Klei Aê Diê Blŭ: I Klei Yăl Dliê 29:26-30
Êlan kliăng: “Leh anăn ñu djiê mduôn jŏk, mâo klei mdrŏng, mâo klei mpŭ; leh anăn Y-Salômôn anak êkei ñu kiă kriê čuê ñu.” (I Klei Yăl Dliê 29:28).
Klei êmuh ksiêm mĭn: Mtao Y-Đawit kiă kriê Israel hlăm dŭm thŭn? Klei hdĭp ñu dưi čih yap si jing? Dua klei hdĭp mdê mdê mơ̆ng Mtao Y-Sôl leh anăn Mtao Y-Đawit mâo klei knhal tuč si ngă? Ya klei hriăm mñă kơ phung drei?
Leh lač kơ klei đĭ ngă mtao leh anăn klei jăk mơ̆ng Aê Diê brei kơ Mtao Y-Salômôn, dŭm pruê̆ knhal tuč hlăm hră I Klei Yăl Dliê klah čŭn kơ klei hdĭp leh anăn klei kiă kriê mơ̆ng Mtao Y-Đawit. Ñu kiă kriê jih jang mâo 40 thŭn, hlăm anăn mâo 7 thŭn ti Hêbron leh anăn 30 thŭn ti Yêrusalem. Knhal tuč klei hdĭp ñu jing djiê kyua thŭn khua, jăk mơak kơ klei hdĭp pô, mâo Aê Diê brei klei mdrŏng sah leh anăn klei drưh kơang, mâo anak êkei čuê čiăng lŏ dơ̆ng ngă bruă leh anăn boh nik rŭ mdơ̆ng Sang yang kơ Aê Diê. Klei knhal tuč anei dưi čih klah čŭn hlăm I Klei Yăl Dliê 29:28, ƀiădah anei jing klei knhal tuč khăng ƀuh hlăm Klei Mguôp Hđăp kơ klei hdĭp phung hdĭp sĭt suôr hŏng Aê Diê. Msĕ si Y-Abraham hlăm Klei Aê Diê Blŭ čih “djiê mduôn jŏk, sa čô mduôn snăk”, leh djiê dua čô anak êkei ñu ba dơr hlăm ƀăng čư̆ (Klei Mphŭn dơ̆ng 25:8-9); leh anăn Y-Yôp ăt dưi thâo jing djiê “mduôn jŏk” leh anăn ƀuh anak čô pô tơl truh pă ênuk (Y-Yôp 42:16-17).
Klei djiê leh anăn klei jăk mơak mơ̆ng Mtao Y-Đawit tinei mdê hŏng klei djiê knap mñai mơ̆ng Mtao Y-Sôl. Mtao hŏng tlâo čô anak êkei djiê ti čŏng čư̆ Gilbôa hlăm sa lei bi blah. Phung Philistin “plah mă mnơ̆ng gơ̆, mă ba boh kŏ gơ̆…” (I Klei Yăl Dliê 10:9a. Mtao Y-Sôl djiê kyua klei ñu ngă soh leh hŏng Yêhôwa “ñu amâo djă pioh ôh klei Yêhôwa mtă…leh anăn amâo duah klei kčĕ mơ̆ng Yêhôwa ôh…” (I Klei Yăl Dliê 10:13-14).
Ya klei ngă kơ Mtao Y-Đawit mâo klei Aê Diê hơêč hmưi wăt dôk hdĭp leh anăn djiê snăn? Hlăm hdruôm hră I Klei Yăl Dliê lu bliư̆ brei ƀuh Mtao Y-Đawit jih ai tiê khăp leh anăn mă bruă kơ Khua Yang. Êngao anăn, Aê Diê lŏ iêu kơ Mtao Y-Đawit jing “pô djă pioh leh klei kâo mtă, leh anăn tui hlue leh kâo hŏng jih ai tiê ñu” (I Bruă Mtao 14:8). Khua ƀĭng kna Y-Pôl ăt brei thâo “Mtao Y-Đawit hlăk dôk hdĭp, mă bruă tui si klei Aê Diê čiăng” (Bruă Phung Khua Ƀĭng Kna 13:36). Khă gơ̆ ñu ngă soh hŏng Aê Diê ƀiădah hlăm Klei Mmuñ Hđăp 51, drei thâo ñu jih ai tiê kmhal anăn Aê Diê pap brei. Kyua klei hdĭp gưt asăp, jih ai tiê tui hluê Khua Yang leh anăn mă bruă kơ Khua Yang mơ̆ng Mtao Y-Đawit anăn ñu dưi mâo klei hơêč hmưi msĕ snăn.
Mơ̆ng anăn drei ƀuh dua klei hdĭp mdê mdê ba klei knhal tuč mdê mdê. Klei hdĭp mơ̆ng mnuh sĭt suôr hŏng Aê Diê, jih ai tiê tui hluê Khua Yang leh anăn mă bruă kơ Ñu ba klei tŭ mâo klei hơêč hmưi êjai dôk hdĭp leh anăn djiê. Klei hdĭp mơ̆ng phung amâo gưt asăp Aê Diê, amâo duah klei Aê Diê kčĕ čiăng tui hlue ngă kơ pô anăn luč jih jang.
Ya klei hdĭp drei dôk ruah ară anei?
Ơ Khua Yang, akâo kơ Ih brei kơ kâo sa klei hdĭp gưt asăp Aê Diê, jih ai tiê sĭt suôr mă bruă kơ Ih čiăng kâo amâo bi luč ôh klei Ih hơêc hmưi êjai dôk hdĭp wăt sĭt djiê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 17:1-18:7
Kênh Youtube BHKTHN:
