II Hơ’mon 20:13-21
Kơkuh kơ lu bơngai mă mơ̆ng,
Năr âu lu bơ̆n gô tơchĕng pơwao ‘bai pơhrăm đei kơ̆l ‘bai: Đon Lui Pơm Kiơ̆ lăng lăm Sơ̆p hla bơar Nơ̆r ‘Bok Kei-Dei II Hơ’mon 20:13-21.
13 Đĭ đăng bơngai Juđa hăm lu kon akăn lu sư dơ̆ng ‘bơ̆t anăp Kră Yang. 14 Kơplah noh, Yang Bơhngol ‘lơ̆ng Kră Yang jur mơ̆t lăm Jahasiêl, kon drŏ-nglo Sachari, sâu Bênaia, sâu i Jêiêl, sâu ach Matania, bơngai Lêwi adrĕch adrung Asap; sư dơ̆ng tŏk-bŏk lu bơngai tơpôl oei akŭm. 15 Sư khan: “Ơ pơtao Jêhôsaphat, bơngai Juđa đơ̆ng jơ̆p pơlei păng kon pơlei oei lăm pơlei Jêrusalem, mơ̆ng bĕ! Kră Yang khan: ‘Lu iĕm ‘nĕ kơ hli, ‘nĕ tơrơ kơ lu linh lơ kơdrâ̆m ‘nâu, yua kơ tơdrong tơblah ‘nâu ưh kơsĭ kơ lu iĕm ôh, ‘nâu kơ Kră Yang ‘Bok Kei-Dei.’ 16 Pơgê dơning jur năm tơblah lu sư; to, lu sư tŏk rok trong kuĕl Sis, lu iĕm gô tơ’bơ̆p lu sư tơ tôch kơ thŭng, lăm tơmăn glă Jeruel. 17 Lu iĕm huay kơ kăl kơ tơblah; săp bĕ, lu linh oei hreh tơ noh, na lăng tơdrong Kră Yang, Tơ’ngla oei hơdai iĕm gô dŏng pơklaih iĕm. Ơ bơngai Juđa păng kon pơlei Jêrusalem ‘nĕ kơ hli ‘nĕ kơ tơrơ. Dơning năm tơ’bơ̆p lu sư bĕ! Kră Yang oei hơdai iĕm.” 18 Jêhôsaphat kŭp kơ̆l drap tơteh; đĭ-đăng bơngai Juđa păng bơngai oei lăm pơlei Jêrusalem kư̆m kŭp kơ̆l drap tơteh ‘bơ̆t anăp Kră Yang păng kơkuh kơ Kră Yang. 19 Lu bơngai Lêwi gah adrĕch Kôhat păng lu adrĕch Kôra lu sư iung dơ̆ng pơma ‘bơ̆r re păng khan bơnê kơkuh kơ Kră Yang ‘Bok Kei-Dei Isơrael. 20 Truh pơgê đơ̆ng rŏng, lu sư iung đơ̆ng hrôih lĕch năm tơ tơmăn glă Têkôa; kơplah lu sư oei yak, Jêhôsaphat dơ̆ng tơ noh, khan: “Ơ lu bơngai Juđa păng kon pơlei oei lăm pơlei Jêrusalem mơ̆ng bĕ inh: Lui gơnang bĕ kơ Kră Yang ‘Bok Kei-Dei lu iĕm, na lu iĕm pran kơjăp; lui bĕ kơ ‘bok khan lê̆ adrol Kră Yang, lei na lu iĕm kĕ jei,” 21 Đang kơ sư đei pơma pơđâu hăm kon pơlei pơla boih, na sư rơih iŏk đei khul hơri wă ư-ang kơ Kră Yang rang rŏ hơri bơnê ư-ang kră Yang ‘lơ̆ng rơgoh rang rŏ, lu sư yak adrol kơ khul linh, ôr khan: “Bơnê bĕ kơ Kră Yang. Tơdrong Sư ‘mêm mơnat oei oei ling lang.”
Trong tơm ‘bai pơhrăm ‘nâu:
“Đang kơ sư đei pơma pơđâu hăm kon pơlei pơla boih, na sư rơih iŏk đei khŭl hơri wă ư-ang kơ Kră Yang rang rŏ hơri bơnê ư-ang kră Yang ‘lơ̆ng rơgoh rang rŏ, lu sư yak adrol kơ khul linh, ôr khan: “Bơnê bĕ kơ Kră Yang. Tơdrong Sư ‘mêm mơnat oei oei ling lang.” (II Hơ’mon 20:21)
Nơ̆r jet tơchĕng pơwao:
– Kră Yang ‘Bok Kei-Dei đei khan kơ kon pơlei pơla tơdrong kiơ?
– Đon lui pơtao Jêhôsaphat hăm kon pơlei pơla lăm Kră Yang đei tơ’bôh thoi yơ?
– Nơ̆r Kră Yang dŏng tơgŭm ih thoi yơ kơplah tơ’bơ̆p tơdrong pơlong lăng?
