I Timôthê 1:18-20
“Ơ dăm Timôthê, ih pơm dôm tơdrong inh athei ih âu hŏ. Ih pơm kư̆m thoi lu bơngai khan lê̆ hơdrol pơkă gah ih sơ̆. Ih ‘blŏk kơ tơdrong sư pơkă ‘noh wă kơ ih nuih kơ tơblah hăm yang kơnê̆, păng wă kơ ih lui kơjăp khŏm khŏm pơm đon ‘lơ̆ng tơpăt kơ ‘Bok Kei-Dei hăm đĭ đăng bơngai.”
(I Timôthê 1:18-19a)
Nơ̆r jet tơchĕng pơwao:
– Yua kơ kiơ ‘Bok Pôl bơtho Timôthê athei tơblah hăm tơdrong kơnê̆ mă kĕ jei?
– ‘Bok Pôl đei dui ba bơ̆n hăm đon lui păng jơhngơ̆m lăm to ‘lơ̆ng thoi yơ?
– Tơdrong răm ‘băm kơ bre Himenaius păng Aleksandrê ăn kơ bơ̆n kơ chăng lăm tơdrong kiơ?
Đơ̆ng rŏng kơ bơnê kơ Kră Yang, ‘Bok Pôl đei pơma dơ̆ng lăm kơ thơ I Timôthê 1:3-11: wă tơblah hăm bơngai bơtho tơdrong lui pha. Sư đei pơtơm pơma thoi âu “ơ Timôthê kon inh” wă kơ bơngai ‘Bok bơtho ‘Lơ̆p âu băt kơ tơdrong ‘Bok Pôl wă bơtho tơdrong mă gĭt kăl dêh tơpă. Đơ̆ng trong 18 truh 20, ‘Bok Pôl đei tơdrong bơtho ăn kơ lu bơngai bơ̆jang hơdai hăm sư: Athei “Tơblah hăm tơdrong kơnê̆” (trong 18), wă khan athei tơblah hăm tơdrong nuih kơtang. Lăm kơ thơ âu, ‘bar wơ̆t ‘Bok Pôl athei lu bơngai bơ̆jang hơdai hăm sư tơdrong thoi noh (I Timôthê 1:18,6:12). Na kơ thơ Sư chih đơ̆ng rŏng, ‘Bok Pôl đei chih roi kơ dih akâu sư thoi âu “inh đei tơblah keh đang ‘lơ̆ng bơih, keh đang tơdrong kơdâu bơih, na inh kư̆m bơwei đon lui inh” (II Timôthê 4:7). Gah tơdrong ‘Bok Pôl, tơdrong arih lu bơngai lui kơ Kră Yang noh jơ̆ tơdrong tơblah hăm teh đak, sĕch akar păng yang kơnê̆ ding truh bơ̆n wih brŏk tơ ‘Bok Kei-Dei. Yang kơnê̆ ưh kơ pơdơh lăm tơdrong sư wă pơrăm, sư pơm ăn kơ lu bơ̆n ưh kơ lêng ê lăm tơdrong lui, na tơdrong noh gô ba ăn kơ bơ̆n ưh kơ đei arih hiôk jơnap lăm Kră Yang.
Đơ̆ng nơ̆r ‘Bok Pôl đei bơtho khan lăm trong 19 hăm 20 sư wă kơ Timôthê mă kon sư gah bơhngol ‘bôh ‘bar khŭl bơngai lăm tơdrong tơblah gah bơhngol. Khŭl mă 1 noh jơ̆ ‘Bok Timôthê, athei “tơblah mă ‘lơ̆ng hăm tơdrong kĕ jei, chĕp răk kơjăp tơdrong lui păng đei jơhngơ̆m lăm to mă ‘lơ̆ng” (trong 18-19). Khŭl bơngai mă ‘bar noh jơ̆ ‘bar ‘nu bơngai Himenaius păng Aleksandrê yua kơ măr sư “sơngah kơ jơhngơ̆m lăm to” na “đon lui sư nhen môch” (trong 19-20). ‘Bok Pôl đei chih pơtrơp băl lăm đon lui hăm jơhngơ̆m lăm to ‘lơ̆ng tơpăt, ‘lơ̆ng rơgoh. Kơplah minh ‘nu bơngai mă ling lang sơngah kơ jơhngơ̆m lăm to đei chrih tơ ‘bôh păng đơ̆ng Yang Bơhngol ‘Lơ̆ng đei pơchrang ăn lăm jơhngơ̆m , na tơdrong lui bơngai noh jing rơdu nhen thoi rai môch lăm đak. Thoi noh, bơngai noh kăl kơ “pơjao kơ Yang Satan” wă khan hlôh thoi âu nhen thoi kăt tơdrong ưh kơ ăn tơbưh hăm bơngai lui. Trong hơrĭ, “wă kơ lu sư pơhrăm nĕ pă pơma blông dơ̆ng” wă khan kơnhăm kơ kăt ưh kơ ăn tơbưh hăm bơngai lui ưh kơ trŏ kơ wă kăt lê̆ đĕch ôh mă lei wă kơ lu sư băt kơ trong năm lu sư noh jơ̆ glăI na tơbral wih brŏk tơ ‘Bok Kei-Dei hăm khŭl bơngai lui dơ̆ng.
Tơdrong pŭ iŏk lăm ‘bar ‘nu bơngai Himenaius păng Aleksandrê đei pŭ iŏk, đei pơhrăm ăn kơ bơ̆n kăl kơ bơwei đon lui bơ̆n lăm Tơ’ngla Dŏng Pơklaih noh jơ̆ Lăm Kră Yang Yêsu Krist, păng bơwei jơhngơ̆m lăm to wă kơ adrin tơblah lăm tơdrong gah bơhngol, gơnang kơ nơ̆r ‘Bok Kei-Dei na kĕ jei jing truh tơ ‘bơ̆p Kră Yang.
Ơ Kră Yang, apinh ih tơgŭm inh băt mơn krăng kơchăng đơ̆ng jơhngơ̆m lăm to đei chrih tơbôh, wă kơ bơwei đon lui lăm Kră Yang na đei chăl arih hiôk jơnap đơ̆ng Kră Yang ăn. Yua anăn Kră Yang Yêsu Krist. Amen
Hăm đei tơdrong yoch ayơ na Yang Bơhngol ‘Lơ̆ng đei yua jơhngơ̆m lăm to đei chrih mă lei lu bơ̆n đei sơngah ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jêrêmi 40
Kênh Youtube BHKTHN:
