Klei Aê Diê Blŭ: Bruă Phung Khua Ƀĭng Kna 15:35-41
Êlan kliăng: “Diñu bi mgăl ktang snăk, tơl diñu bi ktlah,…” (Bruă Phung Khua Ƀĭng Kna 15:39a)
Klei êmuh ksiêm mĭn: Ya klei Y-Barnabas leh anăn Khua ƀĭng kna Y-Pôl amâo ư ai mbĭt? Si diñu mgaih mkra? Ya klei drei hriăm kơ hdră êlan mgaih mkra klei amâo bi djŏ mơ̆ng klei hriăm anei?
Y-Luk čih klei yăl dliê kơ klei amâo ư ai ti krah Y-Pôl leh anăn Y-Barnabas amâo djŏ čiăng lač hlei pô djŏ hlei pô soh ôh, ƀiădah đru brei drei thâo klei amâo bi djŏ ti krah phung anak ƀuôn sang Aê Diê ăt mâo nanao. Mta yuôm brei drei knang kơ Khua Yang čiăng dưi găn gao klei amâo thâo bi djŏ. Drei hriăm leh ênhă êlan mgaih mkra klei amâo bi djŏ hlăm êpul hiu hưn Klei Mrâo Mrang Jăk, hruê anei drei lŏ hriăm thiăm sa ênhă êlan mgaih mkra klei amâo bi djŏ mơ̆ng klei hriăm anei.
Leh klei bi kƀĭn prŏng kơ bruă klei đăo ti Yêrusalem, phung khua ƀĭng kna leh anăn phung khua mduôn tiŏ nao dua čô Y-Pôl leh anăn Y-Barnabas nao kơ ƀuôn Antiôs leh anăn diñu bi mguôp mbĭt hŏng lu mnuih mkăn mtô Klei Mrâo Mrang Jăk, mtô Klei Aê Diê Blŭ. Sui ƀiă tinăn Y-Pôl blŭ hrăm hŏng Y-Barnabas čiăng lŏ wĭt čuă čhưn phung ayŏng adei hmư̆ leh klei diñu mtô klei đăo kơ Khua Yang hlăk êlâo, ƀiădah diñu dua amâo ư ai mbĭt ôh kơ klei jak ba hlăk ai Y-Markôs nao mbĭt, snăn wăt tơdah mâo klei khăp dưn mơh, diñu ăt bi ktlah mơh.
Dôk ti anăp klei amâo bi djŏ ktang snăk, diñu dua ruah hdră mgaih mkra “bi ktlah” ƀiădah amâo djŏ bi kah phung ôh. Grăp čô tui nao êlan Khua Yang mtrŭt, ƀiădah jih diñu dua mâo mbĭt klei kñăm čiăng jing bi leh bruă tiŏ nao hiu hưn Klei Mrâo Mrang Jăk kơ phung tue (Galati 2:9). Hŏng Khua ƀĭng kna Y-Pôl, hlăk anăn Y-Silas jing klei ruah jăk hĭn, bi hŏng Y-Barnabas, kyuadah čiăng bi mđĭ ai leh anăn bi hriăm mjuăt êkei hlăk ai Y-Markôs đĭ hriê kơ prŏng lŏ tui čuê ngă bruă, snăn ñu ruah jak ba gơ̆ mbĭt leh anăn đĭ kŭmpăn nao kơ plao êa Čiprơ (êlan 39). Wăt tơdah amâo ư ai mbĭt, ƀiădah jih diñu dua, Y-Pôl leh anăn Y-Barnabas ăt djă pioh kjăp bruă Khua Yang jao. Boh tŭ jing mâo dua êpul hiu hưn hrô kơ sa êpul. Hŏng klei Yang Mngăt Jăk atăt gai, dơ̆ng mơ̆ng jih klei hiu čuă čhưn lu anôk anăn, đĭ hriê jing bruă hiu hưn Klei Mrâo Mrang Jăk kluôm.
Drei ƀuh klei Khua ƀĭng kna Y-Pôl ngă hŏng Barnabas, leh anăn hŏng Y-Markôs msĕ mơh, diñu “bi ktlah” ƀiădah amâo djŏ bi kah phung ôh, amâo ư ai mbĭt ƀiădah amâo bi rŭng ôh, wăt tơdah ênhă êlan ngă bruă mdê mdê, ƀădah ăt kñăm kơ bruă Aê Diê sơăi. Klei knăl bi sĭt anăn jing klei bi mguôp ăt jăk siam ti krah Khua ƀĭng kna Y-Pôl hŏng Y-Barnabas wăt hŏng Y-Markôs msĕ mơh (II Y-Timôthê 4:11; Kôlôs 4:10).
Klei yăl dliê anei brei kơ drei klei hriăm, tơdah mâo klei amâo thâo bi djŏ, drei mjưh hĕ klei bi tăng mgăl, leh anăn ruah ngă hlue si klei Khua Yang mtrŭt mtă, khă bi jih dua ăt djă pioh kjăp klei Khua Yang iêô, jih ai tiê mă bruă kơ Ñu. Drei dưi bi ktlah hlăm hdră êlan ngă bruă jao, ƀiădah amâo bi kah phung ôh, kyuadah drei jing sa asei mlei hlăm Krist, kyuanăn brei drei wah lač leh anăn bi đru hdơ̆ng pô. Kliăng čiăng kơ drei dưi găn gao klei lông dlăng êjai mgaih mkra klei amâo bi djŏ, anăn jing hŏng jih ai tiê khăp kơ Khua Yang, bi tŭ hdơ̆ng pô, bi pap brei leh anăn bi đru hdơ̆ng pô hrăm mbĭt bi mđĭ bruă Aê Diê.
Tơdah mâo klei amâo thâo bi djŏ, drei khăng bi ktlah amâodah bi kah phung?
Wah lač: Ơ Khua Yang, bi mni kơ Khua Yang mtô leh kâo ênhă êlan mgaih mkra klei amâo thâo bi djŏ. Brei kâo djă pioh kjăp ai tiê khăp kơ Khua Yang leh anăn bruă Khua Yang jao êjai tlă anăp hŏng klei amâo thâo bi djŏ, akâo Khua Yang đru kâo thâo bi tŭ, bi pap hdơ̆ng pô msĕ si Khua Yang pap brei leh kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
