Klei Aê Diê Blŭ: II Klei Yăl Dliê 34:1-3
Êlan kliăng: “Hlăm thŭn tal sa păn ñu kiă kriê, êjai ñu ăt jing sa čô hđeh êdam, ñu dơ̆ng duah Aê Diê Y-Đawit aê ñu” (II Klei Yăl Dliê 34:3a)
Klei êmuh ksiêm mĭn: Hbĭl Mtao Jôsia dơ̆ng tui duah Aê Diê? Ya klei mtao ngă leh anăn si ñu hdĭp tơdah čuăn tui duah Aê Diê? Hruê anei ya klei brei drei ngă čiăng kơ drei pô leh anăn anak čô pô dơ̆ng tui duah Aê Diê?
Mtao Jôsia jing mtao jăk knhal tuč ti ala mtao Yuđa. Ñu kiă kriê tlâo pluh sa thŭn leh anăn mâo Aê Diê yua čiăng ba klei bi êrâo, mkra mlih klei đăo kluôm kơ Yuđa dôk lĕ hlăm klei kkuh kơ rup yang. Leh arăng tlĕ mdjiê Mtao Amôn, Mtao Jôsia đĭ ngă mtao hlăk mrâo spăn thŭn. Ama mtao jing mnuih ngă klei ƀai ti anăp Yêhôwa, ngă yang leh anăn mă bruă kơ rup yang. Aê ñu jing Mtao Manasê ăt jing sa čô mtao ƀai, wăt tơdah knhal tuč klei hdĭp lŏ wĭt kơ Aê Diê ƀiădah ya bruă ƀai Mtao Manasê ngă leh êlâo dih ăt hmăi amâo jăk ôh kơ phung ƀuôn sang.
Amâo tui hlue êlan ama leh anăn aê ôh, Mtao Jôsia ruah êbat hlue êlan Mtao Đawit, aê đưm pô, wăt tơdah aê đưm Đawit hdĭp kbưi hŏng mtao truh pă êtuh thŭn. Tơdah ruah êbat hlue êlan khăp kơ Aê Diê Mtao Đawit snăn Mtao Jôsia ăt hdĭp msĕ si Mtao Đawit, “leh anăn tơdah ih amâo weh kơ hnuă amâodah kơ điâo ôh”, jing mtao hngah kkuh kơ rup yang (Klei Mtô Mñă Klei Bhiăn 28:14) leh anăn knŏng êbat hlăm êlan Aê Diê čiăng pô êbat. Hlăk mrâo pluh năm thŭn, Mtao Jôsia dơ̆ng tui duah Aê Diê, sa klei kčưm dơ̆ng mrâo kơ klei hdĭp myang čiăng êbat hlue êlan Aê Diê, mă bruă leh anăn kkuh mpŭ kơ Ñu hŏng jih ai tiê.
Amâo mâo ôh hlei pô dưi ruah kơ anôk dưi kkiêng hlăm ti gŏ sang amâodah hriê kơ prŏng hlăm si ala ƀuôn. Lu phung đăo kơ Krist mda asei, kkiêng hlăm gŏ sang amâo mâo Aê Diê ôh ƀiădah ăt mâo lu mmông găl čiăng mâo Aê Diê yua, boh nik yua mă bruă prŏng. Phung mâo amĭ kkiêng leh anăn hriê kơ prŏng hlăm gŏ sang huĭ mpŭ snăn knư̆ mâo lu mmông găl hĭn. Wăt tơdah amĭ kkiêng hlăm si gŏ sang, hdĭp hlăm si boh klei, klei yuôm bhăn hĭn jing brei drei čuăn ruah kơ pô êlan tui hlue Yang Krist, tui hlue Aê Diê, hdĭp bi mơak kơ Ñu. Čiăng dưi mâo snăn, brei drei khut khat “amâo weh kơ hnuă amâodah kơ điâo ôh”, amâo ruah hlue si klei bi hmô mơ̆ng phung amâo huĭ mpŭ amâodah phung bi kdơ̆ng hŏng Aê Diê.
Hruê anei, lu phung đăo kơ Aê Diê sui leh ƀiădah drei bi mklă pô dôk tui duah Aê Diê amâodah ka? Akâo kơ Aê Diê brei kơ phung mda asei thâo ba yua mmông găl hđeh điêt mơ̆ng hlăk dôk hđeh, phung hđeh hlăk krah, ăt dưi dơ̆ng tui duah Aê Diê mơ̆ng bruă hriăm Klei Aê Diê Blŭ, hriăm mă bruă kơ Aê Diê mơ̆ng dŭm bruă djŏ guôp kơ phung hđeh. Phung amĭ ama brei tui duah Aê Diê ară anei mtam, leh anăn brei đru kơ anak čô pô dơ̆ng tui duah Aê Diê knư̆ hnưm knư̆ jăk, kyua tơdah amâo ngă snăn phung hđeh srăng kčưm dơ̆ng tui duah klei mơak hlăm klei hdĭp lăn ala.
Drei dôk tui duah Aê Diê amâodah dôk tui duah klei mkăn?
Wah lač: Ơ Khua Yang, akâo kơ Ih đru kâo mâo ai tiê hur har, êpa hmao čiăng tui duah Aê Diê mơ̆ng ară anei, čiăng kơ kâo leh anăn anak čô kâo mâo Aê Diê yua kơ bruă Sang Ih. Kâo wah lač hlăm Anăn Khua Yang Yêsu Krist , Amen.
Dlăng Klei Aê Diê Blŭ hlăm tlâo thŭn: Y-Yêrêmi 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
