Bơtho Khôi Juăt 32:48-52
“Lei na ih lăp lăng ‘bôh dêh char noh đơ̆ng ataih ih ưh kơ mơ̆t ôh lăm dêh mă inh ăn kơ kon pơlei Isơrael.” (Bơtho Khôi Juăt 32:52)
Nơ̆r jet tơchĕng pơwao:
– Kră Yang ‘Bok Kei-Dei bơtho athei ‘bok Môis pơm kiơ?
– Tơdrong ‘bok Môis ưh kơ gơh mơ̆t tơ dêh char pơkă tơ’bôh ‘Bok Kei-Dei Yang thoi yơ?
– Lu bơ̆n kăl kơ pơm kiơ wă yak kiơ̆ Kră Yang rim năr kiơ̆ trŏ nơ̆r Kră Yang bơtho?
Đơ̆ng rŏng kơ năr ‘bok Môis jang keh tơdrong jang tuch luch lăm tơdrong jang pơgơ̆r kon pơlei Kră Yang, Kră Yang ‘Bok Kei-Dei athei sư “tŏk tơkông Abarim, tơ Nêbô” wă tơmang lăng dêh Kanaan mă Inh wă ăn kơ kon pơlei Isơrael bơ̆jang sa. Đơ̆ng noh, Kră Yang tơbăt kơ Môis adrol kơ sư gô lôch tơkông noh, nhen thoi Arôn ‘nhŏng sư lôch kơkông Hôr. Bơ̆n ‘bôh lăm chăl trong ‘nâu ‘bok Môis bơngai pơgơ̆r mă ưh kơ gơh mơ̆t tơ char Kanaan yua kơ đơ̆ng tơdrong đei khan lê̆ adrol rơđah bơih. Đei lơ bơngai mơnat kơ sư yua kơ sư tơnăp, chu pŭ iŏk dôm tơdrong anat, yak kiơ̆ nơ̆r Kră Yang krao mălei đơ̆ng lăp minh wơ̆t glăI đĕch na ưh kơ gơh mơ̆t tơ dêh char ‘Bok Kei-Dei pơkă.
Tơdrong ‘Bok Kei-Dei phak ‘măn kơ Môis ‘noh tơ’bôh tơdrong ‘Bok Kei-Dei ‘lơ̆ng tơpăt, Kră Yang ưh kơ đei lăng yua kơ sư pơnam dah tơnăp na jô̆ sư huay kơ yoch. Tơdrong phak tơpă ‘nâu wă tơgŭm kon pơlei Isơrael ưh kơ hơmĕng hơđơ̆ng kơ bơngai pơgơ̆r kon pơlei pơla sư, nă wă kơ lu sư băt ‘bok Môis âu ưh kơ trŏ bơngai ‘lơ̆ng tôm ôh. Đơ̆ng noh kư̆m tơ’blŏk hloi kơ kon pơlei Kră Yang athei đei jơhngơ̆m ‘lơ̆ng arih đei đon lui. Ưh kơ gơh arih kư̆ kă, mă khan tŏ sĕt đĕch, ‘bơ̆t anăp Kră Yang bơtho. Mă khan ‘Bok Kei-Dei ưh kơ ăn ‘bok Môis mơ̆t tơ char pơkă, mălei Kră Yang kư̆m ăn kơ sư tơmang ‘bôh anih teh ‘lơ̆ng wă kơ sư ‘bôh Yang mă sư oei bơ̆jang noh ‘Bok Kei-Dei tơpăt, ‘bĕnh kơ tơdrong ‘mêm, kĕ chơ̆n truh lôch sư kiơ̆ nơ̆r Kră Yang krao păng Kră Yang ăn kơ sư chông anhăk kon pơlei mă Kră Yang wă ăn mơ̆t tơ dêh char đak sut đak kơdrot đei ‘bok Jôsuê Kră Yang ăn sư tơplih kơ Môis chông anhăk kon pơlei Kră Yang.
Lăm Sơ̆p Hla bơar ‘Bok Kei-Dei chih roi lơ kơmĭl gah đon lui tih wă kơnhăm pơlung lu bơ̆n, mălei kư̆m ưh kơ đei ôn ôh lu tơdrong ưh kơ jing, tơdrong glăi, lĕch đơ̆ng tơdrong yoch lu bơngai adrol sơ̆. Lăm noh đei hnam dơnŏ ‘bok Môis. Tơdrong hơ’mon năr ‘nâu đei chih roi wă tơ’blŏk kơ đĭ đăng lu bơ̆n bơngai oei rơdu rơmơ̆n tơpă, oei pơm yoch ‘bơ̆t anăp Kră Yang. Lu bơ̆n oei pơ̆k huŏng hơnơ̆ng na ngeh kơ bơ̆n oei pran kơjăp. Mă khan ‘Bok Kei-Dei Yang mă ‘bĕnh tơdrong ‘mêm mơnat kơ bơngai yoch thoi lu bơ̆n âu, mălei sư kư̆m huay Kră Yang ‘lơ̆ng rơgoh, tơpăt. Kơlih kơ thoi noh na đĭ đăng lu bơ̆n ‘nĕ kơ đei jơhngơ̆m pơang, mălei athei krao khan păng lui gơnang kơ Kră Yang rim jơ phŭt wă kơ yak kiơ̆ trŏ thoi nơ̆r Kră Yang bơtho.
Ơ Kră Yang, Ih bơih Yang mă ‘bĕnh kơ tơdrong ‘mêm, mălei Ih kư̆m Yang hil tơpă bơngai Isơrael pơm tơdrong yoch. Apinh Ih tơgŭm inh pơ’lơ̆ng lăm tơdrong arih rim năr, ling lang krao khan păng chu kơ Ih, wă kơ tơdrong arih kiơ̆ thoi Ih lăp đon. Krao khan yua anăn Kră Yang Yêsu Krist, Amen.
Nơ̆r ‘Bok Kei-Dei ‘nâu đei tơ’blŏk kơ bơ̆n tơdrong kiơ?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 16
Kênh Youtube BHKTHN:
