Klei Aê Diê Blŭ: I Têsalônik 1:1
Êlan kliăng: “Y-Pôl, Y-Silas, leh anăn Y-Timôthê. Čih mơĭt kơ Phung Sang Aê Diê ti ƀuôn Têsalônik dôk hlăm Aê Diê Ama leh anăn hlăm Yêsu Krist Khua Yang drei: Brei klei pap leh anăn klei êđăp ênang dôk mbĭt hŏng diih.” (I Têsalônik 1:1)
Klei êmuh ksiêm mĭn: Si klei djŏ tuôm tlâo čô hlăm êlan Klei Aê Diê Blŭ anei hŏng Phung Sang Aê Diê Têsalônik? Ya klei Khua ƀĭng kna Y-Pôl čiăng mñă tơdah ñu čih dua blư̆ boh blŭ “hlăm”? Si klei bi mguôp diih hŏng Aê Diê leh anăn Khua Yang Yêsu?
Têsalônik jing ƀuôn prŏng snăk leh anăn jing ƀuôn prŏng phŭn ti čar Masêdôn êjai phung Rôm kiă kriê. Êlan dơ̆ng yuôm bhăn hĭn phung Rôm hriê mơ̆ng Rôm truh ti kwar Ngŏ găn Têsalônik. Êlan anei hŏng kdrŭn ksĭ mâo lu mnuih ti ƀuôn prŏng mjing Têsalônik jing sa anôk mnia blei mdrŏng sah hlăm ênuk phung Rôm kiă kriê. Wăt tơdah dôk hlăm sa ƀuôn prŏng snăn, ƀiădah phung đăo ti ƀuôn Têsalônik dôk tlă anăp hŏng klei dleh dlan, arăng ngă jhat leh anăn hmăi mơ̆ng phung đăo ti êngao hŏng dhar kreh ênưih ñŭ kma, lông dlăng klei đăo diñu.
Mâo tlâo čô hlăm akŏ hră anei jing Khua ƀĭng kna Y-Pôl, pô čih hră, leh anăn dua čô dôk mbĭt hŏng ñu jing Y-Silas leh anăn Y-Timôthê. Diñu jing phung bi mguôp hŏng Khua ƀĭng kna Y-Pôl ba Klei Mrâo Mrang Jăk kơ ƀuôn Têsalônik leh anăn mkŏ mjing Sang Aê Diê tinei. Kyua phung Têsalônik mâo dŭm klei êmuh kơ klei đăo ƀiădah hlăm gưl nao čhưn tal êlâo bhiâo, Khua ƀĭng kna Y-Pôl amâo mâo mmông mblang bi nik ôh, snăn ñu čih hră anei čiăng wĭt lač leh anăn čiăng bi mni ai tiê diñu sĭt suôr hŏng Khua Yang Yêsu Pô Bi Mtlaih.
Drei mđing tơdah hưn mthâo Sang Aê Diê Têsalônik, Khua ƀĭng kna Y-Pôl mñă klă dua boh blŭ “hlăm”. “Hlăm Aê Diê Ama leh anăn hlăm Yêsu Krist Khua Yang drei: Brei klei pap leh anăn klei êđăp ênang dôk mbĭt hŏng diih…” Khua ƀĭng kna Y-Pôl bi mklă klei bi mguôp mơ̆ng phung ƀuôn sang Aê Diê ti Sang Aê Diê Têsalônik amâo dôk hlăm ñu amâodah kơ hlei pô ôh, ƀiădah phung đăo tinei thâo săng pô mâo klei bi mguôp yuôm bhăn hŏng Aê Diê leh anăn Khua Yang Yêsu jing Pô mkŏ mjing Sang Aê Diê. Anei klă sĭt jing mta phŭn, klei mkŏ yuôm bhăn plah wah phung đăo hŏng Sang Aê Diê leh anăn plah wah dŭm Sang Aê Diê hŏng Aê Diê. Leh anăn knŏng hlăm Aê Diê leh anăn hlăm Khua Yang Yêsu, phung đăo dưi mâo “klei pap leh anăn klei êđăp ênang”.
“Dôk hlăm” Aê Diê leh anăn Khua Yang Yêsu Krist ăt jing klei găl kơ grăp čô drei hruê anei thâo kơ klei pap Khua Yang brei êbeh dlai, bi êdah klei bi mguôp yuôm bhăn hŏng Aê Diê Tlâo Yang leh anăn jing klei găl čiăng kơ grăp čô drei thâo klei jăk mơak êbeh dlai mơ̆ng klei pap leh anăn klei êđăp ênang Aê Diê brei čiăng hdĭp tŭ dưn kơ Ñu.
Drei thâo mơ̆ klei jăk mơak êbeh dlai tơdah dưi dôk hlăm Khua Yang?
Wah lač: Ơ Aê Diê! Kâo bi mni lač jăk kơ Ih kyua dưi thâo klei pap leh anăn klei êđăp ênang tơdah dôk hlăm Ih. Akâo kơ Ih đru kâo mpŭ leh anăn răng kriê klei bi mguôp anei, kyua thâo amâo mâo Khua Yang kâo amâo dưi ngă sa mta bruă ôh.
Dlăng Klei Aê Diê Blŭ hlăm tlâo thŭn: Rôm 14:1-15:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
