Klei Aê Diê Blŭ: Y‑Yêrêmi 29:24-32
Êlan kliăng: “Brei ih dôk kbưi hŏng klei kčŭt mčeh, leh anăn đăm bi mdjiê ôh phung ênuah ênô leh anăn phung kpă, kyuadah kâo amâo srăng yap kpă ôh mnuih ƀai” (Klei Kbiă 23:7).
Klei êmuh ksiêm mĭn: Hlei pô jing Y‑Sêmaya? Ya klei ñu ngă leh kơ phung ƀuôn sang Israel? Ya klei Yêhôwa lač kơ bruă ñu ngă leh anăn? Si drei ngă čiăng kơ đăm lĕ ôh hlăm klei mplư mơ̆ng phung khua pô hưn êlâo soh?
Y‑Sêmaya jing sa čô khua pô hưn êlâo soh arăng mjing mnă ba ti čar Ƀabilôn hlăm thŭn 597 Êlâo kơ Krist. Klei hưn mthâo hlăm êlan 24 brei ƀuh Y‑Sêmaya dôk ti ƀuôn Nêhêlam. “Nêhêlam” jing sa anôk ala ƀiădah năng ai ăt jing sa hdră êlan Y‑Yêrêmi yua boh blŭ mơh, kyuadah tui si klei blŭ Hêbrơ snăn dua ênai pia êdei hĭn “hêlam” mblang jing “klei êpei” lŏ mñă hlăm êlan 8, čiăng djik djak Y‑Sêmaya jing phung Yêhôwa hưn êlâo leh kơ phung ƀuôn sang brei răng, đăm dôk hmư̆ ôh klei phung mblang klei êpei pliă plia (Y‑Yêrêmi 27:9).
Hlăm klei sĭt, đơ bruă Y‑Sêmaya ngă brei ƀuh leh klă ñu jing sa čô khua pô hưn êlâo soh. Ñu mă anăn ñu pô čih hră mơĭt kơ jih jang phung ƀuôn sang Yêrusalem leh anăn kơ phung khua ngă yang hưn mčeh snei, Aê Diê yơh mjing ñu khua ngă yang brei hrô kơ khua ngă yang Y‑Jêhôida čiăng mâo pô kăp răng kriê Sang Yêhôwa, wăt bi ala kơ Aê Diê ƀuah bi kmhal hlei pô jhŏng hưn mčeh jing khua pô hưn êlâo. Mơ̆ng klei anăn, ñu čih hră ƀuah kơ khua pô hưn êlâo Y‑Yêrêmi gưt leh klei Yêhôwa mtă čih hră kơ phung ƀuôn sang Aê Diê lač snei, “klei arăng mă mđuĕ ih mơ̆ng čar srăng jing sui; mdơ̆ng bĕ pưk sang leh anăn dôk hlăm sang anăn, leh anăn ngă war djam leh anăn ƀơ̆ng djam gơ̆” (êlan 28). Jing dleh kơ Y‑Sêmaya kyuadah khua ngă yang Y‑Sôphôni yơh jing sa čô hlăm phung ñu čih hră mơĭt čiăng kčŭt mčhur, ktŭng kdhăk, dlăng leh jih hră anăn kơ khua pô hưn êlâo Y‑Yêrêmi hmư̆ (êlan 25, 29). Kyua klei Y‑Sêmaya hưn mčeh luar, bi kdơ̆ng ngă kơ phung ƀuôn sang Aê Diê hmư̆ knang kơ klei luar anăn (êlan 31) kyuanăn Yêhôwa hưn klei bi kmhal Y‑Sêmaya leh anăn phung anak čô ñu, srăng suôt diñu đuĕ mơ̆ng phung ƀuôn sang Aê Diê leh anăn amâo srăng ƀuh ôh klei jăk Yêhôwa ngă kơ phung ƀuôn sang Ñu (êlan 32).
Lŏ sa blư̆ dơ̆ng drei tuôm hŏng boh blŭ “Kâo amâo tuôm tiŏ ñu nao ôh” (êlan 31) jing klei Yêhôwa hưn klă hŏng phung amâo jing dŏ Ñu. Năng ai klei Yêhôwa mtă hlăm hră Y‑Yêrêmi čih amâo srăng ba klei mơak kơ phung ƀuôn sang Israel ôh êjai anăn, ƀiădah klei gưt asăp Aê Diê srăng đru diñu ƀuh klei jăk Yêhôwa srăng ngă kơ phung ƀuôn sang Ñu (êlan 32). Khădah snăn, phung khua pô hưn êlâo soh ăt čiăng bi juh phung ƀuôn sang Aê Diê hŏng klei luar, hŏng klei êđăp ênang bhiâo. Kyuanăn, phung ƀuôn sang Aê Diê brei mdih êngal čiăng thâo kral ti jing klei blŭ mơ̆ng Aê Diê leh anăn hlei jing pô Aê Diê yua. Hruê anei, Klei Aê Diê Blŭ brei leh kơ drei klă klơ̆ng leh anăn bŏ ênŭm hlăm hdruôm hră Klei Aê Diê Blŭ. Brei dlăng bĕ, hriăm leh anăn hdĭp tui si Klei Aê Diê Blŭ grăp hruê čiăng đăm lĕ hlăm klei phung khua pô hưn êlâo soh mplư ôh.
Si ngă drei ruah klei tŭ dưn hlŏng lar, amâodah klei jăk hmư̆ bhiâo ti anăp ală?
Wah lač: Ơ Aê Diê Kpă Ênô leh anăn Klei Khăp! Kâo mơak êdimi ƀuh klei Ih kiă kriê răng mgang tloh ênoh pioh kơ phung ƀuôn sang Ih. Akâo kơ Ih đru kâo djă păn kjăp Klei Ih Blŭ, gưt ngă klei Ih mtă čiăng dưi ƀuh klei jăk Ih srăng ngă kơ phung jing dŏ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 13
Kênh Youtube BHKTHN:
