Klei Aê Diê Blŭ: Klei Bi Hriêng 18:22.
Êlan kliăng: “Hlei pô duah mâo mô̆ mâo leh klei jăk, leh anăn mă tŭ klei pap mơ̆ng Yêhôwa.” (Klei Bi Hriêng 18:22)
Klei êmuh ksiêm mĭn: Si klei yuôm bhăn duah ung, duah mô̆? Ya hnơ̆ng čuăn phung đăo duah ung, duah mô̆? Si ngă čiăng kơ drei duah djŏ ung, mô̆ čiăng dưi dưn klei pap Aê Diê?
Dưi mâo sa čô ung jăk, sa čô mô̆ jăk jing klei grăp čô mnuih čang hmăng. Klei bi dôk ung mô̆ hmăi kơ klei jăk mơak jih klei hdĭp anăn grăp čô phung êkei, mniê brei “duah” bi jăk. Bi khăp pral đei, amâodah hlue si phung ti lăn ala srăng atăt truh kơ klei amâo jăk, wiă klei ênguôt hnĭng. Bi tơdah duah djŏ mnuih, srăng dưi dưn klei jăk mơak hlăm klei hdĭp leh anăn dưi dưn klei Aê Diê pap.
Čiăng dưi duah mô̆, ung jăk, phung đăo kơ Krist brei mđing: Tal sa, brei jih ai tiê wah lač êlâo kơ duah. Klei jăk mơak leh anăn klei pap Yêhôwa knŏng brei kơ hlei pô wah lač akâo kơ Aê Diê ktrâo atăt duah mnuih hlue si klei Ñu čiăng. “Arăng dưi dưn sang leh anăn klei mdrŏng mơ̆ng amĭ ama, ƀiădah mô̆ mâo klei thâo săng jing mnơ̆ng Yêhôwa brei” (Klei Bi Hriêng 19:14). Tal dua, brei duah mnuih huĭ mpŭ kơ Aê Diê čiăng kơ ung mô̆ bi đru hdĭp doh jăk, bi mpŭ leh anăn bi khăp. Klei huĭ mpŭ kơ Aê Diê jing hnơ̆ng čuăn yuôm bhăn leh anăn brei dưm yuôm hĭn kơ klei siam kƀăt ti êngao: “Klei kƀăt jing klei mplư, leh anăn klei siam dưi luč; ƀiădah sa čô mniê thâo huĭ mpŭ kơ Yêhôwa srăng mâo klei bi mni” (Klei Bi Hriêng 31:30). Tal tlâo, brei duah mnuih jăk. “Sa mô̆ jăk jing msĕ si đuôn mtao kơ ung ñu, ƀiădah sa mô̆ bi hêñ gơ̆ jing msĕ si iêng ƀơ̆ng klang” (Klei Bi Hriêng 12:4). Klei kƀăt leh anăn ăt luč mơh ƀiădah knuih jăk, siam srăng dôk lă lar. Klei yuôm bhăn brei hdơr jing duah mô̆, dua ung kơ pô ăt jing duah amĭ, duah ama kơ anak pô; duah aduôn, duah aê kơ čô pô. Djuê ana êdei anăp diih jưh hlăm klei pô ruah hruê anei, kyua anăn brei duah leh anăn dôk thâo răng. Mô jăk srăng thâo kriê dlăng kơ gŏ sang trei mđao, duah klei jăk, ba klei mơak kơ ung kơ anak: “Mniê thâo mĭn mdơ̆ng sang ñu, ƀiădah hŏng kngan ñu pô mniê mluk ruh sang ñu” (Klei Bi Hriêng 14:1).
Anak mnuih mâo lu hnơ̆ng čuăn hlăm bruă ruah ung, ruah mô̆. Phung đăo kơ Krist thâo klă ênoh yuôm bhăn Aê Diê brei čiăng duah djŏ. Thâo kral klei thâo mĭn anak mnuih mâo hnơ̆ng kčah, boh nik sĭt khăp, klei khăp khăng hĭn kơ klei mĭn msĕ si arăng khăng lač “khăp hŏng klei mmăt tĭt”. Kyua anăn phung êkei mniê phung đăo kơ Krist brei jih ai tiê tui duah klei Aê Diê čiăng hlăm klei bi dôk ung mô̆. Anak mnuih amâo pô kluôm ênŭm, anăn sĭt duah mô̆, duah ung, đăm drei kčah hnơ̆ng čuăn êgao hnơ̆ng ôh čiăng duah mnuih jăk kluôm ênŭm, ƀiădah klei yuôm bhăn jing brei akâo kơ Aê Diê mtrang mngač čiăng thâo kčah dŭm hnơ̆ng čuăn mđing tal êlâo hlăm bruă mkŏ mjing sa gŏ sang jăk mơak hlăm Aê Diê leh anăn čiăng dưi mâo klei pap mơ̆ng Yêhôwa hlăm klei hdĭp bi dôk ung mô̆.
Si drei dưm klei mđing tal êlâo hlăm bruă ruah ung, ruah mô̆?
Wah lač: Ơ Aê Diê jing Ama hlăm adiê! Akâo kơ Ih brei kơ kâo klei thâo mĭn čiăng duah djŏ ung, mô̆ hlue si hnơ̆ng Ih čuăn. Akâo kơ Ih đru kâo jing mô̆, ung, ba klei jăk mơak kơ pô jing ung, mô̆ kâo leh anăn bi guh kơang Anăn Ih.
Dlăng Klei Aê Diê Blŭ hlăm tlâo thŭn: Y‑Yêrêmi 9:1-22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
