Klei Aê Diê Blŭ: II Klei Yăl Dliê 30:23-27
Êlan kliăng: “Snăn kâo srăng nao kơ knưl Aê Diê, truh kơ Aê Diê, hlăm Ñu kâo mâo klei hơ̆k mơak” (Klei Mmuñ Hđăp 43:4a)
Klei êmuh ksiêm mĭn: Ya ngă jih jang phung bi kƀĭn čiăng hdơr mpŭ hruê knăm lŏ đăng kjuh hruê? Hŏng si ai tiê jih jang mnuih kkuh mpŭ kơ Aê Diê? Boh knhal tuč si jing? Hruê anei si drei srăng kkuh mpŭ kơ Aê Diê čiăng Aê Diê hmư̆ leh anăn brei klei jăk jĭn?
Ruê̆ kjuh hruê hdơr mpŭ kơ Knăm Ƀơ̆ng Kpŭng Amâo Kpei, jih jang phung bi kƀĭn čuăn hdơr mpŭ kơ hruê knăm lŏ đăng kjuh hruê mkăn. Klei anei mphŭn dô dih knŏng mâo hlăm ênuk Mtao Salômôn (I Bruă Mtao 8:65). Klei bhiăn bi kčah knŏng hdơr mpŭ kơ hruê knăm anei êjai kjuh hruê, ƀiădah digơ̆ ngă msĕ snăn kyua klei digơ̆ hur har leh anăn hơ̆k mơak tơdah dưi dôk ti anăp Aê Diê. Mtao Hêsêkia leh anăn jih jang phung khua Yuđa bi êdah klei hơ̆k mơak msĕ mơh tơdah hŏng klei kmah brei kơ phung bi kƀĭn dua êbâo drei êmô knô, pluh kjuh êbâo drei biăp, kyuanăn jih jang phung bi kƀĭn mâo djăp mnơ̆ng ƀơ̆ng huă êjai kjuh hruê lŏ čuê. Jih jang phung Yuđa, phung khua ngă yang leh anăn phung Lêwi, phung Yuđa hriê mơ̆ng čar Israel, wăt phung dôk jưh bhiâo hlăm čar Yuđa leh anăn phung jưh bhiâo hriê mơ̆ng čar Israel hơ̆k mơak sơăi. Tui si klei bhiăn Y-Môis, jih jang phung tue hdĭp hlăm čar dưi sơăi Ƀơ̆ng Knăm Klei Găn tơdah digơ̆ čiăng (Klei Yap 9:14). Hlăm klei kkuh mpŭ, tơdah mâo klei bi mguôp sa ai sĭt nik srăng mâo klei mơak, jih jang mnuih srăng hơ̆k mơak sơăi. Klei hơ̆k mơak anăn nao tar ƀar čar Israel, “mâo klei hơ̆k mơak êdimima hlăm ƀuôn Yêrusalem”, čiăng lač jing klei hơ̆k mơak prŏng ka tuôm mâo ôh mơ̆ng ênuk Mtao Salômôn hlŏng kơ ară anei. Leh anăn phung khua ngă yang hŏng phung Lêwi kgŭ dơ̆ng hơêč hmưi kơ phung ƀuôn sang (Klei Mtô Mñă Klei Bhiăn 10:8). Êngao kơ mâo klei hơ̆k mơak prŏng, boh tŭ dưn kơ klei phung bi kƀĭn kkuh mpŭ hŏng jih ai tiê jing Aê Diê hmư̆ asăp digơ̆, “Aê Diê hmư̆ asăp diñu, leh anăn klei diñu wah lač truh kơ anôk doh jăk Yêhôwa hlăm adiê” (êlan 27).
Tơdah jih jang phung bi kƀĭn bi mguôp sa ai hriê kkuh mpŭ kơ Aê Diê hŏng jih ai tiê, anăn yơh jing klei kkuh mpŭ Aê Diê mơak. Ñu srăng hmư̆ asăp wah lač leh anăn brei klei jăk jĭn. Ai tiê phung kkuh mpŭ hlơr leh anăn trơ̆ng, bŏ hŏng klei hơ̆k mơak kyua dưi bi tuôm hŏng Khua Yang leh anăn hur har myơr kơ Ñu jih jang mnơ̆ng jăk hĭn msĕ si Mtao Hêsêkia leh anăn phung khua ngă leh. Hruê anei drei ăt srăng mâo klei kkuh mpŭ Khua Yang hmư̆ leh anăn brei klei jăk jĭn mơh tơdah grăp čô phung gĭt gai Phung Sang Aê Diê, grăp čô phung đăo sa ai kkuh mpŭ kơ Aê Diê jih ai tiê hŏng mngăt leh anăn hŏng klei sĭt nik. Klei phung bi kƀĭn bi mguôp sa ai wah lač srăng truh kơ anôk doh jăk Yêhôwa hlăm adiê. Ƀiădah lĕ, bi tơdah phung bi kƀĭn mguôp mbĭt wah lač ƀiădah amâo sa ôh srăng bi ênguôt kơ Aê Diê leh anăn Ñu amâo hmư̆ ôh klei wah lač. Akâo Khua Yang đru drei hriê kkuh mpŭ kơ Ñu hŏng jih ai tiê, čiăng grăp čô hơ̆k mơak bi tuôm hŏng Khua Yang, mbĭt mđrăm myơr kơ Ñu jih jang mnơ̆ng jăk hĭn drei mâo, leh anăn jih jang drei mâo klei hơ̆k mơak sơăi.
Drei hơ̆k mơak sĭt mơ̆ tơdah kkuh mpŭ leh anăn myơr mnơ̆ng kơ Khua Yang?
Wah lač: Ơ Khua Yang, tơdah hlăm kâo mâo klei dôk bi gun klei kkuh mpŭ kơ Ih hŏng jih ai tiê leh anăn ka tuôm mâo ôh klei hơ̆k mơak prŏng, akâo Khua Yang ktrâo brei leh anăn đru kâo lui hĕ. Đru kâo mâo klei kkuh mpŭ hŏng ai tiê hơ̆k mơak nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
