I Yôhan 4:1-3
“Bơngai bu khan Yêsu Krist ưh kơ jur jing bơngai, bơngai ‘noh ưh kơ đei Yang Bơhngol ‘Lơ̆ng đơ̆ng ‘Bok Kei-Dei ôh” (I Yôhan 4:3a)
Nơ̆r jet tơchĕng pơwao:
- ‘Bok Yôhan pơlung lu bơngai lui tơdrong kiơ?
- Pơm thoi yơ wă kơ băt kơ Yang Bơhngol ‘Lơ̆ng ‘Bok Kei-Dei?
- Tơdrong kiơ pơsĭt ăn kơ bơ̆n drơ̆ng pơma gah Kră Yang Yêsu “iŏk akâu kar kon bơngai jur tơ teh âu”?
Yua kơ “đei lơ bơngai pơtruh nơ̆r ‘Bok Kei-Dei ưh kơ tơpă lăm teh đak âu” thoi noh na Yôhan bơtho pơlung lu bơngai lui ‘nĕ kơ “lui kơ dôm lu yang nai”, mă lei athei pơlong lăng yang ayơ mă đơ̆ng ‘Bok Kei-Dei (trong 1). Sư đei pơma pơsĭt thoi âu: tơdrong Yang Bơhngol ‘Lơ̆ng đei tơ’bôh ăn noh jơ̆ dôm tơdrong đơ̆ng Kră Yang Yêsu đei pơm bơih (trong 2). Yang Bơhngol ‘Lơ̆ng tơgŭm dŏng lu bơngai drơ̆ng sơng iŏk Kră Yang Yêsu iŏk akâu akar kon bơngai, Sư jơ̆ ‘Bok Kei-Dei, Sư kư̆m kon bơngai mơ̆n păng Sư bơih mă ‘Bok Dŏng Pơklaih nguaih kơ Sư ưh kơ đei ‘bok nai wă dŏng pơklaih bơ̆n. Hăm Yôhan, Tơdrong ‘Nao ‘Lơ̆ng đei pơma kơđeh thoi âu: “Nơ̆r ‘Bok Kei-Dei jing kon bơngai bơ̆n, oei tŏk bŏk lu bơ̆n” (Yôhan 1:14). Yang Bơhngol ‘Lơ̆ng gô “pơma” tơdrong ‘noh (trong 2). Kơplah đei pơma pran gah tơdrong drơ̆ng sơng iŏk Kră Yang Yêsu đơ̆ng Yang Bơhngol ‘Lơ̆ng, Yôhan đei pơma tơ’bôh gah tơdrong Sư iŏk akâu thoi kon bơngai, noh jơ̆ tơ’bôh ăn tơdrong ‘mêm tih tin jrŭ să đơ̆ng ‘Bok Kei-Dei. Kră Yang ưh kơ lăng bơ̆n đơ̆ng gah ‘nguaih mă lei Sư đei jur oei hơdai păng bơ̆n. Sư đei jur iŏk akâu akar thoi kon bơngai wă pŭ iŏk tơdrong yoch, pơklaih đơ̆ng dôm tơdrong jĭ rơka, păng ba ăn kơ lu bơ̆n jing lăm hnam dơnŏ Sư. Yang Bơhngol ‘Lơ̆ng tơ’blŏk ăn kơ bơ̆n lăm jơhngơ̆m păng đon tơchĕng bơ̆n wă kơ tơgŭm bơ̆n băt kơ Kră Yang Yêsu Sư jơ̆ ‘Bok dŏng pơklaih jur bơih lăm teh đak wă dŏng pơklaih kon bơngai.
Yang Bơhngol ‘Lơ̆ng tơ’bôh ăn kơ tơdrong ‘lơ̆ng tơpăt đơ̆ng Kră Yang ‘Bok Kei-Dei, nơ̆r roi pơdah: “Kră Yang Yêsu Krist iŏk akâu akar kon bơngai” kŭm wă pơma kơ tơdrong Sư jur wă dŏng pơklaih tơdrong yoch kiơ̆ thoi tơdrong ‘lơ̆ng tơpăt. Sư ưh kơ lăng tơdrong yoch khan lê̆ sư hlôi hiong đĕch ôh. Lăm tơdrong ‘lơ̆ng tơpăt, Sư đei wơh Kon Pôm Sư jur păng chu pŭ iŏk tơdrong sek tơlang tơdrong yoch mă trŏ kơ bơ̆n pŭ iŏk ră. Yang Bơhngol ‘Lơ̆ng tơgŭm bơ̆n băt kơ tơdrong tơpăt sĭt păng tơdrong ‘lơ̆ng rơgoh gah Kră Yang ‘Bok Kei-Dei đei pơdah ‘bơ̆t ‘long pơglang.
Yôhan đei pơma khan lê̆ tơdrong âu mă khan yang ayơ sơngah kơ Kră Yang Yêsu đei iŏk akâu akar kon bơngai lei yang noh ưh kơ đơ̆ng Kră Yang ‘Bok Kei-Dei (trong 3). Tơdrong âu tơ’bôh ăn kơ tơdrong ‘mêm mơnat, Yang Bơhngol ‘Lơ̆ng bơwei lăng lu bơngai lui wă kơ huay kơ đei tơdrong hơlĕnh pơdăr. Hăm tơdrong ‘lơ̆ng tơpăt, Yang Bơhngol ‘Lơ̆ng tơ’bôh ăn kơ bơ̆n dôm tơdrong yoch glăi, dôm tơdrong mă bơ̆n hlôh jrok hăm tơdrong mă bơ̆n ưh kơ wă chu yom Kră Yang Yêsu Krist. Yang Bơhngol ‘Lơ̆ng ăn kơ bơ̆n băt kơ năr păng tơdra gah tơdrong tơpăt sĭt păng tơdrong glăi, hơdah hăm măng mu, nơ̆r đơ̆ng Kră Yang ‘Bok Kei-Dei păng nơ̆r đơ̆ng lăm teh đak.
Pơma drơ̆ng kơ Kră Yang Yêsu “iŏk akâu akar kon bơngai” wă khan lu bơ̆n lui gơnang kơ Kră Yang, kiơ̆ Kră Yang, păng tơgŭm bơ̆n ‘bôh nhen tơdrong mă bơ̆n đei wă pơm lăm trong tơdrong tơpăt sĭt Sư. Kư̆m hơdai, lu bơ̆n kăl kơ gơnang kơ Yang Bơhngol ‘Lơ̆ng pơchrang hơdah kơ lu bơ̆n, tơgŭm đon lui bơ̆n, tơgŭm bơ̆n hlôi đơ̆ng dôm tơdrong hơlĕnh pơdăr, dui ba bơ̆n băt hơđăl kơ tơdrong ‘mêm đơ̆ng Kră Yang ‘Bok Kei-Dei.
Ơ Kră Yang, bơnê kơ Ih đei ăn Yang Bơhngol ‘Lơ̆ng wă tơgŭm inh băt kơ Kră Yang Yêsu păng đei pơma drơ̆ng Sư jơ̆ ‘Bok Dŏng Pơklaih inh. Apinh Ih tơgŭm inh krăng kơchăng kơ tơdrong Yang Bơhngol ‘Lơ̆ng oei hơdai păng dŏng tơgŭm đơ̆ng Yang Bơhngol ‘Lơ̆ng wă kơ inh huei kơ kiơ̆ tơdrong pơhlŭ lăm tơdrong yoch glăi. Yua anăn Kră Yang Yêsu Krist, Amen.
Lu bơ̆n hăm băt tơpă kơ Yang Bơhngol ‘Lơ̆ng oei hơdai lăm chăl arih bơ̆n ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 100-101
Kênh Youtube BHKTHN:
