1Thexalaunikes 5:14-15
Nqe cim
“Cov kwvtij, peb qhia nej hais tias nej yuav tsum ntuas tus neeg tubnkeeg, thiab txhawb tus uas tsis muaj lub siab tawv, pab tus uas qaug zog thiab ua siab ntev rau sawvdaws. Nej ib tug tsis txhob ua phem pauj ib tug, tiamsis nej ib tug yuav tsum ua zoo rau ib tug thiab ua zoo rau sawvdaws. Nej yuav tsum niaj hnub zoo siab.” (1Thexalaunikes 5:14).
Lus nug rau sawvdaws xav:
– Timthawj Paulus qhia haukev yuavtsum muaj tus cwjpwm li cas rau txhua pab neeg nyob rau hauv Pawg Ntseeg?
– Lolus “tiamsis” thiab “thov” hauv nqe 14 hais meej txog dab tsi?
– Thaum uas ua raws li Paulus tej lus ntuas peb yuav paub txog yam dabtsi?
Pawg Ntseeg yog ib cov kwvtij koom ib txoj kev ntseeg tiamsis muaj ntau pab neeg thiab ntau tus cwjpwm sib txawv nyob ua ke. Timthawj Paulus thiaj qhia cov ntseeg hauv Thexalaunikes haukev yuavtsum muaj tus cwjpwm li cas rau txhua pab neeg hauv Pawg Ntseeg. Hauv no muaj 3 pab neeg, “tus neeg tubnkeeg”, yog tus neeg ua dog ua dig tsis nyoog cai, “tus uas tsis muaj lub siab tawv” yog tus neeg siab yau tsis kam tiv kev txomnyem, “tus uas qaug zog” yog tus uas tsawg kev ntseeg. Cov uas ua neej li no yuavtsum “ntuas” lawv. Lolus “ntuas” ntawm no tsis yog txiav txim, hais phem lossis hem tiamsis muaj lub ntsiab hais tias cov ua thawj lawm yuavtsum ntuas los ntawm lub siab hlub, hais tej lus mos lus muag txhawb cov neeg ntawd. Tus neeg uas tsis muaj lub siab tawv thiab tus neeg uas qaug zog tsis txhob tso lawv tseg, tiamsis yuavtsum nplig lawv siab txhawb lawv lub zog kom lawv rov muaj zog thiab sawv khov kho rau kev ncaj ncees ua Vajtswv haujlwm.
Lolus “cov kwvtij” qhib thawj rau hauv nqe 14, yog ntuas cov ntseeg hauv Thexalaunikes kom lawv saib pom tus neeg ua dog ua dig tsis nyoog cai thiab tsis txhob nyob ntsiag to cia rau lawv ua dog ua dig ntxiv, tiamsis yuavtsum ntuas thiab pab lawv. Lolus “peb qhia” hauv lus Kilis yog “tuaj nyob ib sab”. Timthawj Paulus txhawb cov ntseeg yuavtsum sawv khov kho rau yus feem xyuam uas yog yuavtsum nyob ze, nyob nrog txhua tus thiaj sib pab tau kom loj hlob rau hauv tus Tswv. Ntawm no yog txhua tus ntseeg feem xyuam, vim peb ib tug cheemtsum ib tug ib yam li tej tes taws hauv ib lub cev.
Txawm yog muaj qhov tsis zoo los ib tug tsis txhob ua phem pauj ib tug, tiamsis yuavtsum ua siab ntev rau txhua tus li Vajtswv Txojlus hais tias “Nej ib tug tsis txhob ua phem pauj ib tug, tiamsis nej ib tug yuav tsum ua zoo rau ib tug thiab ua zoo rau sawvdaws” (nqe 15b).
Yog yuav cia kom pawg ntseeg loj hlob muaj zog, tsis yog pab kom pawg ntseeg muaj neeg coob tuaj xwb, tiamsis yuavtsum pab cov ntseeg txhua tus kom muaj lub siab txawj sib hlub sib pab rau hauv kev ntseeg, muaj kev sib raug zoo thiab ib hnub ntxiv mus muaj lub neej zoo li Tswv Yexus zuj zus. Yog peb ua raws li timthawj Paulus tej lus qhia lawm peb yuav maj mam muaj lub neej zoo zuj zus thiab yuav pom Vajtswv koob hmoov rau tus uas yog Vajtswv Tus muaj kev hlub menyuam.
Thov Vajtswv,
Vajtswv, nyuam yaus ua Koj tsaug vim Koj Txojlus qhia nyuam yaus ua tau lub neej zoo, tau koob hmoov. Thov pab nyuam yaus mloog li Koj tej lus qhia, kom paub nrog Vajtswv pawg ntseeg nyob uake sib hlub, sib pab, sib txhawb kev ntseeg rau hauv tus Tswv txoj kev hlub. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb txhua tus txoj kev sib hlub, sib pab hauv Pawg Ntseeg zoo li cas?
Nyeem Vajluskub hauv peb lub xyoos: Mathais 21
Kênh Youtube BHKTHN:
