II Xwmtxheej 34:1-3
Nqe cim:
“Thaum Yauxiyas ua vajntxwv tau yim xyoo, nws tseem hluas heev, nws pib pehawm nws yawgkoob uas yog Vajntxwv Daviv tus Vajtswv…” (II Xwmtxheej 34:3a)
Lus nug rau sawvdaws xav:
– Vajntxwv Yauxiyas pib nrhiav tus Tswv txij thaum twg?
– Vajntxwv tau ua dabtsi thiab nws lub neej zoo li cas thaum nws txiav txim siab nrhiav tus Tswv?
– Hnub no peb yuav tsum ua dabtsi thiaj pab tau peb thiab peb tej xeebntxwv pib nrhiav tus Tswv?
Vajntxwv Yauxiyas yog tus vajntxwv ua zoo kawg tw ntawm lub tebchaws Yudas. Nws kav tau peb caug ib xyoos thiab tau Vajtswv siv los coj kev txhim kho thiab kev hloov tshiab hauv kev pehawm los rau lub tebchaws Yudas uas twb poob rau hauv kev pe mlom lawm. Tomqab Vajntxwv Amoos raug tua lawm, Vajntxwv Yauxiyas sawv los kav tebchaws thaum nws muaj yim lub xyoo xwb. Nws txiv yog tus uas ua txhaum rau tus Tswv, mus hlawv tsiaj fij thiab pehawm tej mlom. Nws yawg uas yog Vajntxwv Manaxes kuj yog ib tug vajntxwv phem, txawm yog thaum kawg tig rov los cuag tus Tswv, los tej kev phem thaum ub uas Vajntxwv Manaxes ua tseem cuam tshuam phem ntev ntev rau cov pejxeem.
Vajntxwv Yauxiyas tsis taug nws txiv thiab nws yawg txojkev, nws xaiv taug Vajntxwv Daviv uas yog nws yawg koob txojkev, txawm tias Vajntxwv Daviv nyob ua ntej nws txog plaub puas xyoo. Thaum xaiv taug Vajntxwv Daviv txoj kev uas nyiam tus Tswv, ces Vajntxwv Yauxiyas kuj ua neej ib yam li Vajntxwv Daviv thiab, “nws tsis tig mus rau sab xis lossis sab laug” (HMOWSV), txhais hais tias nws tsis kam mus pe tej mlom (II Kevcai 28:14) thiab tsuas taug txojkev uas tus Tswv xav kom nws taug xwb. Thaum muaj kaum rau xyoo, Vajntxwv Yauxiyas pib nrhiav tus Tswv, yog ib qho pib tshiab rau nws lub neej sab ntsujplig los taug tus Tswv txojkev, ua tus Tswv tes haujlwm thiab pehawm Nws kawg lub siab lub ntsws.
Tsis muaj leejtwg xaiv tau tias tus kheej yuav yug rau hauv tsev neeg twg lossis xaiv loj hlob hauv tej tsamthawj zoo li cas. Muaj coob tus ntseeg hluas uas yug hauv tsev neeg tsis ntseeg tus Tswv tiamsis lawv yeej muaj sijhawm tau tus Tswv siv, tseem siv ua tej yam loj thiab tseemceeb. Cov uas yug thiab loj hlob hauv tsev neeg hwm tus Tswv yim muaj ntau sijhawm heev dua thiab. Txawm yuav yug hauv tsev neeg twg, ua neej nyob hauv lub tsamthawj zoo licas los xij, qhov tseemceeb tshaj yog peb yuav tsum txiav txim siab xaiv taug txojkev raws Yexus Khetos qab, kawm Nws tus qauv thiab ua neej haum Vajtswv siab. Yuav ua tau li ntawd, peb yuav tsum tawv qhawv “tsis tig mus rau sab xis lossis sab laug”, tsis xaiv ua raws li cov neeg tsis hwm thiab tawmtsam tus Tswv tus qauv.
Niaj hnub nimno, muaj ntau tus twb ntseeg tus Tswv ntev los lawm, tiamsis tseem tsis tau paub tseeb hais tias lawv puas tabtom nrhiav tus Tswv tiag lawm lossis tsis tau. Thov tus Tswv pab cov hluas paub siv lub sijhawm pib nrhiav tus Tswv tamsim no, thiaj yuav tau tus Tswv siv zoo ib yam li Vajntxwv Yauxiyas. Cov menyuam yaus thaum tseem yau, cov hluas loj hlob tuaj, kuj muaj peevxwm pib nrhiav tus Tswv los ntawm kev kawm Vajtswv Txojlus, kawm ua Vajtswv haujlwm hauv tej haujlwm uas phim rau lawv. Cov niam txiv kuj yuav tsum pib nrhiav tus Tswv nimno mus, thiab yuav tsum pab kom nyias cov menyuam pib nrhiav tus Tswv sai li sai tau, vim yog tsis ua li ntawd mas tej menyuam yuav pib mus nrhiav kev lomzem hauv ntiajteb no zuj zus.
Thov Vajtswv,
Tus Tswv, thov pub nyuam yaus muaj lub siab kub lug, muaj kev nqhis nqhawv nrhiav Koj txij no mus, kom nyuam yaus thiab nyuam yaus tej menyuam tau Koj siv hauv Koj tes haujlwm. Nyuam yaus tuav Yexus Khetos lub npe thov, Amees.
Peb tabtom nrhiav tus Tswv lossis nrhiav yam dabtsi?
Nyeem Vajluskub hauv peb lub xyoos: Yelemis 17
Kênh Youtube BHKTHN:
