Klei Aê Diê Blŭ: Klei Mphŭn Dơ̆ng 13:14-18
Êlan kliăng: “Kgŭ bĕ ih, êbat hiu tar ƀar čar anei, kyuadah Kâo srăng brei čar anei kơ ih.” Y-Abram bi mđuĕ anôk sang čhiăm ñu, leh anăn nao dôk ti đang kyâo ti Mamrê, giăm ƀuôn Hêbron; leh anăn ñu mdơ̆ng tinăn sa boh knưl ngă yang kơ Khua Yang” (Klei Mphŭn Dơ̆ng 13:17-18)
Klei êmuh ksiêm mĭn: Leh bi ktlah hŏng Y-Lot, ya klei Aê Diê ƀuăn kơ Y-Abram? Si ñu lŏ wĭt ngă hŏng klei ƀuăn anăn? Si drei srăng bi êdah klei đăo kjăp kơ Khua Yang?
Leh lŏ wĭt mơ̆ng čar Êjip kơ čar Kanaan, Y-Abram bi ktlah leh mơ̆ng amuôn ñu. Y-Lot ruah anôk lăn jing krĭng ngŏ lăn dap êa krông Yurdan jing anôk dôk, bi Y-Abram ăt dôk tinăn. Ñu êbat tui si klei Khua Yang atăt gai, nao kơ anôk Khua Yang ktrâo brei. Ƀiădah lu thŭn êgao, ñu ka mâo mă tŭ ôh klei Khua Yang ƀuăn leh. Čar Aê Diê Ƀuăn ka jing msĕ si klei ƀuăn ôh kyuadah anôk anăn ăt mâo mnuih dôk, tinăn mâo klei ư̆ êpa prŏng truh, leh anăn anôk anăn jing anôk bi ktlah dua awa amuôn diñu. Hlăm klei truh anăn yơh, Khua Yang hriê leh anăn lŏ mñă klei Ñu ƀuăn leh kơ gơ̆ êlâo dih. Khua Yang lač: “Jih jang lăn ih ƀuh Kâo srăng brei kơ ih leh anăn kơ phung anak čô ih hlŏng lar” (êlan 15).
Khua Yang ƀuăn srăng brei lăn, amâo djŏ knŏng sa krĭng ôh ƀiădah “jih sa boh čar”, jih jang krĭng dưr, dhŭng, ngŏ, yŭ Y-Abram ƀuh. Khua Yang ƀuăn kơ Y-Abram gơ̆ srăng mâo “phung anak čô”, tinei boh blŭ anei mñă truh kơ tlâo blư̆. Klei ƀuăn anei lŏ mñă êjai Y-Abram khua thŭn leh, mô̆ ñu jing mniê plao, amâo mâo anak ôh, bi amuôn ñu đuĕ nao dôk mdê leh mơh. Msĕ mơh Khua Yang lač kơ ñu: “Kgŭ bĕ ih, êbat hiu tar ƀar čar anei” (êlan 17) čiăng thâo sĭt si jing anôk lăn Khua Yang brei.
Leh hmư̆ klei Khua Yang blŭ, “Y-Abram bi mđuĕ anôk sang čhiăm ñu, leh anăn nao dôk ti đang kyâo ti Mamrê, giăm ƀuôn Hêbron; leh anăn ñu mdơ̆ng tinăn sa boh knưl ngă yang kơ Khua Yang.” (êlan 18). Ñu đuĕ nao msĕ si klei Khua Yang lač leh, klei anăn bi êdah klă kơ ñu đăo kjăp kơ klei Khua Yang ƀuăn wăt tơdan ñu ka thâo săng jih ôh si ngă klei anăn srăng truh. Ñu mdơ̆ng sa boh knưl ngă yang čiăng bi êdah ai tiê ñu kkuh mpŭ leh anăn đăo kơ Khua Yang.
Hlăm klei grăp čô drei tui hlue Khua Yang mâo blư̆ drei ăt găn mơh klei msĕ si Y-Abram găn leh. Êbat tui si klei ƀuăn ƀiădah ka mâo mă tŭ ôh klei Khua Yang ƀuăn leh. Wăt snăn dưn, drei thâo sĭt nik kơ Khua Yang jing Pô sĭt suôr, mmông Ñu bi sĭt klei ƀuăn jing mmông jăk hĭn nanao. Kyuanăn brei drei ăt đăo leh anăn hdĭp nanao hŏng klei Khua Yang iêô drei leh, ngă ya klei Khua Yang čiăng drei ngă. Hlăm anôk drei dôk hdĭp leh anăn mă bruă, kkuh mpŭ bĕ kơ Khua Yang hŏng jih klei hdĭp drei. Brei bĕ mnâo ƀâo mngưi mơ̆ng ai tiê drei kkuh mpŭ kơ Khua Yang đung hiu tar ƀar ti anôk jơ̆ng drei čhuang nao.
Ya klei brei ƀuh drei đăo kjăp nanao kơ klei Lhua Yang ƀuăn măng ai si klei hdĭp ară anei jing?
Wah lač: Ơ Khua Yang, bi mni kơ Ih kyuadah Ih ăt dôk mbĭt hŏng kâo leh anăn lŏ mñă klei Ih čiăng hlăm klei hdĭp kâo hlăk kâo mâo klei rŭng răng, êdu ai, măng ai si klei hdĭp ară anei jing, kâo ăt đăo sĭt kơ klei Ih ƀuăn leh. Đru kâo êbat kjăp nanao tui si klei Ih iêô leh. Kâo ƀuăn kkuh mpŭ kơ Khua Yang hŏng jih ai tiê, jih mngăt leh anăn jih asei mlei kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 126-128
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
