Yakơ 4:17
Kơkuh kơ đĭ-đăng bơngai mă mơ̆ng,
Năr ‘nâu bơ̆n gô pơwao hơdai ‘bai pơhrăm đei kơ̆l ‘bai: Băt Bơih Mă Ưh Kơ Pơm Kiơ̆, lăng đơ̆ng Hla bơar Yakơ 4:17.
17 Dang ei iĕm băt boih, na bơngai bu băt boih kơ tơdrong ‘lơ̆ng tơdrong trŏ mă sư ưh kơ wă kiơ̆, bơngai noh yoch tơpă.
Trong tơm ‘bai pơhrăm ‘nâu:
“Dang ei iĕm băt bơih, na bơngai bu băt bơih kơ tơdrong ‘lơ̆ng tơdrong trŏ mă sư ưh kơ wă kiơ̆, bơngai noh yoch tơpă” (Yakơ 4:17)
Nơ̆r jet tơchĕng pơwao:
– Băt bơih mălei ưh kơ pơm kiơ̆ noh khan yoch, yua kơ kiơ?
– Tơdrong yoch’nâu tih sư dang yơ?
– Bơ̆n athei pơm kiơ wă kơ ling-lang yua iŏk jơ trŏ’blep lăm tơdrong pơm ‘lơ̆ng?
Kơkuh kơ đĭ-đăng,
Hmă sư, dôm tơdrong kiơ mă ‘Bok Kei-Dei khă kuă ăn bơ̆n pơm, mălei bơ̆n pơm, noh bơih bơ̆n tơchĕng khan yoch. Tơdah Kră Yang bơtho khan ưh kơ gơh pơma kơnê̆, ‘nĕ kơ bâu roi dih băl mălei bơ̆n oei pơma kơnê̆, oei bâu roi dih băl, noh bơ̆n yoch. Tơdah Kră Yang bơtho khan ưh kơ gơh pơm buăl lu bơngai ala teh, arih kiơ̆ kơ tơdrong ala teh mălei bơ̆n oei pơm, noh bơ̆n yoch.
Mălei lăm Yakơ 4:7, tơdrong yoch noh, ưh kơ hmă lăp dôm lu tơdrong bơ̆n pơm noh đĕch ôh, mălei mưh bơ̆n băt hơđăl bơih ră dôm lu tơdrong kiơ ‘lơ̆ng kăl kơ bơ̆n pơm mălei bơ̆n ưh kơ pơm, noh bơ̆n yoch: “Dang ei iĕm băt bơih, na bơngai bu băt bơih kơ tơdrong ‘lơ̆ng tơdrong trŏ mă sư ưh kơ wă kiơ̆, bơngai noh yoch tơpă”. Băt tơdrong ‘lơ̆ng tơdrong trŏ “noh jơ̆ băt kơ nơ̆r Kră Yang bơtho gah tơdrong ‘lơ̆ng tơdrong trŏ. Băt bơih mă ưh kơ pơm, noh bơ̆n lăng nơ̆r Kră Yang bơtho hơi đĕch. Bơ̆n gơh khan tơdrong yoch ‘nâu oei trăp hloh kơ dôm lu tơdrong yoch đơ̆ng kơdih kon bơngai bơ̆n pơm noh ‘mơ̆i, thoi Kră Yang Yêsu khan: “Dôm lu đĭch đam mă băt kơ nơ̆r yŏng sư tơtă ră, mălei sư ưh kơ kơchăng păng ưh kơ pơm kiơ̆, na yŏng sư gô tôn teh sư kơtang tơpă” (Luka 12:47). Lăm Mathiơ 25:41-46, Kră Yang Yêsu jô̆ lu bơngai ưh kơ băt tơchĕng’blŏk, ưh kơ băt dŏng tơgŭm hoh kơ’bah, lu kon mơti, lu bơngai jĭ-jăn, Kră Yang kư̆m tơbăt ăn kơ bơ̆n jơhngơ̆m lu đe ei pơm ưh kơ băt, pơm ưh kơ ‘bôh lu bơngai mă tơ’bơ̆p tơdrong pơmat tat thoi noh, lu đei kư̆m pơm kơ Kră Yang Yêsu thoi noh mơ̆n. Na tơdrong arih lu bơngai mă ưh kơ đei’brơ̆k mơnat ‘biơ̆ kơ đe ei, Kră Yang gô phak lu sư ling-lang ling-lang.
Lăm chăl arih, bơ̆n đei jơ năr trŏ ‘blep wă pơm ‘lơ̆ng, dŏng tơgŭm. Pơtih gia, đei bơngai jet bơ̆n trong wă năm tơyơ, bơ̆n roi phăl kơ sư, tơ’bôh kơ sư trrong hloi; dah đe pơm glăi hăm bơ̆n, sư băt tơbral, apinh mơnat, na bơ̆n mơnat huay kơ jô̆ yo hloi, dah ‘bôh lu bơngai arih pơmat tat, bơ̆n hơlăng hơmrah asong kơ lu đe ei tơmam mă bơ̆n đei; truh tơ bơ̆n ngôi ‘bơ̆t anih hlơp hrĕp krao khan tơgŭm lu bôl buăl jih ‘ma kơ bơ̆n noh hloi tăm.v.v… Yua kơ jơ trŏ ‘blep wă pơm ‘lơ̆ng, dŏng tơgŭm đe noh Kră Yang ăn kơ đĭ-đăng bơ̆n bơih, lei na dah bơ̆n ưh kơ pơm lei bơ̆n yoch. Tơplơ̆ kơ ‘noh,pŭn hiôk đơ̆ng Kră Yang ‘măn lê̆ bơih wă apah lu bơngai mă băt pơm ‘lơ̆ng dŏng tơgŭm đe. Wă kơ pre jơhngơ̆m lăp đon yua iŏk dôm lu jơ năr trŏ ‘blep noh, bơ̆n athei tơchĕng jrŭ hlom lăm Nơ̆r Kră Yang wă kơ hlôh băt tơdrong Kră Yang wă păng ‘bônh kơ băt dôm tơdrong đơ̆ng Yang Bơhngol ‘Lơ̆ng chông anhăk bơtho tơ’bôh. Kơdih bơ̆n wang pơdŏng awih awăn tơdrong jang Kră Yang lăm Hnam akŭm khul lui, wang pơdŏng tơdrong jang kon pơlei pơla tơring tơrang; bơ̆n pơdơ̆ng tơdrong arih băt tơgŭm chro ăn kơ đe, hloh kơ chro iŏk đơ̆ng đe… Bơ̆n kăl kơ ‘blŏk ling-lang tơdrong âu: Băt kơ tơdrong Kră Kră wă mălei ưh kơ pơm kiơ̆, noh yoch. Tơdrong bơ̆n lui kơ Kră Yang kư̆m lei-lăi mơ̆n, ưh kơ pôm pơmơ̆ng đơ̆ng Kră Yang asong ăn kơ bơ̆n gơh klaih đơ̆ng yoch noh đĕch ôh, mălei đơ̆ng bơ̆n kơdih khŏm tơ’bôh tơdrong arih tơdrong lui bơ̆n ăn kơ lơ bơngai lăm teh đak âu băt kơ bơ̆n bơngai lui. Dôm tơdrong bơ̆n pơm,bơ̆n jang yua kơ đơ̆ng bơ̆n lui noh bơih tơdrong pơsĭt tơ’bôh ăn đe băt kơ bơ̆n bơngai klaih đơ̆ng yoch tơpă bơih, tơdrong arih noh rai nhen thoi Kră Yang Yêsu.
Bĕ bơ̆n pôm jơhngơ̆n đon krao khan,
Kơkuh bơnê kơ Ih Kră Yang, yua kơ dôm lu jơ năr trŏ ‘blep Ih ăn bơih lăm chăl arih inh, wă kơ inh wang awih awăn kơ Ih, tơ’bôh ăn kơ đĭ-đăng bơngai băt tơdrong Ih ‘mêm, băt kơ Ih Tơ’ngla pơkă sĭt, băt kơ Ih ‘lơ̆ng tơpăt tôm tơdrong. Apinh Ih ăn kơ inh ‘bônh kơ băt kơnăl dôm lu jơ năr trŏ’blep wă pơm ‘lơ̆ng, păng apinh Ih tơgŭm inh jang pơm hăm tơdrong ‘mêm tôm mah. Apinh Ih ăn chăl arih inh âu pơdah gah tơdrong ‘mêm mơnat hiôk ‘lơ̆ng đơ̆ng Ih.Inh krao khan yua anăn Kră Yang Yêsu Krist, Amen!
Ơ đĭ-đăng bơngai mơ̆ng mă ‘mêm kơeng,
Bơ̆n băt kơnăl kơ tơdrong ‘lơ̆ng tơdrong trŏ Kră Yang wă kơ bơ̆n pơm dang ei’nâu kiơ? Bơ̆n hăm lăp đon jang pơm ưh?
Băt tơdrong ‘lơ̆ng tơdrong trŏ mă ưh kơ pơm,
Wer ataih đơ̆ng tơdrong ‘lơ̆ng tơdrong trŏ lei bơ̆n kang rai glăi hloh
Tơchĕng pơwao Nơ̆r Kră Yang rim năr
Hiơ̆k jang tơdrong Kră Yang, jang pơm mă keh hloi
Đŏk Sơ̆p Hla bơar’Bok Kei-Dei lăm pêng sơnăm: Philip 2
Kênh Youtube BHKTHN:
