Klei Aê Diê Blŭ: Hêbrơ 8:1-5
Êlan kliăng: “Klei yuôm lač leh jing snei: drei mâo leh sa čô khua ngă yang prŏng msĕ snăn, dôk gŭ leh tĭng hnuă jhưng mtao Pô Guh Kơang hlăm phung adiê. 2Ñu jing dĭng ktang hlăm adŭ doh jăk leh anăn hlăm sang čhiăm sĭt, Khua Yang pô mdơ̆ng leh, amâo djŏ mnuih ôh” (Hêbrơ 8:1-2)
Klei êmuh ksiêm mĭn: Ya jing mta kñăm phŭn pô čih hră Hêbrơ lač hlăm kjuh kdrêč tal êlâo? Si Khua Yang Yêsu dôk ngă bruă Ñu jing Khua ngă yang prŏng? Si ngă klei hriăm anei bi mđĭ ai drei hlăm klei kkuh mpŭ kơ Aê Diê?
Tơdah jih jang hră Klei Bi Mguôp Mrâo mkăn čih hưn kơ Khua Yang Yêsu jing Pô Bi Mtlaih, jing Mtao, jing Pô Ti Krah Aê Diê hŏng mnuih sơăi, bi hră Hêbrơ lĕ mñă wĭt mñă nao kơ Khua Yang Yêsu jing Khua Ngă Yang Prŏng kơ phung drei. Anăn jing klei pô čih hră kñăm hlăm jih kjuh kdrêč tal êlâo leh anăn ăt adôk kñăm hlăm êlan 1 “Klei yuôm lač leh jing snei: drei mâo leh sa čô khua ngă yang prŏng.”
Klei yuôm hĭn hŏng grăp čô phung Yuđa jing: si srăng ngă čiăng dưi nao giăm Aê Diê, kkuh mpŭ kơ Ñu leh anăn mâo klei Ñu tŭ. Ƀiădah klei anăn amâo ênưih ôh. Kyuadah anak mnuih drei bŏ hŏng klei soh jhat, amâo mâo klă ênŭm ôh, bi Aê Diê lĕ jing Pô doh jăk, klă ênŭm. Kyuanăn klei bhiăn Y-Môis mâo klei kruak čua tliêr kjăp kơ phung khua ngă yang tơdah diñu djă ba mnơ̆ng myơr leh anăn mnơ̆ng myơr hdĭp kơ Aê Diê, hlei pô dưi nao giăm Aê Diê, ti anôk mŭt leh anăn hbĭl dưi mŭt. Ƀiădah Khua Yang Yêsu Krist jing Khua Ngă Yăng Prŏng drei, “dôk gŭ leh tĭng hnuă jhưng mtao Pô Guh Kơang hlăm phung adiê.” Tĭng hnuă jing anôk prŏng hĭn, mâo klei dưi hĭn leh anăn sĭt suôr hĭn hŏng Aê Diê Ama.Tinăn, Khua Yang Yêsu, “jing dĭng ktang hlăm adŭ doh jăk leh anăn hlăm sang čhiăm sĭt, Khua Yang pô mdơ̆ng leh, amâo djŏ mnuih ôh.”
Sang čhiăm arăng mdơ̆ng hlăm ênuk phung Israel kbiă đuĕ mơ̆ng čar Êjip čiăng kơ diñu thâo kơ Aê Diê dôk mbĭt leh anăn nao mbĭt hŏng diñu kơ Lăn Aê Diê Ƀuăn. Ƀiădah Sang čhiăm kngan mnuih ngă srăng tĭ rai, msĕ si klei ngă yang mơ̆ng mnuih mdưm ăt dôk lu klei kƀah mơh. Knŏng Yêsu Krist, Khua Ngă Yang Prŏng drei yơh dưi mă bruă hŏng klei klă ênŭm.
Mâo Khua Yang Yêsu jing Khua Ngă Yang Prŏng, drei mâo leh klei rơ̆ng kjăp măng ai ya klei truh kơ drei, drei ăt dưi nao giăm Aê Diê leh anăn Ñu tŭ jum drei. Wăt tơdah drei bi kƀĭn hlăm sang kkuh mpŭ prŏng siam amâodah hlăm sang kkuh mpŭ kƀah djăp mta mnơ̆ng, amâodah tăp năng anôk ka mâo sang kkuh mpŭ ôh, arăng dôk kăm ghă, ngă jhat…snăn hŏng Khua Yang Yêsu, drei ăt dưi kkuh mpŭ leh anăn hơ̆k mơak kyua mâo Aê Diê dôk mbĭt nanao.
Mâo mơ̆ mta klei amâodah klei truh dôk bi kgăn drei nao ti anăp Aê Diê leh anăn kkuh mpŭ kơ Ñu?
Wah lač: Ơ Ama hlăm adiê, dlăng wĭt kơ klei hdĭp amâo klă ênŭm kâo, bi mni kơ Ama kyua jih jang klei Khua Yang Yêsu ngă leh, kâo mâo klei êngiê dưi nao ti anăp Ih leh anăn kkuh mpŭ kơ Ih jing Khua Yang kơ jih lăn adiê. Đru kâo hdơr pioh nanao klei anei čiăng kâo kkuh mpŭ kơ Ih hŏng jih ai tiê leh anăn hơ̆k mơak kyua mâo Ih dôk mbĭt. Amen.
Dlăng Klei Aê Diê Blŭ hlăm tlâo thŭn: Y-Mathiơ 16:1-17:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
