Klei Aê Diê Blŭ: Klei Bi Hriêng 28:13a
Êlan kliăng: “Hlei pô mdăp klei soh ñu amâo srăng mâo klei đĭ kyar ôh, …” (Klei Bi Hriêng 28:13a)
Klei êmuh ksiêm mĭn: Si mblang kơ klei mdăp klei soh leh anăn si boh jhat ñu? Si klei drei dưi mdăp klei soh hŏng mnuih mkăn leh anăn hŏng drei pô? Si ngă arăng khăng duah êlan čiăng mdăp klei soh? Ya klei Khua Yang brei drei ngă tơdah tlă anăp hŏng klei soh?
Mtao Y-Salômôn mtô đăm “mdăp klei soh pô” ôh, čiăng lač đăm guôm hĕ ôh klei soh pô ngă leh. Hlăm klei blŭ Hêbrơ mâo lu boh blŭ lač kơ klei soh, boh blŭ Mtao Y-Salômôn yua tinei kñăm kơ phŭn klei bi kdơ̆ng hŏng klei Aê Diê čiăng (Y-Êsai 43:25, 27). Mtao brei thâo phŭn knhal kơ klei đăm mdăp klei soh ôh, kyuadah mnuih anăn “Amâo srăng mâo klei đĭ kyar ôh”. Hlăm klei blŭ phŭn, boh blŭ “đĭ kyar” mblang jing “dưi truh tơl kơ klei tŭ dưn msĕ si hdră bi kčah leh”. Snăn, tơdah sa čô “mdăp klei soh ñu pô” ya klei ñu amâo srăng dưi truh tơl ôh? Tal sa, Aê Diê amâo srăng brei mnuih anei mâo klei tŭ jing ôh hlăm klei ñu mdăp klei soh ñu. Tal dua, Aê Diê ăt kăn srăng brei mnuih anei dưi truh tơl kơ klei đĭ kyar msĕ si ñu bi mĭn tơdah ñu mdăp klei soh. Tal tlâo, tơdah sa čô “mdăp klei soh ñu pô” snăn klei êđăp ênang srăng kbiă đuĕ leh anăn mnuih anei srăng tŭ klei ktrŏ kjham amâo dưi mkă ôh ngă hlăm mngăt ai tiê, klei mĭn, leh anăn asei mlei (Klei Bi Hriêng 28:1; Klei Mmuñ Hđăp 32:3-4).
Hruê anei, sa čô mnuih dưi mdăp klei soh ñu hŏng mnuih mkăn hŏng lu êlan, msĕ si: blŭ luar, čhal mplĕ klei soh kơ mnuih mkăn amâodah mgang klei soh wê ñu pô ngă leh. Arăng amâo knŏng bi hgăm mdăp klei soh ñu ngă leh hŏng mnuih mkăn ƀiădah wăt bi hgăm mdăp klei soh hŏng ñu pô mơh. Lu mnuih mplư ñu pô tơdah duah jih djăp êlan čiăng mgang klei soh pô ngă, tơl wăt ñu pô ăt mĭn klei ñu dôk ngă anăn jing djŏ mơh! Mnuih mkăn tŭ ư kơ klei ñu ngă jing soh ƀiădah amâo mâo klei mĭn čiăng lui klei soh anăn ôh. Mâo đa mnuih bi juh ai mĭn ñu pô tơdah ngă soh, hŏng klei lačdah lu phung mkăn ăt ngă msĕ snăn mơh čiăng mgang kơ bruă ñu pô ngă soh. Mâo lu mnuih mă klei kpăk gun hŏng bruă knuă, boh nik hŏng bruă klei đăo, čiăng bi hgăm mdăp klei soh ñu pô…
Ya ngă arăng khăng mdăp klei soh ñu pô? Kyuadah ai tiê mgao snăn amâo čiăng tŭ ư klei soh pô ngă leh ôh, huĭ kơ mnuih mkăn thâo srăng tlao mưč (Y-Yôp 31:33-34), huĭ tŭ boh jhat kyua klei soh, leh anăn tơl wăt huĭ srăng lui hĕ klei soh pô ngă leh mơh! Mâo sa klei mdê êdi, phung mnuih “mdăp klei soh ñu pô” yơh khăng ktrâo klei soh mnuih mkăn! Năng ai diñu čiăng bi wir klei arăng mđing kơ mnuih mkăn, amâodah čiăng mgang ñu pô lač mnuih mkăn ăt ngă soh msĕ si ñu mơh, amâodah čiăng bi mdlưh mtrŭn mnuih mkăn leh anăn bi mđĭ ñu pô.
Jing sa čô đăo kơ Krist, Khua Yang čiăng kơ grăp čô drei tơdah tlă anăp hŏng klei soh mnuih mkăn, brei mâo klei thâo khăp, thâo pap brei, amâo knŏng dlăng kơ klei soh diñu ôh, ƀiădah đru diñu bi mlih (Klei Bi Hriêng 10:12); bi tơdah tlă anăp hŏng klei soh drei pô, amâo dưi mdăp ôh ƀiădah brei hưn klei soh, kmhal kơ klei soh čiăng kơ Khua Yang pap brei.
Si ngă drei khăng duah êlan mdăp klei soh drei pô mơ̆?
Wah lač: Ơ Khua Yang, akâo Khua Yang brei kơ kâo ai tiê klei mĭn hmăr, čiăng kơ kâo djăl thâo kral klei soh kâo ngă, leh anăn mâo klei luă gŭ tŭ ư klei soh pô ngă anăn, êran nao kơ Khua Yang čiăng tui duah klei pap brei mơ̆ng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Yôhan 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
