Klei Aê Diê Blŭ: Klei Bi Hriêng 24:1-2
Êlan kliăng: “Đăm tluh ôh kơ phung ƀai, kăn čiăng dôk mbĭt hŏng diñu rei, kyuadah ai tiê diñu trông čhai ngă klei ƀai, leh anăn êlah diñu blŭ klei rŭng răng” (Klei Bi Hriêng 24:1-2)
Klei êmuh ksiêm mĭn: Ya ngă Mtao Salômôn bi hriăm anak đăm tluh ôh kơ phung ƀai? Klei Aê Diê Blŭ brei ƀuh klei knhal tuč kơ phung ƀai si jing? Si drei srăng hdĭp čiăng dưi mă tŭ klei čăt đĭ dôk hlŏng lar Aê Diê brei?
Klei bhiăn mnuih arăng khăng bi êmut kơ phung ƀai, ƀiădah Khua Yang mtă đăm bi êmut kơ digơ̆ ôh. Boh blŭ tluh tinei lŏ mblang jing, phung kpă keh nač tơdah ƀuh phung ƀai mâo lu prăk, klei mdrŏng sah, leh anăn hing ang hĭn kơ diñu. Mâo lu mnuih mâo klei ênguôt leh anăn ngêñ tơdah ƀuh phung kpă ênô tŭ klei jing ƀun ƀin, tŭ klei arăng mưč, ƀiădah bi phung jhat ƀai lĕ, ƀrư̆ hruê ƀrư̆ čăt đĭ hĭn. Msĕ si lăn ala anei dôk bi mbliư̆ klei kpă ênô!
Klei Y-Salômôn sa čô mtao thâo mĭn bi hriăm anak, amâo djŏ knŏng đăm tluh kơ phung ƀai ôh, ƀiădah wăt weh đuĕ kbưi mơh mơ̆ng diñu. Đăm čiăng dôk mbĭt hŏng phung ƀai ôh, kăn lĕ hlăm klei diñu mplư čiăng tui duah klei čăt đĭ hŏng bruă ngă soh rei. Brei weh đuĕ mơ̆ng phung ƀai kyuadah ai tiê diñu knŏng mĭn kơ klei ngă ƀai, kơ klei bi rai, leh anăn êlah diñu knŏng blŭ klei luar, bi êka kơ lu mnuih. Tơdah bi mguôp hŏng phung ƀai, ai tiê mnuih kpă ƀrư̆ ƀrư̆ ăt srăng tưp klei ƀai mơh, ai tiê kpă doh ƀrư̆ ƀrư̆ srăng jing khăng, leh anăn nao truh kơ klei bi mguôp jing sa hŏng phung ƀai. Ai tiê soh srăng atăt kơ klei ngă soh bi êdah hŏng bruă ngă, klei blŭ ƀai.
Tơdah drei ksiêm dlăng kluôm ênŭm kơ klei hdĭp hŏng ai tiê ênang, drei srăng ƀuh klă klei mdrŏng sah phung ƀai jing knŏng bhiâo msĕ si rơ̆k hlăm hma aguah mtah tlam krô (Klei Mmuñ Hđăp 37:1-2). Boh klă gơ̆ hruê anei drei ƀuh mâo lu mnuih mdrŏng mâo lu prăk dôk tŭ klei knap hlăm war mnă. Kyuanăn đăm drei rŭng răng, tluh, bi keh amâodah bi mguôp mbĭt hŏng bruă diñu ôh. Klei Aê Diê Blŭ lač: “Jăk mơak yơh mnuih amâo êbat ôh tui si klei phung ƀai kčĕ, kăn dôk rei hlăm êlan phung soh, kăn dôk gŭ rei mbĭt hŏng phung mưč” (Klei Mmuñ Hđăp 1:1). Akâo Khua Yang đru grăp čô drei đăm ôh kyua klei hing ang êjai bhiâo lĕ hĕ hlăm êlan rai tuč.
Khua ƀĭng kna Y-Pôl mtrŭt brei grăp čô phung đăo bi mlih hĕ klei hdĭp tơdah đăo leh kơ Khua Yang Yêsu. Ñu lač: “Đăm jing msĕ si phung ênuk anei ôh, ƀiădah brei Aê Diê bi mlih klei hdĭp diih hŏng klei Ñu lŏ bi mrâo klei mĭn diih, čiăng kơ diih dưi thâo ya jing klei Aê Diê čiăng jăk, mơak, leh anăn klă” (Rôm 12:2). Phung đăo amâo ngă msĕ si phung ênuk anei, amâo duah klei čăt đĭ êjai ôh, ƀiădah wah lač hŏng jih ai tiê, duah klei Aê Diê čiăng jăk kơ klei hdĭp drei, jing sa čô mnuih hdĭp klă ênŭm, hơ̆k mơak mă tŭ klei mdrŏng hlŏng lar hlăm Khua Yang Yêsu Krist.
Klei kñăm čiăng kơ klei hdĭp drei jing tui duah klei êđăp ênang leh anăn klei hơ̆k mơak hlăm Khua Yang hĕ amâodah ăt dôk tluh kơ phung ƀai?
Wah lač: Ơ Khua Yang, kâo lač jăk kơ Ih đru leh kâo thâo ksiêm djŏ kơ klei kñăm čiăng kơ klei hdĭp kâo. Akâo Yang Mngăt Jăk đru kâo weh đuĕ mơ̆ng klei phung ƀai mplư, leh anăn knang kơ Ih hŏng jig ai tiê hlăm klei hdĭp grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 12 -13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
