Klei Aê Diê Blŭ: Klei Bi Hriêng 20:1
Êlan kliăng: “Kpiê brei arăng thâo mưč, kpiê ktang brei arăng ngă hao hao, hlei pô mnăm êgao hnơ̆ng jing pô amâo thâo mĭn ôh.”
Klei êmuh ksiêm mĭn: Si ngă kpiê brei arăng thâo mưč leh anăn ngă hao hao? Ya ngă bi mjhua kpiê ƀiêr atăt truh kơ klei mluk? Ya klei hriăm drei mâo kơ klei mnăm kpiê ƀiêr?
Mtao Y‑Salômôn mtô leh mnuih mnăm kpiê êgao hnơ̆ng jing pô amâo thâo mĭn ôh. Kpiê leh anăn êa jing mnơ̆ng mơêa sơăi, ƀiădah êa đru bi hlao klei mhao, bi kpiê arăng pia jing “mnơ̆ng mnăm bi ruă”. Boh jhat kơ mnuih mnăm kpiê êgao hnơ̆ng jing “thâo mưč”, blŭ “hao hao”, “amâo thâo mĭn ôh”.
“Kpiê brei arăng thâo mưč” kyuadah kpiê jing “mnơ̆ng mnăm bi ruă” kyuanăn mnuih mnăm kpiê êgao hnơ̆ng jing mnuih luč klei mĭn, amâo lŏ dưi krơ̆ng ôh klei blŭ, kyuanăn yơh khăng bi mưč, bi ƀuah leh anăn ngă klei keh koh hŏng jih jang mnuih. Êngao tinăn, mnuih mnăm kpiê êgao hnơ̆ng srăng jing mnuih rañ mơh, mhao čiăng mnăm nanao leh anăn đuôm gam hŏng kpiê. Khua pô hưn êlâo Y‑Êsai čih: “Knap mñai yơh kơ phung mdih ưm čiăng tui duah kpiê, dôk mnăm tơl mlam tơl kpiê čuih diñu” (Y‑Êsai 5:11). Klei hdĭp mnuih rañ kpiê bi luč knuih knhiêng, luč klei thâo krơ̆ng. Kpiê jing knŏng sa mnơ̆ng mnăm, ƀiădah kyua klei mnăm êgao hnơ̆ng snăn anak mnuih jing leh hlŭn kơ ñu. Mơ̆ng sa čô mnuih thâo krơ̆ng jing mnuih đuôm gam hŏng kpiê, brei kpiê jing khua kơ klei hdĭp.
Kpiê “brei arăng ngă hao hao”, čiăng lač klei blŭ kraih hao hao amâodah bi mneh msao. Kpiê brei arăng duah bi mĭn ƀuh mă kơ pô mâo klei ktang, thâo mĭn, snăn ênưih atăt truh kơ klei bi tăng mgăl, ktang đŏk, amâo lŏ dưi krơ̆ng ôh snăn blŭ klei ƀlăk ƀlưk, ngă lu klei amâo djŏ. Mnuih kpiê ruă kƀah klei thâo mĭn, luč klei thâo krơ̆ng, leh anăn hlăm klei hlŭt kŏ asei, diñu ngă klei êgao hnơ̆ng kơ klei mpŭ, klei ênuah ênô leh anăn klei djŏ. Bruă mnuih kpiê ruă ngă bi êdah nanao klei kƀah klei thâo mĭn. Ƀuôn êlan khăng lač: “kpiê mŭt, klei blŭ kbiă”, kyuadah arăng amâo tuôm blŭ lu ôh msĕ si dôk gŭ hŏng găp mnăm kpiê mbĭt. Tơl hnơ̆ng, mâo mnuih yang đar êmit snăk, thâo răng grăp boh blŭ ƀiădah tơdah mâo leh kpei hlăm asei mlei ăt blŭ čik čik mơh kơ djăp mta klei ti dlông adiê, ti gŭ lăn, tăp năng blŭ klei amâo lŏ răk hêñ mlâo amâodah kƀah klei thâo răng mơh.
Mâo lu phung đăo lač Aê Diê amâo ghă mnăm kpiê, ƀiêr ôh, knŏng kăm đăm kpiê ruă đuč. Ƀiădah lĕ klei yuôm jing drei mnăm ƀiêr, kpiê hŏng ya klei kñăm čiăng? Čiăng bi hrăp klei drei čiăng hĕ amâodah čiăng bi mơak kơ ƀĭng găp? Khua ƀĭng kna Y‑Pôl mtă: “Brei drei dôk dơ̆ng ƀơ̆ng huă hŏng klei djŏ msĕ si êjai hruê; đăm ngă tă tăn amâodah kpiê ruă ôh. Đăm ngă klei čhŏ mrŏ amâodah tlĕ piu ôh; đăm bi mneh msao amâodah nač ôh. Ƀiădah hơô bĕ Khua Yang Yêsu Krist, leh anăn đăm mĭn ôh čiăng bi mơak kơ kđeh, čiăng bi hrăp klei ñu tluh” (Rôm 13:13-14). Brei phung đăo kơ Krist êbat hlăm klei mngač Klei Aê Diê Blŭ, thâo krơ̆ng, đăm ngă ôh klei bi mơak kơ kđeh čiăng bi hrăp klei ñu tluh leh anăn jing hĕ mnuih mluk. Khua Yang čiăng kơ drei jing mnuih thâo răng, hdĭp bi guh kơang kơ anăn Ñu čiăng jing klei bi hmô jăk kơ phung ayŏng amai adei, anak čô leh anăn kơ phung ka đăo ôh.
Si ngă drei tŭ ư mơ̆ kơ kpiê ƀiêr bi hmăi jhat kơ klei hdĭp drei?
Wah lač: Ơ Khua Yang, brei bĕ kơ kâo mâo klei thâo mĭn čiăng kơ kâo dưi ñĕ đuĕ kơ klei rañ, klei kpiê ƀiêr bi mtluh. Đru kâo jing klei bi hmô jăk kơ Phung Sang Aê Diê, kơ gŏ sang leh anăn kơ yang ƀuôn.
Dlăng Klei Aê Diê Blŭ hlăm tlâo thŭn: Y‑Agê 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
