Klei Aê Diê Blŭ: Y-Markôs 16:1-8
Êlan kliăng: “Hruê tal sa hlăm hruê kăm anăn, êjai ang dar yang hruê mrâo ƀlĕ, diñu nao kơ msat. Leh anăn diñu bi lač hdơ̆ng diñu, “Hlei pô srăng bi klŭng brei kơ drei boh tâo mơ̆ng ƀăng msat?” (Y-Markôs 16:2-3)
Klei êmuh ksiêm mĭn: Ya klei phung mniê bi mĭn tơdah diñu blei êa ƀâo mngưi čiăng nao mia asei mlei Khua Yang, leh anăn rŭng răng kơ hlei pô srăng bi klŭng brei boh tâo mơ̆ng ƀăng msat? Ya mta boh tâo prŏng dôk ktư̆ lu mnuih hlăk êlâo leh anăn wăt hruê anei msĕ mơh? Si drei ngă čiăng klŭng hĕ boh tâo prŏng amâo thâo ƀuh anăn, čiăng dưi dôk hdĭp hơ̆k mơak hŏng Khua Yang Kbiă Lŏ Hdĭp?
Tơdah Khua Yang djiê leh, Y-Yôsep ƀuôn Arimathê akâo asei mlei Khua Yang leh anăn ba bi mđih Khua Yang hlăm msat arăng ƀoh leh hlăm boh tâo leh anăn “bi klŭng boh tâo ti mbah ƀăng msat” (Y-Markôs 15:46). Aguah ưm ang dar mrâo ƀlĕ hruê tal sa, phung mniê ăt dôk hdĭp hlăm klei mĭn Khua Yang djiê leh, kyuanăn diñu nao blei êa ƀâo mngưi čiăng mia asei mlei Khua Yang tui si klei bhiăn; leh anăn diñu rŭng răng kơ hlei pô srăng bi klŭng brei boh tâo prŏng, ktrŏ čiăng kơ diñu dưi mŭt hlăm lam msat. Ƀiădah tơdah truh tinăn, diñu “ƀuh boh tâo prŏng snăk anăn arăng bi klŭng leh” (êlan 4). Mŭt hlăm ƀăng msat, diñu ƀuh sa čô hơô ao jhung kô̆ hưn lač kơ diñu: “Ñu kbiă lŏ hdĭp leh. Ñu amâo dôk tinei ôh” (êlan 6).
Boh tâo prŏng kđăl ƀăng msat Khua Yang pŏk êhai leh, ƀiădah hlei pô adôk hdĭp hlăm klei mĭn Khua Yang djiê leh, snăn boh tâo prŏng adôk ktư̆ ti dlông klei hdĭp pô anăn yơh. Msĕ si đa đa rup bi êdah leh: Boh tâo prŏng kđăl ƀăng msat ktư̆ leh phung mniê tơl truh kơ aguah Hruê Khua Yang Kbiă Lŏ Hdĭp. Boh tâo prŏng klei tluh čiăng jhat leh anăn luč klei čang hmăng ngă kơ Y-Yuđas nao ruôt kkuê bi mdjiê asei mlei ñu pô. Boh tâo prŏng klei huĭ ktư̆ yơ̆ng ngă kơ phung ƀĭng kna êran đuĕ dăp tơdah ƀuh arăng pơ̆ng msei kđĭn Khua Yang. Boh tâo prŏng klei đing ktư̆ ktrŏ khua ƀĭng kna Y-Thômas ngă kơ ñu amâo đăo ôh Khua Yang kbiă lŏ hdĭp, đa đa mkăn… leh anăn phung drei hruê anei ăt kăn tlaih rei mơ̆ng boh tâo prŏng amâo thâo ƀuh adôk ktư̆ ktrŏ klei hdĭp drei. Mâo ya mta boh tâo prŏng klei ră, tluh čiăng jhat mơ̆? Mâo boh tâo prŏng klei keh nač bi lông mơ̆? Mâo boh tâo prŏng bi kah phung mơ̆? Mâo boh tâo prŏng klei knhông klei tluh kơ kđeh mơ̆? Mâo boh tâo prŏng klei hưn ktưn, klei mgao mơ̆? Mâo boh tâo prŏng klei alah hriăm Klei Aê Diê Blŭ mơ̆?… Lu snăk, lu lĭn boh tâo prŏng amâo thâo ƀuh dôk ktư̆ klei hdĭp phung đăo kơ Krist tui hlue Khua Yang. Hlei pô srăng klŭng brei boh tâo prŏng anăn kơ drei? Amâo mâo pô mkăn ôh êngao kơ Khua Yang Yêsu Kbiă Lŏ Hdĭp. Tơdah drei đăo kơ Khua Yang kbiă lŏ hdĭp, jih ai tiê knang kơ Khua Yang, snăn Khua Yang srăng klŭng brei boh tâo prŏng anăn kbiă đuĕ mơ̆ng klei hdĭp drei, leh anăn Khua Yang Kbiă Lŏ Hdĭp srăng dôk hlăm ai tiê drei, đru drei dôk hdĭp ba klei tŭ dưn kơ Khua Yang leh anăn mơak mơai hlăm Ñu.
Khua Yang Yêsu kbiă lŏ hdĭp leh! Anăn jing klei mơak prŏng kơ phung ƀĭng kna hlăk hruê êlâo leh anăn kơ phung drei hruê anei. Dôk kjăp bĕ leh anăn hiu hưn klei mơak Khua Yang kbiă lŏ hdĭp kơ jih jang mnuih. Akâo kơ Pô Hdĭp dôk hdĭp nanao hlŏng lar hlăm ai tiê drei, čiăng kơ klei hdĭp drei amâo lŏ adôk boh tâo prŏng dôk ktư̆ drei ôh, leh anăn drei hdĭp klei hdĭp mrâo hŏng Khua Yang Yêsu kbiă lŏ hdĭp hlăm klei hơ̆k mơak amâo mâo knhal: “Ƀiădah tơdah drei djiê leh mbĭt hŏng Krist, drei đăo kơ drei msĕ mơh srăng hdĭp mbĭt hŏng Ñu.” (Rôm 6:8).
Si ngă adôk mâo ya mta boh tâo prŏng amâo thâo ƀuh dôk ktư̆ klei hdĭp drei mơ̆?
Wah lač: Ơ Khua Yang Yêsu, hlăm klei hơ̆k mơak bi hdơr Klei Khua Yang Kbiă Lŏ Hdĭp, akâo Khua Yang mă mđuĕ hĕ jih boh tâo prŏng amâo thâo ƀuh dôk ktư̆ ktrŏ klei hdĭp kâo. Akâo Khua Yang brei kâo đăo kjăp dôk hdĭp hŏng Pô Hdĭp leh anăn hiu hưn Klei Khua Yang kbiă lŏ hdĭp kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 37
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
