Klei Aê Diê Blŭ: Rôm 12:14-21
Êlan kliăng: “Đăm brei klei jhat dưi hŏng ih ôh, ƀiădah brei klei jăk ih ngă dưi hŏng klei jhat” (Rôm 12:21)
Klei êmuh ksiêm mĭn: Si klei Khua Yang mtă, mtô kơ klei hdĭp thâo pap brei? Si drei bi êdah klei pap brei hŏng klei blŭ leh anăn klei ngă? Ya klei tŭ dưn drei mâo mơ̆ng klei hdĭp thâo pap brei?
Pap brei jing sa klei mtă klă mngač mơ̆ng Khua Yang. Khua Yang Yêsu lač: “Ƀiădah tơdah diih amâo pap brei ôh kơ arăng, Ama diih kăn srăng pap brei klei soh diih rei.” (Y-Mathiơ 6:15). Khua Yang mtô drei hdĭp mpŭ kơ Khua Yang, khăp kơ mnuih. Mpŭ kơ Khua Yang jing brei dôk hdĭp kpă ênô tui si Klei Aê Diê Blŭ mtô, gưt hlue klei Khua Yang bi hmô. Khăp kơ mnuih jing brei dôk hdĭp thâo khăp, thâo pap brei.
Tơdah mtô kơ klei brei hdĭp pap brei, Khua Yang mtô drei pap brei kơ mnuih mâo klei kmhal sĭt, amâo djŏ ôh brei diñu ăt lŏ ngă klei mưng jhat. Tơdah Khua Yang Yêsu mtô, “Đăm bi kdơ̆ng hŏng mnuih ƀai ôh. Ƀiădah tơdah arăng čăm ih ti miêng hnuă, wir miêng điâo brei ñu čăm msĕ mơh.” (Y-Mathiơ 5:39), Ñu kñăm amâo brei phung anak Aê Diê hdĭp hŏng klei mĭn rŭ ênua ôh, amâo ngă wĭt tui si klei jhat arăng ngă kơ pô ôh. Ƀiădah lĕ, hdĭp thâo pap brei amâo djŏ ôh ăt tŭ gĭr nanao măng ai tui si phung jhat ƀai ktư̆ juă čiăng ngă. Hlăm Y-Yôhan 18:22-23, Khua Yang wĭt lač hŏng khua ngă yang prŏng Y-Anas: “Tơdah Kâo blŭ soh leh, bi êdah klei soh anăn; ƀiădah tơdah Kâo blŭ djŏ, si ngă ih čăm Kâo lĕ?” Khua ƀĭng kna Y-Pôl wĭt lač kơ khua kahan Rôm: “Bhiăn mơ̆ ih čăm sa čô Rôm ka phat kđi ôh?” (Bruă Phung Khua Ƀĭng Kna 22:25). Snăn phung anak Aê Diê amâo dôk kriêp ñăt ôh ti anăp klei amâo mtăp mđơr, ƀiădah wĭt lač amâo djŏ mblang jing klei bi kdơ̆ng amâodah rŭ ênua ôh.
Tĭng kơ klei mĭn jăk, klei blŭ drei brei jing klei blŭ hơêč hmưi hrô kơ klei tăm pah (êlan 14). Msĕ si klei blŭ knhal tuč, khua sang yang Y- Ê-tiên blŭ êlâo kơ ñu djiê kyua klei đăo, jing klei wah lač brei kơ phung bhĭr boh tâo bi mdjiê ñu! (Bruă Phung Khua Ƀĭng Kna 7:60). Brei drei thâo khăp, thâo săng brei kơ mnuih mkăn, dưm klei đăo drei hlăm klei Aê Diê phat kđi kpă, čiăng kơ đăm djă pioh ôh klei mĭn rŭ ênua kyuadah Khua Yang mtô: “Klei rŭ ênua jing bruă kâo; kâo yơh srăng bi wĭt klei năng, Khua Yang lač” (êlan 19). Tĭng kơ klei bruă ngă, hrô kơ klei rŭ ênua snăn lŏ bi mklăk wĭt, drei ngă bruă klei pap, tơdah pô roh êpa brei mnơ̆ng ƀơ̆ng huă kơ ñu, tơdah ñu mhao brei êa mnăm kơ ñu. Bruă ngă anei bi hêñ diñu msĕ si mkăm anghar pui ti dlông boh kŏ diñu (êlan 20).
Sa klei mdê yuôm tơdah drei hdĭp thâo pap brei, brei klei jăk dưi hĭn hŏng klei jhat tui si Klei Aê Diê Blŭ mtô, srăng ba hriê boh tŭ dưn jăk siam kơ mnuih mkăn leh anăn wăt kơ drei pô mơh. Ai tiê jăk, klei drei pap brei srăng bi hmăi jăk truh kơ pô roh leh anăn diñu mâo mmông găl lŏ bi mĭn wĭt. Klei blŭ leh anăn klei ngă jăk srăng bi êun ai tiê leh anăn bi mlih pô roh. Ƀiădah wăt tơdah diñu ka mâo klei bi mlih dưn, snăn kơ drei pô yơh ăt dưi tlaih mơ̆ng klei ăl đuôm ai bi roh. Ksiêm wĭt ti knhal tuč, tơdah drei gưt asăp Khua Yang leh anăn pap brei kơ pô roh, snăn pô mâo klei tŭ dưn êlâo hĭn jing kơ drei pô yơh!
Ya mta klei čiăng drei bi mlih, leh hriăm klei hriăm anei?
Wah lač: Ơ Ama khăp hơiêng, bi mni kơ Ama kyua khăp kơ kâo, Ih bi hriăm kâo pap brei kơ pô roh leh anăn đăo kjăp kơ klei Khua Yang phat kđi kpă. Brei kâo hdĭp thâo pap brei, brei klei jăk dưi hĭn hŏng klei jhat ƀai, čiăng kơ kâo dưi dôk hdĭp êđăp ênang, mơak mơai hlăm klei hdĭp hŏng Khua Yang leh anăn hŏng jih jang mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
