Dêč Đuĕ Kbưi Mơ̆ng Klei Mplư Klei Soh – 19/1/2025

527

 

Klei Aê Diê Blŭ: Klei Bi Hriêng 23:1-3

Êlan kliăng: “Tơdah kngan hnuă ih bi msoh kơ ih, khăt hwiê hĕ gơ̆ ti tač; jăk hĭn ih luč sa ƀĕ kngan kơ asei mlei ih hrông dôk hlăm war pui” (Y‑Mathiơ 5:30)

Klei êmuh ksiêm mĭn: Ya ngă brei răng tơdah dôk gŭ huă ƀơ̆ng mbĭt hŏng sa čô khua mâo klei dưi? Mnơ̆ng ƀơ̆ng huă jăk hlăm klei bi hriăm anei si ngă mblang? Si drei srăng ngă ti anăp klei mplư klei soh?

Mtao Salômôn mtă brei anak ñu răng tơdah dôk gŭ ƀơ̆ng huă mbĭt hŏng sa čô khua kiă kriê. Brei anak răng, đăm mĭn ôh tơdah sa čô khua jak ƀơ̆ng huă mbĭt jing klei bi êdah kơ klei khăp mah jiăng kyuadah tăp năng pô anăn jak anak amâo djŏ knŏng kơ klei ƀơ̆ng huă ôh. Mnơ̆ng ƀơ̆ng huă sa čô khua kiă kriê amâo djŏ gru bi knal kơ klei khăp mah jiăng ôh leh anăn dŏ ngăn ñu brei kơ anak kăn djŏ klei bi knăl kơ klei êđăp ênang rei. Klei bơ̆ng huă diñu jak anak amâo djŏ ôh jak kyua klei khăp sĭt ƀiădah tăp năng diñu čiăng bi hgăm sa klei mplư jhat snăk čiăng kơ anak đuôm hŏng diñu. Brei anak bi klă hĕ klei kñăm čiăng sĭt kơ klei jak nao ƀơ̆ng huă anăn, tơdah kyua anak tluh kơ mnơ̆ng ƀơ̆ng jăk, gưt hĕ kơ klei jak anăn, ênưih snăk anak lĕ hlăm klei mplư. Tơdah anak jing sa čô ră, brei anak gĭr ư̆ ăn kyuadah klei hyưt huĭ jing msĕ si sa ƀĕ dhŏng dưm ti đŏk anak. Tơdah mnơ̆ng ƀơ̆ng lun leh truh ti kŏng đŏk, mmông anak hƀrơ̆k hdơr, hlăk anăn anak lun kăn mŭt, alĕ kăn dưi rei.

Klei mtă ti dlông amâo djŏ knŏng klei mtă brei anak răng tơdah dôk gŭ ƀơ̆ng huă mbĭt hŏng sa čô khua kiă kriê ôh, ƀiădah mâo wăt klei čiăng lač mkăn êlam hĭn jing djŏ kơ klei ênuah ênô. Tơdah sa čô khua kiă kriê brei kơ anak sa mta mnơ̆ng, brei anak ksiêm bi nik ya jing klei kñăm čiăng kơ klei brei anăn? Kyuadah tơdah anak mă tŭ leh mnơ̆ng brei anăn anak srăng đuôm hŏng diñu leh anăn diñu srăng gai anak ngă tui si klei diñu čiăng; wăt tơdah hlăk anăn anak ƀuh anăn jing klei amâo djŏ ôh, jing klei soh dưn, anak amâo lŏ dưi hngah ôh ti anăp klei dưi diñu, kyuadah mnơ̆ng anak mă tŭ kă leh anak. Snăn anak lĕ leh hlăm klei mplư brei ngă soh mơ̆ng phung mâo klei dưi. Mtao Salômôn mtă đăm “tluh” ôh, “tluh” jing klei čiăng mơ̆ng asei mlei kđeh kyuanăn ênưih snăk anak lĕ hlăm klei soh.

Khua Yang Yêsu mtô kơ klei ngă khut khat hŏng klei soh snei: “Tơdah kngan hnuă ih bi msoh kơ ih, khăt hwiê hĕ gơ̆ ti tač; jăk hĭn ih luč sa ƀĕ kngan kơ asei mlei ih hrông dôk hlăm war pui” (Y‑Mathiơ 5:30). Klei Khua Yang Blŭ lač jăk hĭn luč sa ƀĕ kngan kơ luč mngăt. Klei soh jing msĕ si sa klei ruă tưp, tưp ktang snăk, tơdah amâo mgaih mkra khut khat ôh, klei soh srăng đĭ hriê kơ lar. Akâo Khua Yang đru drei thâo răng leh anăn dêč đuĕ kbưi mơ̆ng klei soh, wăt tơdah srăng tŭ klei luč liê dưn, klei anăn jing jăk hĭn kơ klei mâo klei bi hrăp mă knŏng bhiâo klei kđeh tluh leh anăn nao kơ klei rai tuč hlŏng lar hlăm war pui.

Si ngă drei răng leh anăn krơ̆ng mơ̆ klei kđeh drei pô tluh?

Wah lač: Ơ Khua Yang, kâo lač jăk kơ Ih kyuadah Ih atăt kâo hlăm klei kpă ênô, doh jăk. Brei bĕ kơ kâo klei thâo mĭn leh anăn klei ktang čiăng kơ kâo thâo dêč đuĕ kbưi mơ̆ng mnêč klei klei mplư klei soh čiăng kơ kâo hdĭp mâo boh tŭ dưn kơ Ih. Kâo wah lač hlăm Anăn Khua Yang Yêsu Krist. Amen.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Dlăng Klei Aê Diê Blŭ hlăm tlâo thŭn: II Y-Samuel 14

Kênh Youtube BHKTHN:

https://www.youtube.com/c/bhkthn

Bài trướcKhiav Deb Kev Txhaum Lub Voj – 19/1/2025
Bài tiếp theoTránh Xa Cạm Bẫy Tội Lỗi – 19/1/2025