Kơkuh kơ đĭ đăng,
Đơ̆ng rŏng kơ pơtao Jêhôsaphat krao khan, lu kon pơlei dơ̆ng kơtă anih wă mơ̆ng tơdrong tơl đơ̆ng ‘Bok Kei-Dei (trong 13). ‘nâu jơ̆ tơdrong tơ’bôh đon lui lăm Kră Yang. Păng Kră Yang đei khan kơ lu sư thoi âu “athei mơ̆ng” (trong 15). Kơplah đei tơdrong hli krê, ưh kơ hơđơ̆ng tơdrong kăl kơ pơm noh jơ̆ mơ̆ng nơ̆r Kră Yang. ‘nĕ kơ ăn dôm tơdrong truh dah bơngai nai pơma kơ bơ̆n pơm kơ bơ̆n kơdŭn lăm đon lui, mă lei kăl kơ wih tơ ‘Bok Kei-Dei păng mơ̆ng nơ̆r đơ̆ng Yang Bơhngol ‘Lơ̆ng. Đơ̆ng rŏng kơ ‘noh Kră Yang ‘Bok Kei-Dei đei khan kơ kon pơlei pơla thoi âu: “’Nĕ kơ hli tơrơ”. Kră Yang kŭm đei khan kơ kon pơlei pơla lu bơngai ayăt lơ lap dêh, mă lei lu kon pơlei ưh kơ kăl kơ hli kiơ ôh yua kơ “Kră Yang ‘Bok Kei-Dei oei hơdai hăm lu iĕm” (trong 17). Tơdrong hơnat hli krê dêh tơpă mă lei tơdrong tơgŭm bơ̆n hơđơ̆ng hiôk hoei pă hli noh jơ̆ đei ‘Bok Kei-Dei oei hơdai hăm lu bơ̆n (I Samuel 18:12; Rôma 8:31).
Hloh kơ ‘noh dơ̆ng, ‘Bok Kei-Dei đei khan kơ pơtao Jêhôsaphat thoi âu yua kơ Kră Yang oei hơdai lu sư na tơdrong tơblah ‘nâu tơdrong tơblah hăm ‘Bok Kei-Dei (trong 15). Tơdrong kăl kơ bơ̆n đei kơnhăm kơplah tơbơ̆p tơdrong hơnat noh jơ̆ đei ‘Bok Kei-Dei hăm oei hơdai lu bơ̆n dah ưh. Tơdah đei, lei lu bơ̆n hăm drơ̆ng iŏk lê̆ ‘Bok Kei-Dei tơblah tang lu bơ̆n lăm tơdrong mă bơ̆n wă tơblah lei mă bơ̆n wă tơblah kơdih?
Tơdrong mă ‘Bok Kei-Dei hơtă khan noh jơ̆ hơnat kơ lui dêh yua kơ Kră Yang đei khan kơ pơtao Jêhôsaphat chĕp ba lu linh năm tơblah lu sư kăl kơ oei minh dơnơ̆ng đĕch ưh kơ đei pơm kiơ kăl kơ lu sư lăng tơdrong jang đơ̆ng ‘Bok Kei-Dei (trong 16-17). Mă Lei pơtao Jêhôsaphat păng đĭ đăng kon pơlei đei chu yom yua kơ lu sư hli yom kơ ‘Bok Kei-Dei. Păng tơdrong hlĭch truh kơ jơ’nâu lu linh kư̆m ưh tim mă yak năm, tơdrong blah jei ưh tim mă đei mă lei lu sư kơkuh păng ư-ang kơ ‘Bok Kei-Dei (trong 19). Đơ̆ng rŏng kơ ‘noh wă năm tơblah, pơtao Jêhôsaphat kŭm pơtrŭt kon pơlei pơla kăl kơ lui kơ ‘Bok Kei-Dei, kon pơlei pơla kŭm dai dŏng tơgŭm dih băl lăm tơdrong kơkuh kơ ‘Bok Kei-Dei (trong 20-21). Wă kơ đei đon lui kơjăp kăl kơ đei pêng tơdrong: “athei lui kơ lu bơngai pơtruh nơ̆r ‘Bok Kei-Dei”- Nơ̆r Kră Yang; “Athei ư-ang kơ ‘Bok Kei-Dei, yua kơ tơdrong mơnat Sư ling lang”-Kơkuh kơ Kră Yang; “pơproh lu bơngai ư-ang kơ Kră Yang hrŭk băn ao ‘lơ̆ng rơgoh năm hơdrol kơ lu linh wă tơblah”- dơ̆ng hăm lu kon pơlei pơla Kră Yang, ưh kơ achăng lê̆ lu kon pơlei pơla Kră Yang.
Bĕ bơ̆n pôm jơhngơ̆m đon krao khan ,
Ơ Kră Yang, Inh bơnê kơ Ih yua kơ Ih ling lang oei jê̆ inh. Apinh ăn kơ Inh ling lang mơ̆ng nơ̆r Kră Yang păng dan đon lui kon lăm minh ‘nu Ih đĕch mă khan tơdrong truh thoi yơ. Yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơeng,
Lu bơ̆n tơ’bôh đon lui gơnang kơ minh ‘nu ‘Bok Kei-Dei thoi yơ?
Bơnê kơ Kră Yang oei hơdai
Ba ăn tơdrong tôm mah rơkah rơkai rim khei sơnăm
Đon lui rai đunh rai đei plei lơ hloh
Hlôi đơ̆ng dôm tơdrong pơlong hơnat, jơhngơ̆m hiôk hơđơ̆ng.
Đŏk Sơ̆p hla bơar nơ̆r ‘Bok Kei-Dei lăm tơpêng sơnăm: Êphêsô 3.
Kênh Youtube BHKTHN:
