II Hơ’mon 32:2-8
“Athei chơ̆n jơhngơ̆m nuih pran, ‘nĕ kơ hli, ‘nĕ kơ tơrơ ‘bơ̆t anăp pơtao Asiri păng ‘bơ̆t anăp lu linh kiơ̆ sư yua kơ đei kră Yang Tih Hloh oei hơdai bơ̆n pran hloh kơ lu bơngai oei hăm sư” (II Hơ’mon 32:7)
Nơ̆r jet tơchĕng pơwao:
– Kơplah băt kơ wă bơwang, pơtao Hesekia chă đon thoi yơ wă kơ gơh bơwei kơdih?
– Pơtao pơtrŭt lu yŏng pơgơ̆r păng kon pơlei thoi yơ?
– Kơplah tơ’bơ̆p tơdrong anat, lu bơ̆n đei thoi yơ đơ̆ng Nơ̆r Kră Yang?
Kơplah Senacherip pơtao Asiri wă bơwang Jrusalem, pơtao Hesekia pơđâu hăm lu yŏng pơgơ̆r păng lu yŏng linh wă kơ hơmet wă tơ’bơ̆p chă trong pêng tơdrong, mă mônh, bơ̆ găn lu tu đak ‘nguaih kơ Jrusalem wă kơ linh Asiri ưh kơ gơh iŏk tu đak. Kon pơlei mă đei đak tu đak ro mơ̆t lăm pơlei. Thoi noh kon pơlei oei lăm tơring oei đei đak nhă, lu linh wă tơgar ưh kơ mah đak nhă, mă ‘bar, pơtao athei man hơmet ming dur mă đĭ păk pơchah, man lu hnam thôt păng man thim dur plơ̆ng gah đaih kơ pơlei, pơtao athei man ming kơjăp Milô tơ ala kơ pơlei Jrusalem, pơtao kư̆m tuh hơjơ̆m lơ khêl đao tơmam tơblah. Mă pêng, pơtao pơjao tơdrong jang kơ lu yŏng pơgơ̆r lu linh păng krao pơpôi akŭm lu sư năm tơ anih cham să ‘măng jang pơlei wă pơma pơlung hơtŏk jơhnơ̆m. Pơtao pơma tơiung lu sư athei chơ̆n jơhngơ̆m nuih pran. ‘nĕ hli kơ pơtao Asiri păng đi đăng lu linh sư mă khan lu sư lơ, yua kơ ‘Bok oei hơdai lu bơ̆n pran hloh kơ lu bơngai hơdai hăm pơtao Asiri. Lu sư noh gơnang tơdrong pran kon bơngai gah pơtao Hesekia păng kon pơlei Juđa đei đơ̆ng ‘Bok Kei-Dei mơsêh mơyang oei hơdai tơgŭm păng blah tang lu sư. Kơplah mơ̆ng kơtơ̆ng nơ̆r noh, lu linh păng kon pơlei chơ̆n jơhngơ̆m.
Mă khan hơmet lê̆ adrol tôm tơdrong kăl kơplah tơ’bơ̆p hăm lu ayăt mă-lei Pơtao Hesekia păng kon pơlei oei băt đĭ đăng dur pơlei, linh, tơmam tơblah oei tam mă yua kiơ dah ưh kơ đei ‘Bok Kei-Dei, ‘Bok kơtang pran hloh kơ lu ayăt oei hơdai. Mă khan lăm tơdrong anat anot, hiong tơdrong hơmĕng, mă-lei hăm đon lui đei Kră Yang oei hơdai tơgŭm lu bơngai Juđa mơn kơ ưh pă hli, đêl ưh kơ hơđơ̆ng. Lu sư lăng gah tơdrong wă blah bơwang, ayăt lơ tơpă, mă ngơk lăng tơ ‘Bok Kei-Dei mơsêh tăp pang oei hơdai.
Dang ei, Bơngai lui kư̆m ưh kơ weh đơ̆ng tơdrong anat wang tăp dăr păng phŏ đei lu tơdrong pă đei hơmĕng, kơplah tơ’bơ̆p tơdrong anat thoi noh, ‘nĕ kơ bơ̆l hăl păng hiong hơmĕng, athei năm tơ Kră Yang hăm tơdrong akŭm kơkuh, krao khan, tơchĕng pơwao nơ̆r Kră Yang wă kơ gơh đei tơdrong pơlung, đơ̆ng Kră Yang dŏng tơgŭm. Tơdrong mă kăl kơplah tơ’bơ̆p tơdrong anat lăm chăl arih lu bơ̆n ‘nĕ kơ hiơt đei Kră Yang oei hơdai. Păng ‘Bok mă oei hơdai lu bơ̆n pran kơtang hloh kơ đĭ đăng, đĭ tơdrong anat lu bơ̆n. Lu bơ̆n athei pơm mă keh tơdrong lu bơ̆n pŭ iŏk, mă hơdrol hloh kơ tôm tơdrong, lu bơ̆n athei gơnang kơ Kră Yang wă kơ kĕ hlôi đơ̆ng anat anot thoi pơtao Hesekia, yŏng pơgơ̆r păng kon pơlei pơla adrol sơ̆.
Kơkuh kơ Ih, ơ Kră Yang kơplah tơ’bơ̆p hăm tơdrong anat lăm chăl arih, apĭnh ăn kơ inh huay kơ lăng mă lăm tơdrong arih păng ling lang băt kơ ‘Bok Kei-Dei mơsêh oei hơdai inh lăm tôm tơdrong. krao khan yua anăn Kră Yang Yêsu Krist. Amen.
Kơplah tơ’bơ̆p tơdrong anat anot, lu bơ̆n lăng kơ tơdrong dang ei dah kơnhăm lăng tơ Kră Yang mơsêh, ‘Bok mă oei hơdai inh?
Ưh kơ lăng tơdrong anat dang ei
Mă oei lăng tơ ‘Bok mơsêh jê̆ inh
Lăm lu kial poh yă hli krưp
Gơnang lăm yơ̆p Kră Yang, hơđơ̆ng chơt hiôk
Đŏk Sơ̆p hla bơar nơ̆r ‘Bok Kei-Dei lăm pêng sơnăm: I Pêtrôs 1
Kênh Youtube BHKTHN:
