Pajlug 23:1-3
Nqe cim:
“Yog koj sab tes xis ua rau koj ua txhaum, cia li muab txiav pov tseg. Qhov uas koj lub cev piam ib yam lawm kuj zoo dua li tag nrho koj lub cev raug muab pov rau hauv ntuj tawg” (Mathais 5:30)
Lus nug rau sawvdaws xav:
– Vim li cas yuav tsum ua tib zoo ceevfaj thaum zaum noj mov nrog tus neeg muaj meejmom?
– Tej zaub mov qab qab hauv tej lus qhia no muaj lub ntsiab tob tob twg?
– Peb yuav tsum muaj tus cwjpwm zoo li cas rau kev txhaum lub voj?
Vajntxwv Xalaumoos qhia menyuam yuav tsum ua tib zoo saib meej cov neeg uas muaj meejmom thaum zaum noj mov nrog lawv. Koj yuav tsum ua tib zoo ceevfaj tsis txhob xav yuam kev tias tau caw mus noj mov nrog cov neeg muaj meejmom ces yog ib lub cim qhia tshwm kev phoojywg, vim tus neeg tseemceeb ntawd tsis yog muaj homphiaj tsuas caw koj mus nrog nws noj mov xwb. Cov neeg muaj meejmom tej zaub mov feem ntau tsis yog lub cim qhia tshwm rau txojkev ua phoojywg thiab tej khoom qhov txhia chaw uas nws muab rau koj tsis yog lub cim ntawm txojkev qab siab. Pluag mov uas lawv caw koj tsis vim lawv tag siab caw tiamsis tej thaum yog muab los npog lub voj hluas txaus ntshai uas muaj cuabkav ua rau koj nyob qab tswjhwm ntawm lawv. Koj yuav tsum ua tib zoo feeb meej lawv lub homphiaj tseeb uas lawv caw koj mus noj mov, yog koj ntshaw noj tej zaub mov qab qab uas nws rau los, koj yuav yoojyim mag nws lub voj hluas. Yog koj qab los heev, yuav tsum tswj koj kev noj thiab haus vim nws phomsij zoo li ib tug riam poob mus rau hauv koj lub qa. Thaum tej zaub mov mus txog hauv koj lub qa, koj mam thim xav ces thaum ntawd koj nqos kuj tsis mus thiab nti tawm hauv qhovncauj los kuj tsis tau.
Tej lus qhia saum no tsis yog ntuas koj yuav tsum ua tib zoo ceevfaj thaum zaum noj nrog cov neeg muaj meejmom xwb, tiamsis tseem muaj lub ntsiab tob tob dua ntsig txog tus cwjpwm ntawm kev ua zoo. Thaum cov neeg muaj meejmom pub rau koj ib yam khoom dabtsi, koj yuav tsum ua tib zoo saib kom meej lub homphiaj ntawm kev pub yam khoom ntawd yog dabtsi? Vim thaum koj twb lees txais yam khoom ntawd lawm ces koj yuav nyob qab hauv lawv thiab ua raws li lawv siab nyiam; txawm yog thaum ntawd koj zeem paub tias ntawd yog kev txhaum, yog yam tsis haum kev haum cai, koj kuj tsis yoojyim yig lawv lawm, thiab kuj yog vim koj twb raug muab khi rau tej khoom uas koj tau txais. Yog li ntawd koj twb poob mus rau tus neeg muaj meejmom ntawd rooj ntxiab kev txhaum lawm. Vajntxwv Xalaumoos qhia tias tsis txhob “ntshaw”, “ntshaw” yog tej kev ntshaw ntawm sab nqaij tawv, yog li koj yoojyim poob mus rau kev txhaum.
Tswv Yexus tau qhia hais tias yuav tsum txiav tu nrho rau kev txhaum: “Yog koj sab tes xis ua rau koj ua txhaum, cia li muab txiav pov tseg. Qhov uas koj lub cev piam ib yam lawm kuj zoo dua li tag nrho koj lub cev raug muab pov rau hauv ntuj tawg” (Mathais 5:30). Tus Tswv tej lus qhia meej tias yeem poob ib txhais tes zoo dua poob tus ntsujplig. Kev txhaum zoo li ib txoj kab mob uas kis mus sai kawg nkaus, yog tsis tshem mus kom tas, kev txhaum yuav huam ntxiv. Thov tus Tswv pab peb kom paub ua tibzoo khiav deb kev txhaum, txawm tias yuav raug poob ntau yam los zoo dua li koj txaus siab rau tej kev ntshaw ib pliag ntawm sab nqaij tawv, tag thaum kawg raug puastsuaj mus ibtxhis nyob hauv ntuj tawg.
Thov Vajtswv,
Tus Tswv, ua koj tsaug vim koj tau coj qhia nyuam yaus mus rau txojkev ncaj ncees, dawbhuv. Thov pub rau nyuam yaus kom muaj tswvyim thiab muaj dag zog, kom nyuam yaus paub khiav deb kev txhaum lub voj kom nyuam yaus ua neej muaj nqis rau tus Tswv. Nyuam yaus tuav Yexus Khetos lub npe thov, A-mees.
Peb puas ua tib zoo ceevfaj thiab tswj peb txojkev ntshaw ntawm sab nqaij tawv lawm tau?
Nyeem Vajluskub hauv peb lub xyoo: 2 Xamuyees 14
Kênh Youtube BHKTHN:
