Pajlug 28:13a
Nqe cim:
“Yog koj pheej npog tej kev txhaum tseg koj lub neej yuav tsis vammeej…” (Pajlug 28:13a)
Lus nug rau sawvdaws xav:
– Npog kev txhaum lub ntsiab yog dab tsi thiab nuj nqis zoo li cas?
– Peb npog kev txhaum rau lwm tus thiab peb tus kheej li cas?
– Vim li cas tibneeg pheej muaj lub siab nyiam npog kev txhaum?
– Vajtswv xav kom peb ua li cas thaum uas pom muaj kev txhaum?
Vajntxwv Xalumoos qhia tsis txhob “npog yus kev txhaum” lub ntsiab yog tsis zais tej kev txhaum uas yus tau ua lawm. Hauv lus Henplais muaj ntau lo lus hais txog kev txhaum, tiamsis lolus uas Vajntxwv Xalumoos siv ntawm no hais txog qhov uas neeg ib txwm nyiam ua tawmtsam Vajtswv (Yaxayas 43:25, 27). Vajntxwv qhia paub qhov vimchiv uas tsis txhob npog kev txhaum, ntawd yog “lub neej yuav tsis vammeej”. Lolus “vammeej” lub ntsiab hnub thaud yog “ua tau tiav tej yam uas twb npaj tseg lawm”. Yog li ntawd, thaum ib tug neeg “npog yus kev txhaum” ces yuav ua tsis tiav yam dab tsi? Tim 1, Vajtswv yuav tsis pub rau tus neeg no ua tiav tes haujlwm uas npog nws tej kev txhaum. Tim 2, Vajtswv yuav tsis pub tus neeg no tau txais ib qhov kev vammeej twg thaum npog kev txhaum. Tim 3, thaum ib tug neeg “npog yus kev txhaum” ces kev kaj siab yuav khiav tawm ntawm nws mus, thiab yuav muaj kev tsim txom hauv nws siab ntsws, kev xav, kev hlub thiab sab nqaij tawv (Pajlug 28:1; Ntawv Nkauj 32:3-4).
Niaj hnub nim no, ib tug tibneeg yuav npog yus kev txhaum rau lwm tus hauv ntau lub tswvyim xws li: hais dag, liam txim, hais daws yus zaj qhov uas tau ua txhaum lawm. Tibneeg tsis yog npog kev txhaum rau lwm tus xwb tiamsis yus tseem zais kev txhaum rau yus thiab. Ntau tus yus cim civ rov qab dag yus, nrhiav kev los tiv thaiv yus kev txhaum, mus txog thaum ib lub sijhawm twg uas nws xav hais tias nws yeej ua yog! Lossis muaj qee tus nws yeej zeem paub nws tau ua txhaum tiamsis tsis xav tso kev txhaum tseg. Muaj qee tus nrhiav kev los nplig yus lub siab thaum ua txhaum, vim xav hais tias feem coob tibneeg puavleej ua li ntawd los tiv thaiv yus kev txhaum. Ntau tus muab txoj kev tabkaum, tshwjxeeb yog tes haujlwm hauv kev ntseeg los zais kev txhaum rau yus tus kheej…
Vim li cas tibneeg pheej nyiam npog yus kev txhaum? Vim lub siab khav theeb tsis xav lees yus kev txhaum, ntshai lwm tus paub thiab thuam yus (Yauj 31:33-34), ntshai nuj nqis ntawm kev txhaum, thiab kiag tsis xav tso kev txhaum tseg! Muaj ib yam tshwjxeeb hauv cov tibneeg uas “npog yus kev txhaum” yog pheej pom lwm tus tej kev txhaum! Muaj tej zaum vim lawv xav kom tibneeg sawvdaws tig mus ntsia lwm tus, lossis cim civ hais daws hais tias lwm tus kuj ua txhaum li yus lossis muab lwm tus txo, ho muab yus nqa nce.
Yog ib tug ntseeg, Vajtswv xav kom thaum peb pom lwm tus tej kev txhaum, yuavtsum muaj lub siab hlub thiab zam txim, tsis saib ntsoov luag kev txhaum, tiamsis pab kom lawv pauv hloov (Pajlug 10:12); thiab yog thaum uas peb pom yus ua txhaum, ces tsis txhob npog kev txhaum, tiamsis yuav tsum tso kev txhaum tseg kom tau Vajtswv zam txim.
Thov Vajtswv,
Vajtswv thov pab nyuam yaus muaj lub siab nthuav ntxheev kom paub sai sai nyuam yaus tej kev txhaum, thiab txo hwjchim lees paub txoj kev txhaum ntawd thiab khiav kiag los cuag Vajtswv thiab thov Vajtswv Koj zam txim. Nyuam yaus tuav Tswv Yexus Khetos lub npe thov. Amees.
Peb puas pheej nrhiav kev npog yus kev txhaum?
Nyeem Vajluskub hauv peb xyoos: 1 Yauhas 1
Kênh Youtube BHKTHN:
