Klei Aê Diê Blŭ: II Klei Yăl Dliê 19:3-4
Êlan kliăng: “Kyuanăn nao bĕ diih mjing phung ƀĭng kna hlăm jih jang găp djuê mnuih, ngă ƀaptem kơ diñu hlăm anăn Ama, anăn Anak, leh anăn anăn Yang Mngăt Jăk; 20bi hriăm diñu brei gưt jih jang klei kâo mtă leh kơ diih. Leh anăn nĕ anei, kâo dôk mbĭt hŏng diih nanao tơl knhal tuč lăn ala.” (Y‑Mathiơ 28:19-20)
Klei êmuh ksiêm mĭn: Hlăm êlan 4 čih ti anôk Mtao Jôsaphat dôk? Êdei kơ anăn, phă ñu nao leh anăn ya bruă ñu ngă? Tui hlue Mtao Jôsaphat, ya drei ngă čiăng ba lu mnuih wĭt kơ Aê Diê?
Leh Aê Diê bi mtlaih leh anăn lŏ wĭt, Mtao Jôsaphat “čuăn duah Aê Diê” leh anăn “dôk ti ƀuôn Yêrusalem” amâo nao ôh ti Samari čiăng hlue ngă ya ƀĭng hgŭm mtao čiăng leh anăn mplư (II Klei Yăl Dliê 18). Mtao lŏ dôk ti anôk dôk, wĭt hŏng bruă brei mtao ngă. Anak amâo gưt asăp ama, hlăp hŏng ƀĭng găp amâo jăk ti êngao, ară anei dôk jăk hlăm sang ama čiăng mă bruă leh anăn gưt asăp ama pô. Êdei kơ anăn, mrâo lŏ kbiă mơ̆ng ƀuôn Yêrusalem, ƀiădah tal anei jing nao čhưn mnuih ƀuôn sang hlăm djăp krĭng mơ̆ng kwar Dhŭng truh kơ kwar Dưr čiăng atăt phung ƀuôn sang “lŏ wĭt kơ Yêhôwa Aê Diê phung aê digơ̆”. Dŭm klei Aê Diê ƀuah ăl mơ̆ng pô thâo bi ƀuh Y‑Jêhu mgei ai tiê mtao. Mtao thâo săng lu hĭn kơ klei pap, klei khăp Aê Diê. Mtao thâo pô amâo năng ôh ƀiădah Aê Diê pap brei kơ pô, mtlaih mtao mơ̆ng klei djiê, brei mtao wĭt êđăp ênang ti sang. Ară anei hŏng jih ai tiê hdơr knga, mtao čiăng ngă jih ai pô čiăng ba mnuih ƀuôn sang wĭt kkuh mpŭ kơ Aê Diê, jing Pô brei diñu kkuh mpŭ hrô kơ kkuh kơ rup yang nah êngao.
Klei Aê Diê Blŭ amâo čih ôh hŏng si hdră Mtao Jôsaphat ngă čiăng atăt phung ƀuôn sang lŏ wĭt hŏng Aê Diê, knŏng brei thâo mtao pô nao amâo djŏ tiŏ phung mkăn nao msĕ si êlâo dih ôh (II Klei Yăl Dliê 17:7). Klei anăn brei ƀuh mtao dlăng yuôm snăk bruă atăt pô mkăn wĭt hŏng Aê Diê. Mtao lui leh klei dưi dôk mdei pô čiăng nao kluôm krĭng mă bruă kơ Yêhôwa Aê Diê.
Khua Yang Yêsu săn leh asei kơ jih jang phung drei. Ñu lui leh anôk guh kơang hlăm ƀuôn ala mtao čiăng hriê ti lăn ala tŭ klei dleh knap, boh nik tŭ klei djiê ruă êka ti kyâo bi kal kyua klei soh drei. Brei drei mâo ai tiê msĕ si mtao Jôsaphat, srăng nao hlăm djăp anôk Aê Diê tiŏ nao, tŭ săn asei hiu hưn klei khăp Khua Yang, ba lu mnuih wĭt kkuh mpŭ kơ Aê Diê jing Pô hrih mjing leh digơ̆ leh anăn jih lăn adiê anei hrô kơ kkuh mpŭ kơ mnơ̆ng dhơ̆ng hlăm lăn ala anei. Klei jăk siam Mtao Jôsaphat ngă leh kơ Khua Yang hlăk đưm mâo Aê Diê hdơr snăn ya klei drei ngă hruê anei čiăng atăt phung mkăn hriê kơ Khua Yang, Ñu ăt srăng hdơr leh anăn pah mni mơh (Y‑Mathiơ 16:27, I Kôrantô 15:58).
Drei srăng lui klei hêñ, klei dưi dôk mdei, boh nik klei hdĭp pô čiăng atăt phung mkăn lŏ wĭt kơ Aê Diê mơ̆?
Wah lač: Ơ Khua Yang, kâo bi mni lač jăk kơ Khua Yang Yêsu săn leh asei tuh êrah ti kyâo bi kal čiăng bi tui kâo. Akâo kơ Ih đru kâo hiu hưn Klei Mrâo Mrang Jăk ba lu mnuih lŏ wĭt kơ Aê Diê hŏng jih ai tiê hdơr knga kơ Ih leh anăn khăp kơ mngăt mnuih dôk luč.
Dlăng Klei Aê Diê Blŭ hlăm tlâo thŭn: Y‑Malaki 3:7-4:6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
