn: Si Khua ƀĭng kna Y-Pôl mtô klei blŭ hrăm hŏng phung mdê mdê hlăm Sang Aê Diê? Boh blŭ “ƀiădah” leh anăn “mtrŭt” hlăm êlan 14 mñă kơ ya klei? Ya klei drei srăng thâo tơdah hlue ngă klei Khua ƀĭng kna Y-Pôl mtô?
Phung Sang Aê Diê jing sa êpul êya ayŏng adei sa klei đăo ƀiădah mâo lu phung mdê mdê leh anăn knuih mdê mdê. Khua ƀĭng kna Y-Pôl mtô kơ phung đăo Têsalônik kơ hdră bi blŭ hrăm hŏng grăp čô hlăm Phung Sang Aê Diê. Mâo tlâo phung mnuih dưi lač tinei, “phung bi rŭng” lač kơ phung hdĭp amâo mâo knuih mjuăt pô amâo mâo klei bhiăn, khăng kŏ, alah; “phung êdu ai” lač kơ phung blao ñŭt huĭ, amâo jhŏng bi kdơ̆ng hŏng klei arăng ngă jhat; “phung êdu awăt” lač kơ phung awăt hlăm klei đăo. Klă klơ̆ng, hŏng phung mâo knuih hdĭp soh wê snăn brei “ƀuah mkra”. Boh blŭ “ƀuah mkra” tinei amâo djŏ jing phat kđi ôh, ƀuah ăl amâodah arưp aram msĕ si sa čô khua ôh ƀiădah jing êdu êun mtô bi hriăm hŏng klei khăp hlăm Khua Yang. Hŏng phung dôk êdu ai, êdu awăt snăn amâo lui digơ̆ ôh ƀiădah brei jih ai tiê bi juh, bi mđĭ ai čiăng kơ digơ̆ lŏ mâo klei ktang, kgŭ dơ̆ng lŏ hdĭp kpă ênô leh anăn mă bruă Khua Yang.
Boh blŭ “Ƀiădah” mphŭn pŏk êlan 14, mñă kơ phung đăo Têsalônik mđing hŏng phung mâo klei dôk dơ̆ng ƀơ̆ng huă soh snăn amâo dưi dôk ñăt kriêp ôh lŏ dơ̆ng rông ba dŭm “klei soh” diñu, ƀiădah brei mtô mjuăt, đru diñu. Boh blŭ “mtrŭt” hlăm klei Grĕk mâo boh blŭ phŭn mơ̆ng boh hră “dôk ti djiêo”. Khua ƀĭng kna Y-Pôl mtrŭt phung đăo kjăp brei ƀuh bruă klam jĕ giăm, siă suôr hŏng ayŏng adei čiăng bi đru hriê kơ prŏng hlăm Khua Yang. Anei jing bruă klam mơ̆ng grăp čô phung ƀuôn sang Aê Diê kyua jih jang drei mâo klei bi mguôp mbĭt msĕ si klei bi mguôp jơ̆ng kngan hlăm sa asei mlei.
Wăt tơdah snăn dưn phung ƀuôn sang Aê Diê amâo dưi mâo ôh klei bi rŭ ênua hdơ̆ng pô ƀiădah brei mâo ai tiê thâo gĭr hŏng jih jang mnuih, “ƀiădah tui duah nanao čiăng ngă klei jăk hdơ̆ng diih leh anăn kơ jih jang mnuih” (êlan 15b).
Čiăng kơ Phung Sang Aê Diê dưi hriê kơ prŏng ktang amâo djŏ knŏng mđing mđĭ kyar kơ ênoh lu ôh, ƀiădah brei mđing rŭ mdơ̆ng ai tiê bi khăp, mđing hdơ̆ng pô čiăng bi đru kjăp hĭn hlăm klei đăo, bi mkŏ mjing klei bi mguôp kjăp čiăng grăp hruê msĕ Khua Yang hĭn. Tơdah grăp čô drei hlue ngă klei Khua ƀĭng kna Y-Pôl mtô, Aê Diê srăng đru drei grăp knhuang dưi truh kơ sa klei hdĭp doh jăk, thâo klei jăk mơak hlăm klei jing anak mơ̆ng Pô khăp hơiêng.
Si klei bi mguôp drei hŏng grăp čô mnuih hlăm Sang Aê Diê?
Wah lač: Ơ Aê Diê! Bi mni kơ Ih kyua Klei Ih Blŭ ktrâo lač kơ kâo truh kơ klei hdĭp doh jăk, jăk mơak. Akâo kơ Ih đru kâo gưt djăp klei mtô hlăm Klei Aê Diê Blŭ, thâo mđing uêñ, bi đru hdơ̆ng pô čiăng đru mkŏ mjing klei đăo hdơ̆ng pô hlăm klei khăp Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
