Rôm 12:14-21
“Thoi noh na bơ̆n ‘nĕ pơm tơwih kơ sư tơdrong kơnê̆; bơ̆n pơm ‘lơ̆ng kơ sư đĕch wih jei bơ̆n.” (Rôm 12:21)
Nơ̆r jet tơchĕng pơwao:
– Kră Yang bơtho tơtă thoi yơ gah tơdrong arih băt mơnat?
– Bơ̆n pơm tơ’bôh tơdrong băt mơnat đơ̆ng nơ̆r pơma păng tơdrong pơm jang thoi yơ?
– Kơplah arih băt mơnat, bơ̆n iŏk tơdrong lơi yua kiơ?
Mơnat ‘noh minh nơ̆r tơtă rơđah dêh đơ̆ng Kră Yang. Kră Yang Yêsu khan: “Dah iĕm oei jô̆ yo kơ đe pơm yoch kơ iĕm, lei ‘Bă bơ̆n tơ plĕnh ti kư̆m jô̆ yo kơ tơdrong yoch iĕm mơ̆n.” (Mathiơ 6:15). Kră Yang bơtho bơ̆n arih hli yom ‘mêm kơ Kră Yang, ‘mêm kơ bôl buăl. Hli yom ‘mêm kơ Kră Yang ‘noh athei arih ‘lơ̆ng tơpăt kiơ̆ nơ̆r Kră Yang bơtho, kiơ̆ kơmĭl Kră Yang ‘mêm kơ bôl buăl noh athei arih ‘mêm, băt mơnat.
Kơplah bơtho athei arih băt mơnat, Kră Yang bơtho bơ̆n mơnat kơ bơngai mă tơbral tơpă, ưh kơ sĭ pơtrŭt lu sư pơm dơ̆ng tơdrong kơnê̆. Kơplah Kră Yang Yêsu bơtho: “Thoi noh boih na gah Inh bơtho iĕm thoi âu: Đe pơm kơnê̆ kơ iĕm, iĕm ‘nĕ pơm plơ̆ kơ đe; đe tap ‘bŏ iĕm gah ‘ma, ăn sư tap gah minh dơ̆ng.” (Mathiơ 5:39). Sư pơma hơđăl kon Kră Yang ưh kơ gơh arih hăm jơhngơ̆m pơm ‘mong plơ̆, đe pơm kơ bơ̆n liơ bơ̆n pơm plơ̆ kơ sư thoi noh. Mă khan lei ră, arih mơnat kư̆m ưh kơ sĭ khan athei chu pŭ wă kơ lu bơngai kơnê̆ pơm kơnê̆ ôh. Lăm Yôhan 18:22-23. Kră Yang ưh kơ lăp đon kơ ‘bok soi tơm Anne: “Dah inh pơma glăi ih roi tơdrong glăi noh; dah inh pơma trŏ, liơ ih tap inh thoi âu:” ‘Bok Pôl khan kơ ‘bok Phŏ tih linh Rôm ei: “Lu linh chô̆ Pôl wă kơ teh sư. Na Pôl khan kơ ‘bok phŏ linh oei ‘bơ̆t ei thoi âu: “Iĕm ưh kơ gơh teh inh ôh, yua kơ inh bơngai Rôm lei-lăi thoi iĕm mơ̆n, na lu đe kră tam mă năm sek tơlang tơdrong inh.” (Tơdrong jang 22:25). Thoi noh, kon pơlei Kră Yang ưh kơ hreh lăng đĕch ôh ‘bơ̆t lu tơdrong ưh kơ tơpăt, mălei ưh kơ lăp đon ưh kơ sĭ khan găn plơ̆ dah pơm ‘mong ôh.
Pơma gah tơdrong adrin, nơ̆r bơ̆n pơma athei sơkat pŭn hiôk tơplih kơ nơ̆r hiap pơtê̆ (trong 14). Thoi noh nơ̆r ‘bok Êtien pơma tuch luch kơplah lôch yua kơ tơdrong lui noh nơ̆r krao khan kơ lu bơngai mă klơ̆m sư păng tơmo! (Tơdrong jang 7:60). Bơ̆n kăl kơ ‘mêm, mơnat hăm bơngai nai, lui ngeh kơ tơdrong sek tơlang tơpăt đơ̆ng ‘Bok Kei-Dei wă kơ huay wei răk tơdrong ‘mong plơ̆ yua kơ Kră Yang bơtho: “Lê̆ kơ Inh pơm tơwih kơ bơngai pơm kơnê̆ noh; Inh gô phak sư yua kơ sư pơm kơnê̆” (trong 9).
Gah tơdrong pơm hloi, tơplih kơ pơm ‘mong lei na tơplơ̆, bơ̆n athei mơnat, bu pơm kơnê̆ kơ bơ̆n, kơnh pơgê bơ̆n ‘bôh sư pơngot dah kơ’bah tơmam kiơ, bơ̆n rai tơgŭm bơngai noh; dah sư ol kơ đak bơ̆n ăn nhă. Dah pơm kơ sư thoi noh, noh sư huay pơm kơnê̆ kơ bơ̆n, sư wih mơlâu kơ bơ̆ng dơ̆ng (trong 20).
Minh tơdrdong gĭt kăl dah bơ̆n arih băt mơnat, pơm ‘lơ̆ng wă kơ iŏk tơdrong ‘lơ̆ng pơm tơwih tơdrong kơnê̆ kiơ̆ kơ nơ̆r Kră Yang bơtho gô đei yua ‘lơ̆ng dêh kơ bơngai nai păng đei yua kơ bơ̆n. Jơhngơ̆m iơ̆m dim mơnat đơ̆ng bơ̆n gô ‘bơm truh kơ bơngai pơm kơnê̆ kơ bơ̆n păng lu sư đei jơ năr wă tơchĕng ming dơ̆ng. Nơ̆r pơma păng pơm hloi mă ‘lơ̆ng adrin gô pơm kơ bơngai mă ayăt kơ bơ̆n đei jơhngơ̆m ‘lơ̆ng păng tơplih. Mălei mă khan lu sư tam tơplih, lei na bơ̆n kơdih gơh klaih đơ̆ng tơdrong ayăt băl. Pơma pơyum dah bơ̆n chu yom Kră Yang na mơnat kơ bơngai areh kơ bơ̆n, lei na bơngai iŏk tơdrong đei yua adrol hloh noh akâu jăn bơ̆n kơdih.
Ơ ‘Bă mă ‘mêm, inh bơnê kơ Ih ‘mêm kơ inh na bơtho inh, mơnat kơ bơngai pơm kơnê̆ păng kơjăp lui ngeh kơ tơdrong sek tơlang ‘lơ̆ng tơpăt Ih. Apinh Ih ăn kơ inh arih băt mơnat, iŏk tơdrong ‘lơ̆ng pơm tơwih kơ tơdrong kơnê̆ wă kơ inh gơh arih hơđơ̆ng, hiôk chơt lăm tơdrong arih hăm Kră Yang păng kon bơngai, krao khan yua anăn Kră Yang Yêsu Krist, Amen.
Bơ̆n ‘bôh bơ̆n kơdih kăl kơ tơplih tơdrong kiơ đang kơ hŏk pơhrăm ‘bai ‘nâu?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 14
Kênh Youtube BHKTHN:
