Klei Aê Diê Blŭ: I Y-Timôthê 5:1-2
Êlan kliăng: “Đăm ƀuah ôh sa čô êkei mduôn, ƀiădah bi mđĭ ai ñu msĕ si kơ sa čô ama. Hŏng phung êkei hlăk ai msĕ si kơ phung adei. Hŏng phung mniê mduôn msĕ si kơ amĭ; hŏng phung mniê hlăk ai msĕ si kơ adei hŏng klei doh sĭt.” (I Y-Timôthê 5:1-2)
Klei êmuh ksiêm mĭn: Ya klei Khua ƀĭng kna Y-Pôl mtă kơ Khua pô mtô hlăk ai Y-Timôthê? Ya klei drei srăng ngă čiăng rơ̆ng knuih pô hlăk êjai mtô bi hriăm jing djŏ guôp?
Leh mñă bi nik kơ Khua pô mtô hlăk ai Y-Timôthê “Răng bĕ kơ ih pô leh anăn kơ klei ih mtô”, “gĭr” hlăm djăp klei thâo mpŭ (I Y-Timôthê 4:16), Khua ƀĭng kna Y-Pôl lač kơ bruă sa čô mnuih kiă kriê phung biăp khăng ngă, anăn jing ƀuah mkra. Ƀuah mkra knŏng tŭ dưn tơdah pô dôk ƀuah mkra dôk “hriăm klei thâo mpŭ”. Hlăk anăn, klei mtô srăng amâo tuôm hŏng klei bi kgăn ôh kyua klei hdĭp drei, leh anăn drei ăt thâo săng kyua pô ăt knŏng jing sa čô mnuih dôk “hriăm”, kyua anăn drei amâo dôk ti anôk mnuih jăk hĭn ôh čiăng lač kơ pô mkăn.
Čiăng đru kơ Khua pô mtô hlăk ai Y-Timôthê hlăm bruă klam anei, Khua ƀĭng kna Y-Pôl mtă kơ ñu “đăm ƀuah ktang” ôh. Klei mñă, mguôp klei blŭ, ƀuah ktang kbiă hriê mơ̆ng klei đĭ ai ngêñ, bi êmut, amâodah mưč mač, srăng bi êka, ngă jhat lu hĭn kơ klei jăk. Kyua anăn, hrô kơ “ƀuah ktang”, klei brei Y-Timôthê ngă hŏng grăp čô jing “bi mđĭ ai”, mñă hŏng klei êdu êun, mpŭ leh anăn mbruă.
“Êkei mduôn” leh anăn “mniê mduôn” (êlan 1-2) jing phung brei khua gĭt gai hlăk ai ƀuh dleh snăk čiăng đru kčĕ. Dhar kreh hlăk đưm brei mpŭ kơ phung mduôn. Hruê anei, ăt brei kriê pioh ênoh yuôm anei kyua anăn jing asăp mtrŭn Aê Diê (Bruă Lêwi 19:32). Khădah snăn, hŏng bruă klam khua gĭt gai hlăm klei hdĭp mngăt, Khua pô mtô Y-Timôthê ăt brei đru kčĕ hŏng phung khua thŭn hĭn tơdah čiăng. Klei msĕ snăn ăt djŏ mơh hŏng phung hlăk ai hĭn leh anăn phung mdê êpul (êlan 1-2). Tăp năng, drei gĭr “mprăp klei blŭ” tơdah đru kčĕ hŏng phung khua thŭn, bi hŏng “phung hlăk ai”, hŏng “phung mniê”, phung amâo jing bi knar ôh hŏng pô hlue si klei hdĭp phung đưm, snăn drei yua klei blŭ ktang. Khădah snăn, “bi mđĭ ai” hrô kơ “ƀuah” ăt jing hdră brei drei yua hŏng grăp čô. Dlăng diñu msĕ si “ama”, “ayŏng adei”, “amĭ”, “amai adei”, jing dlăng diñu msĕ si găp djuê hlăm gŏ sang, khăp, mđing uêñ kơ digơ̆, kyua anăn klei drei đru kčĕ, bi mđĭ ai ênưih mă tŭ hĭn.
Ƀuah amâo jing bruă ênưih ngă ôh, boh nik tơdah sa čô khua gĭt gai hlăk ai mâo klei čiăng ƀuah mkra lu êpul mnuih mdê mdê hlăm Phung Sang Aê Diê. Khădah snăn, lu mnuih năng ai srăng amâo mâo ngă soh ôh leh anăn hƀlŏk tơdah mâo hlei pô hưn brei răng leh anăn ƀuah diñu djŏ mmông. Kyua anăn, ñĕ kơ klei blŭ năng brei blŭ djŏ mmông anăn jing sa klei amâo djŏ ôh, ƀiădah brei akâo kơ Khua Yang brei klei thâo mĭn, klei khăp čiăng blŭ hŏng mnuih djŏ guôp, djŏ klă leh anăn bi mpŭ hdơ̆ng pô.
Tơdah hlei pô mtô mtă hŏng knuih djŏ klă, thâo mpŭ, si knuih drei tŭ mă?
Wah lač: Ơ Khua Yang, kâo bi mni kơ Ih kyua Ih thâo kâo srăng jing jăk hĭn tơdah hdĭp hŏng pô mkăn, jing phung amâo kluôm ênŭm msĕ si kâo. Akâo kơ Ih đru kâo đru bi mđĭ ai hdơ̆ng pô hŏng klei khăp leh anăn klei mpŭ čiăng jing tŭ dưn kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
