Klei Aê Diê Blŭ: I Y‑Pêtrôs 3:16
Êlan kliăng: “Ƀiădah brei diih lŏ wĭt lač hŏng klei êdu leh anăn hŏng klei mpŭ. Brei diih djă pioh ai tiê kpă jăk, čiăng kơ tơdah arăng dlao wač kơ diih, phung mčeh kơ klei diih dôk dơ̆ng ƀơ̆ng huă jăk hlăm Krist srăng mâo klei hêñ.” (I Y‑Pêtrôs 3:16)
Klei êmuh ksiêm mĭn: Ya jing ai tiê kpă (dlăng thiăm Rôm 2:14-15)? Si ngă čiăng mâo ai tiê kpă jăk? Ya klei tŭ dưn mâo mơ̆ng ai tiê kpă jăk tơdah tlă anăp hŏng klei arăng ngă jhat, klei dleh dlan kyua hdĭp hưn bi sĭt kơ Khua Yang?
“Ai tiê kpă” hlăm klei Latin jing “conscientia”. “con” mblang jing “hrăm mbĭt”, leh anăn “scientia” mblang jing “thâo săng”. Snăn, ai tiê kpă jing klei thâo săng hlăm lam ai tiê drei, čiăng kơ drei “thâo săng hrăm mbĭt” pioh bi mni amâodah mplĕ kđi klei soh kơ bruă drei ngă. Klei anei Khua ƀĭng kna Y‑Pôl mblang tơdah lač kơ klei phat kđi kơ “phung tue”, jing phung mnuih “amâo mâo klei bhiăn” (Rôm 2:14-15). Brei mđing snei, ai tiê kpă amâo dưi yap knar msĕ hŏng klei blŭ mơ̆ng Aê Diê ôh, wăt klei bhiăn knhuah kpă, ƀiădah drei amâo dưi lui hĕ ôh klei blŭ mơ̆ng ai tiê kpă leh anăn amâo bi kmhal ôh (I Y‑Timôthê 1:19).
Pô mblang Klei Aê Diê Blŭ Warren W. Wiersbe mâo sa klei mblang mơak, lač kơ ai tiê kpă hlăm hdruôm hră Be Hopeful msĕ snei: “Ai tiê kpă dưi bi hmô msĕ si sa boh ƀăng bhă điêt mă tŭ klei mngač klei sĭt nik mơ̆ng Aê Diê. Tơdah drei amâo gưt asăp ôh, ƀăng bhă điêt anăn srăng mâo ƀruih lăn guôm ƀrư̆ hruê ƀrư̆ lu hĭn tơl klei mngač mtrang amâo dưi lŏ kma mŭt ôh. Klei anei atăt truh kơ ‘ai tiê kpă čhŏ jhat leh’ (Y‑Tit 1:15)”. Blŭ tui si Wiersbe, ai tiê kpă hlue jing tui si “klei mngač mtrang hlăm ƀăng bhă điêt”. Čiăng dưi mâo sa “ai tiê kpă jăk”, drei čiăng mâo lu “klei mngač” mơ̆ng Klei Aê Diê Blŭ mtrang hlăm ƀăng bhă điêt ai tiê drei. Čiăng dưi msĕ snăn, brei drei kriăng hriăm leh anăn gưt ngă tui si Klei Aê Diê Blŭ. Ktang giăm hĭn hŏng Klei Aê Diê Blŭ, drei srăng thâo săng hĭn klei Aê Diê čiăng, ai tiê kpă drei srăng hmăr thâo kral klei jăk leh anăn klei jhat. Hĭn mơh, brei drei bi hriăm mjuăt drei pô čiăng djă pioh ai tiê kpă drei jing ktang leh anăn doh êngeh, msĕ si klei Khua ƀĭng kna Y‑Pôl blŭ mgang ñu pô ti anăp khua phat kđi Phêlik (Bruă Phung Khua Ƀĭng Kna 24:15-16). Brei djă pioh ai tiê doh êngeh nanao, mgaih mkra hĕ klei soh, hưn klei soh hŏng Khua Yang mtam tơdah ngă soh, msĕ si ƀăng bhă điêt sut bi doh jêñ jêñ čiăng dưi mă tŭ jăk klei mngač.
Si ngă êlan hdră Mâo Ai Tiê Kpă Jăk đru drei găn jih klei lông dlăng êjai hưn bi sĭt kơ Khua Yang Yêsu? Kyuadah sa ai tiê kpă jăk đru drei mâo klei jhŏng hĭn, thâo kơ drei pô dôk kpă ênuah ti anăp Aê Diê leh anăn mnuih mkăn, đru drei mâo klei êđăp ênang hlăm ai tiê, čiăng đăm tuôm hŏng klei rŭng răng, bi blah hlăm lam ai tiê, amâo mđing uêñ kơ “arăng [mnuih amâo đăo] blŭ êkŭt” ôh, boh nik hlăm ênuk lu mta mnơ̆ng yua bi mđung asăp mđung rup hlăk dôk mjhua đei. Akâo kơ Khua Yang brei drei djă pioh nanao ai tiê kpă doh êngeh, čiăng đru drei găn jih klei lông dlăng êjai hưn bi sĭt kơ Khua Yang.
Si ngă drei djă pioh nanao mơ̆ ai tiê kpă doh êngeh, čiăng dưi jing pô hưn bi sĭt tŭ dưn kơ Khua Yang?
Wah lač: Ơ Khua Yang, bi mni kơ Ih brei Yang Mngăt Jăk kiă kriê klei hdĭp kâo, leh anăn Klei Aê Diê Blŭ jing Klei Sĭt Nik atăt gai kâo. Akâo Yang Mngăt Jăk yua Klei Aê Diê Blŭ mtrang mngač ai tiê leh anăn klei mĭn kâo, čiăng mjing hlăm kâo sa ai tiê kpă jăk, hŏng klei anăn kâo dưi hưn bi sĭt tŭ dưn kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
