Jôsuê 4:1-14
“Lei lu iĕm tơl: Noh wă khan đak Krong Jôrđăn tơklah kơplah Hom Pơgơ̆p Kră Yang năm rok đak krong, na đak krong khơ̆t kơtĕch tŏk-bŏk, tơmo âu wă pơm kơ kon pơlei Isơrael ‘blŏk hơdơ̆r ling lang.” (Jôsuê 4:7)
Nơ̆r jet tơchĕng pơwao:
– Kră Yang khan kơ ‘bok Jôsuê athei iŏk tơmo wă pơm kiơ? hăm kơnhăm kơ tơdrong kiơ?
– Yua kơ kiơ Kră Yang wă kơ kon pơlei Sư ling lang ‘blŏk hơdơ̆r kơ tơdrong ‘nâu?
– Tơdrong arih bơ̆n gô thoi yơ dah bơ̆n ưh kơ chih răk lăm jơhngơ̆m dôm tơdrong Kră Yang pơm ăn kơ bơ̆n?
Đơ̆ng rŏng kơ đĭ-đăng kon pơlei Isơrael tŏk hlôi kơ đak krong Jôrđăn bơih, lu ‘bok soi tung Hom Pơgơ̆p oei dơ̆ng tŏk bŏk đak krong, na Kră Yang ‘Bok Kei-Dei khan kơ ‘bok Jôsuê athei mơjĭt ‘bar ‘nu, đơ̆ng lăm kon pơlei, rim adrĕch minh ‘nu, dônh iŏk mơjĭt ‘bar tŏ tơmo đơ̆ng lăm đak krong. ‘Bơ̆t ala jơ̆ng lu ‘bok soi oei dơ̆ng, păng tôi ba, dan ‘bơ̆t anih lu sư wă ‘bĭch pơdơh kơmăng. Kơnhăm wă kơ lu tơmo ‘nâu wă pơm tơdra tŏk bŏk kon pơlei Kră Yang, rim ‘măng lăng ‘bôh na kon pơlei Kră Yang ‘blŏk kơ Kră Yang ‘Bok Kei-Dei đei pơm ăn kơ đak krong Jôrđăn tơklah kơplah Hom Pơgơ̆p Kră Yang ‘Bok Kei-Dei oei dơ̆ng lăm đak krong, păng lu tơmo âu wă pơm kơ kon pơlei Isơrael ‘blŏk hơdơ̆r ling lang (trong 7). ‘Nâu kư̆m minh tơdrong wă bơtho kơ lu kon sâu jơhnơr đơ̆ng rŏng lu sư gah dôm tơdrong Kră Yang ‘Bok Kei-Dei đei pơm ăn kơ adrĕch lu sư. Kon pơlei Kră Yang athei ‘blŏk kơ tơdrong hlĭch chrơp mă Kră Yang ‘Bok Kei-Dei pơm ăn kơ lu sư, ưh kơ trŏ kơ minh ‘bar năr, minh ‘bar sơnăm đĕch, mălei oei ‘blŏk ling lang. Thoi noh, hiơ̆k bơtho kơ kon sâu, gah dôm tơdrong Kră Yang pơm wă kơ ling lang ‘blŏk bơnê kơ Kră Yang jơ̆ tơdrong athei pơm lăm rim hnam dơnŏ.
Kon pơlei Kră Yang pơm kiơ̆ Kră Yang đei bơtho pơkă wă kơ ‘blŏk hơdơ̆r gah dôm tơdrong kiơ mă đei truh bơih. ‘Bok Jôsuê kư̆m akŭm pơdơ̆ng mơjĭt ‘bar tŏ tơmo iŏk đơ̆ng lăm tŏk bŏk đak krong ‘bơ̆t anih jơ̆ng lu ‘bok soi oei dơ̆ng. Lăm bơyan đak krong hrơ̆ đe gô lăng ‘bônh kơ ‘bôh lu tơmo âu dơngôk tŏk bŏk đak krong. Thoi noh, akŭm tơmo tŏk bŏk đak krong pơm tơdra wă kơ ‘blŏk hơdơ̆r kơ anih mă tơdrong mơsêh mơyang Kră Yang đei pơm, mă akŭm tơmo tơ ter jih đak ‘blŏk hơdơ̆r kơ tơdrong Kră Yang đei pơm ăn kơ kon pơlei Sư.
Bơ̆n ngăl ‘bônh kơ hiơt dôm tơdrong tih hlĭch mă Kră Yang đei pơm ăn kơ bơ̆n păng hnam dơnŏ bơ̆n. Thoi noh, na kơplah đei hiôk hian, gơh jing, phŏ bơ̆n ưh kơ tơchĕng ‘blŏk, ưh kơ băt bơnê păng ưh kơ ‘blŏk khan yua kơ đơ̆ng Kră Yang ăn na bơ̆n gơh đei tôm tơdrong. Tơdah ưh kơ đei chih răk lăm jơhngơ̆m dôm tơdrong Kră Yang đei pơm ăn kơ bơ̆n lei kơplah tơ’bơ̆p tơdrong pơmat tat bơ̆n kư̆m ‘bônh dêh kơ ngĭl ngŭl dah hli tơrơ păng ưh kơ pơ̆n yak năm tơ anăp kiơ̆ trong Kră Yang wă kơ bơ̆n năm dah mă tơdrong jang plơ̆ng ‘nao ayơ noh mă Kră Yang wă kơ bơ̆n pơm. Kră Yang wă kơ kon pơlei Sư athei wei răk ling lang dôm tơdrong tih hlĭch mă Kră Yang đei pơm kơ lu sư. Sư kư̆m wă kơ lu bơ̆n athei ‘blŏk răk ling lang dôm tơdrong Sư đei pơm ăn kơ bơ̆n. Kră Yang oei hơdai bơ̆n. Păng kơplah bơ̆n ‘blŏk bơnê kơ Kră Yang đĕch na bơ̆n gơh arih băt bơnê kơ lu ‘nhŏng oh đei tơgŭm bơ̆n lăm chăl arih.
Ơ Kră Yang, apinh Ih ăn kơ inh huay kơ hiơt dôm tơdrong pŭn hiôk mă Ih đei pơm ăn kơ inh. Apinh Ih ăn kơ inh oei lui kơjăp kơ Ih pơm ‘blep kơ nơ̆r Ih pơkă păng tơdrong Ih oei hơdai wă kơ inh ling lang arih kiơ̆ thoi Ih lăp đon păng dôm tơdrong Ih wă kơ inh pơm, krao khan yua anăn Kră Yang Yêsu Krist, Amen.
Bơ̆n hăm oei arih đei jơhngơ̆m băt bơnê kơ Kră Yang păng ling lang wei răk dôm tơdrong mă Kră Yang đei pơm ăn kơ bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 106
Kênh Youtube BHKTHN:
